Matayo 8
8
Jesu kumuboesa mundu wa ukoma
(Marko 1:40-45; Luka 5:12-16)
1Nao Jesu aghenda kuselela kufuma mghondini, makoghano mabwaa ghakamwirima. 2Nao keja mundu mumoju ewo na ukoma kadyaya ngokoro hambiri yake keghamba, “Bwana kwashaya wadima kuniombochola.” 3Nao Jesu kaghorora mkonu ghwake kamwata keghamba, “Nashaya, ombochoka.” Nao iyo ngelo yenyi ukoma ghwake ghukaombochoka. 4Nao Jesu kamuza, “Lola swaghoranye na mundungi; ela ghenda kwa mkohani ukuonyeze kwake, na ufunye sadaka selyi Musa alaghize kuwamanyisa wandu kamba waboa.”
Jesu kumuboesa mtumishi wa ofisa wa Mroma
(Luka 7:1-10)
5Nao Jesu angila Kapernaumu, kajilo ni ofisa mumoju Mroma kamngolangola, 6kemuza, “Bwana, mtumishi wangu wanatungure nyumba na uwo na ukongo ghwa kupooza na ondesirima.” 7Nao Jesu kamuza, “Nighendagha nimuboese.” 8Ela ulya ofisa kamuza, “Bwana, imi sifweni ungile nyumba kwangu; ela ghora ghore yenyi na mtumishi wangu uboagha. 9Kwani namose nimi mubwaa, na askari isi yangu. Nemi namuza uyu, ‘Ghenda’ na waghenda, na uyu, ‘Njuu’ na weja, na msunyi wangu ‘Dea hung'u,’ na wadea.”
10Nao Jesu aghenda kusikila hung'u kashinika, kawauza walye weluo wekemwirima, “Fulo namuza, na lyingi sionile mundungi ewo na idumusi selyi kele Israeli. 11Nemi namuza wekujagha wandu wengi kufuma mashariki na magharibi wakalanye kitembo na Abrahamu, Isaki na Jakobo kele uzuri ghwa Mlungu, 12ela walye wana wa uzuri wakumbo noko kele kiza, andu kujekala kililo na kukengeresha majegho.” 13Nao Jesu kamuza ulya jemadari, “Ghenda ngila yako, na ghakale selyi kwenyi wadumusa.” Nao mtumishi wake kaboa iyo ngelo yenyi.
Jesu kuboesa wandu wengi
(Marko 1:29-34; Luka 4:38-41)
14Nao Jesu kaghenda nyumba kwa Petro, kamdoka mkekulu wa Petro ulilini mkongo wa msuko. 15Nao kamwata mkonu na msuko ghukamsigha, kauka kawatumikila.
16Nao ifika hafukeni wakamletela wose weluo na pepo, naye kazifunya kwa kughora, na kuboesa wandu wose weluo wakongo. 17Naye kadea hung'u eri akatise ghalye ghaghoriro ni tondolo Isaya keghamba, “Iye mwenyi wanausile manyonge ghetu na kutwala makongo ghetu.”
Washaile kukala wairimi wa Jesu
(Luka 9:57-62)
18Nao Jesu aona makoghano mabwaa ghamumara, kawauza wairimi wake, wawambuke chambuko cha bahari. 19Nao mwalimu mumoju wa Sheria kamjila kamuza, “Mwalimu, nikuirimagha kila andu ughendagha.” 20Nao Jesu kamuza, “Kwehe zana mirumo yawe na nyonyi zana vichunguri, ela Mwana wa Mdamu sawesi andu konaraga na kuzumua.” 21Nao mumoju wa wairimi wake kamuza, “Bwana sigha nighende jako nimuzike aba.” 22Ela Jesu kamuza, “Niirime, na usighe wafwa wazike wafwa wawe.”
Jesu kunyamaza mbeo mbwaa
(Marko 4:35-41; Luka 8:22-25)
23Nao Jesu kangila kele mashua na kaghendanya na wairimi wake. 24Nao awenyi kukeja mbeo mbwaa baharini, hata mashua ikashaya kumalika baharini; ela Jesu oluo atungure. 25Wairimi wakaghenda wakamunula wekemuza, “Bwana, tikize tendefwa!” 26Naye Jesu kawauza, “Kudani mudeagha wogha wandu wa idumusi ichache?” Nao kauka na kuikemela mbeo na bahari; nao alyenyi kukanyamala chwi. 27Nao wandu wakashinika wakaghamba, “Ni mundu muni uyu hata mbeo na bahari zimusikilagha?”
Jesu kuboesa wandu waili wa pepo
(Marko 5:1-20; Luka 8:26-39)
28Nao Jesu aghenda afika chambuko kele isanga lya Gadareni kajilo ni wandu waili wa pepo weluo wekefuma kele makaburi. Nawo weluo wabile hata wakadea wandu siwaitile ilya ngila. 29Nao wakakema wekeghamba, “Wanashaile kimuni kwetu Mwana wa Mlungu? Ondeja aha kutitirira hambiri ya ngelo yetu?” 30Nao kavui na alye koluo na uranu ghwa nguluwe zikelisa. 31Nao zilya pepo zikamlalama Jesu zikeghamba, “Ilyi watifunya, utisighe tingile kele ghulya uranu ghwa nguluwe.” 32Nao Jesu kaziuza, “Ghendeni” Nao zikawafuma, na kungila kele nguluwe, na uranu ghose ghwa nguluwe ghukadoromoka kele ivongo ghukangila baharini, ghukafwa mejini. 33Nao walisa wakakimbila wakaghenda kele muzi wakawaghorera wandu ghose ghadeike na ghalye ghawapatile walye wandu wa pepo. 34Nao wandu wose wa muzi wekeja kwa Jesu; Nawo wamwona wakamlomba afume kele isanga lyawe.
Избрани в момента:
Matayo 8: SAGALLANT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
(C) The Bible Society of Kenya, 1993