Luk 21
21
Fómo wiiy ŋkfə woo ŋgaà kitàn
(Maak 12.41‑44)
1Mo Jesus dzə́ e lav cù, e lòo shur sí, e yèn mo vé mbàme wáy afómo vév é ŋkùv wo vé‑eè wáy mbàm se Nyùy sho. 2Wù kfən yèn sá wiiy ŋkfə wùmòʼ, a dzə̀ ŋgaà kitàn, a wù wáy mbàm se ŋeerín sí shó sibaà. 3Wù nèn sùúy jii, «Vèn wáa kiíy rú ji wiíy ŋkfə woo ŋgaà kitàn və̀n wày mbàm, sí shaá se wìr dzə̀m kì wáyí. 4Wìr dzə̀m kì bay mbàm báyin, a se kuʼùn sí bér aáwuné vibàm. Yii bèy, wiíy və̀n, mo wù fə̀m ghíy ghiyín ben, wù gér kifá ke wù kì kér kidzə̀m, à kùr rə shó.»
Jesus fiʼ ŋgeʼ wùn à vibàn veé ghan sé bàm sí
(Matio 24.1‑14; Maak 13.1‑13)
5Wón və́ lìm ámóʼó nèn lò kèʼ, a burí lav cù rə̀y, a fìʼ vijuŋ ve tiy ye á bomen shó wùn à vifá ve wíri‑iì fóri, aá wáyri sho. Jesus suúy jii, 6«Vèn léŋri vifá vìn bèn, a kishiíy kí wíy gheén, aá ker vidzə̀m, é la tíy yímóʼó yòʼ gòʼ e yímóʼó kitu.» 7Áwune dzə́r jii, «Ŋgaà Yèʼey, kinyo kee shoon ki wíy koóy e ghàn ka? Kisəəm ke kí wíy dìn ji kinyo kìn ki sí yiì a koóy ki dzə̀ ka?» 8Wù bìnèr jii, «Vèn wáa yen fo wìr wìy bòʼtí ven, é vèn jáy dzə́ə. Wíri wíy fəə anín, a teʼ mo é si, a suúy ji áwune dzə̀ Mfə̀ə́r woo shó, a ghán sí ghèén ne. Á wíy lóo suúy bèy, vèn wàa yen fó yuurí kinyo kév. 9Vèn wíy yú léŋ rər, kfə́n yú, a wíri táŋ sáʼ e wòŋ símóʼ sí, lá vèn yòʼ a fàn. A dzə̀ kinyo kee shooy ki kù kòóy ŋkuŋén, a bó yòʼ dzə̀ ji sì ghán se ndzə kù sí lo, e mày.»
10Jesus kfə́n a suúy aáwune jii, «Kitúm kímóʼ kí wíy lò, é kí wáa màʼ kímóʼ kí e rə́r sí, é woŋ wúmóʼó ŋáʼáy sá, a màʼ wúmóʼó e rə́r sí. 11Vinyo ve tavkín ví wíy a koóy e virə̌ʼ virə̀ʼ. Nsay wíy a sə̀ʼ kitávín, jìŋ wíy a koo, é kifə̀ʼ ki kfə́n a teè wíri. Vinyo ve beemen ví wíy a koóy e yuv, a dìn visəəm vé vinyò ve tavkín ví. 12Vèn wáa kiíy ji bo vinyo vee shooy vi wáa koóy, á wíy a koorí ven, a nyàvrì sho, bìʼ fo vèn dzəə̀n wír vém. Á wíy a saʼ nsaʼ sén é ŋgày se bùnrì, a way ven é sháŋ. Kfə́n wíy lo, aá wáa tiír ven áàfone wùn à vitú ve bàràʼ ví si. 13Vèn wíy tiím fo, é vèn koóy a dzə̀ kintóʼ ke dzə̀ vèn wàa fìʼtì kinyo ke Nyùy aáwune. 14Vèn ku nèn wày wáyín ji vèn wíy tiim e kibàʼ ke nsaʼ, lá vèn yòʼ a rə̀m a ji á sà suuy ji kaá. 15Wíy way mo jí si e věn shuù, e fo ven vifií, a bó yòʼ dzə̀ aŋgaà vén gòvi wìy kìíy mó a bìnèr, a kìnèn kinyo kén. 16A kù wíy a gòvtì wír vén ven, a fə̀m dzə̀ atàr vén, kìn afə́r vén, kìn wír vee věn laʼ, kìn ŋkar sén, bo á kù wíy a lì ven, a dù sho ji á wáa saʼ. Aá wíy a saʼ, a yuyrí ámóʼó. 17Wìr dzə̀m wíy a bàn ven, bìʼ fo vèn dzəə̀n wír vém. 18A bó ŋgay nəŋ e mòʼón yòʼ wíy tum fo wìr kitu, e lày. 19Vèn wáa tiy rì kitávín, e wìy nəə́ e dzə̀ʼə̀m yee là may.
Jesus fiʼ mo á wíy laàr Jerusalem
(Matio 24.15‑21; Maak 13.14‑19)
20«Vèn wíy lóo yen, a vé rərí gím ne ŋkàlaʼ Jerusalem, e kaàrí, e tàr, vèn nèn a kiíy ji sì ghán se á sí laar fó. 21Kí wíy kooy bèy, wír ve á dzəə̀n é mbìv wòŋ yee Juda adzə̀me wàa sam, a koʼ aàgwan, é wír ve á dzəə̀n é ŋkàlaʼ foo fèyi wáa meekír, é la wìr yòʼ kfə̀n dzə́ə a wìy fo kwaʼ ji wun nəə sho. 22Vèn wáa kiíy ji ghán see shooy si wíy a dzə vishiíy ve Nyùy wíy màʼ ŋgeʼ e Jerusalem kitu ji vinyo ve vé‑eè saŋen e wùn ŋwàʼ vi fíʼ gheén vidzə̀m. 23Éè mò, wíy lòo dzə e vishiíy fóo fèy, é ké vikìy ve á juur bvəm wùn à ve á nyoor wón kí wáa dzə e le? Nyùy wíy shwiíy kilòŋ fo woŋ və̀ne, é wìr dzə̀m yén ŋgeʼ ye ghaʼán. 24Á wíy gwàtì ámóʼó gwátin, e tayrí ámóʼó ji akwàn, a jàvtì vitúm vidzə̀m. Á mo vitúm ve bó ví yòʼ kiìn Nyùy vi wíy tòn Jerusalem, a koʼrí e kitu wo, e dù, e meé mo ghán sév sí wíy mày.
Jesus fiʼ visəəm vé ghán se wù wíy a kfən
(Matio 24.29‑35; Maak 13.24‑31)
25«Wíy lòo dzə e ghan see shooy, aá yén visəəm vé vinyò e si shùy, e kfə̀n yèn é ŋwee, e yèn é mejìy. A keé nsay ki wíy a dzə jii, rìbà ndzə̀v wíy a tsəynín, a yòr kitávín, é woŋ símóʼ sí wáa ghaynín ji sà sì laykìr bèn a. 26Wíri wíy a fàn, a yàʼ, bìʼ fo á wíy səə̀m ji kimbeemè ke kinyò ki sí wìy koóy e nsay. Vifá ve ví sə́ŋnin e yuv ví wíy a nyeŋnín vidzə̀m, 27#Daniel 7.13. aá nèn yèn, a ŋgaà wo yírí dzəə̀n *Wanwìr bvə́y é mvə̀m mbàʼ, a wù sí kér vitaáví wùn à vikuʼùy ve ghaʼán ví. 28Vèn wíy lóo yen, a vinyo vìn vi sí kooyì, á tìím ji nyaáŋ, a leéy a dzə̀ fó mbìy, a kiíy ji sì ghán se Nyùy sí wìy lùŋèr ven.»
29Jesus nèn kfə̀n yòv ŋgàn yìmòʼ aáwune jii, «Vèn səəm kinyo fo kicí ké *fig ki, à vicí ve ví yii sooy vi vidzə̀m. 30Vèn yii yén, a ví kéʼ ne, a tokír, vèn nèn kìíy ji sì á ghán se wuú sí yiì a gbù. 31Kù dzə̀ sá mo vèn wíy yén vinyo vìn, a ví kéʼ ne, a koóy, vèn nèn kìíy ji Nyùy sí yiì a saʼ a vifon və́. 32Vèn wáa kiíy rú jii, ŋgwàʼ ye yì dzəə̀n lèn yòʼ wíy shaà e dzə̀m, a bó vinyo ve m suuy vìn vi koóy vidzə̀m. 33Yúv wùn à nsay wìy mày, a jí sém sí kù wíy a tiy fo.
34«Vèn wáa leéy fo věn vitu, a yen fó a ghan, a yi a dzə̀ vitú, a nonín, a baa, a way vifií a dzə̀ é dzə̀ʼə̀m yee fen fo melív men mè rəə́y, é kishiíy kee shooy ki wìy sàsìn, e koò ven moo kitám. 35A kinyo keé kishiíy fóo fèy ki wíy sətí wír ve á dzə́ e kitu ke nsay adzə̀m. 36Vèn ku nèn a way vifií, a bùnrì Nyùy ghán sidzə̀m ji wù távír ven, ŋgeʼ see shooy si wíy lóo koóy, é vèn tósín shó, e nèn wìy a tiy e ŋgaà wo yírí dzəə̀n Wanwìr si, là kinyo.»
37Jesus ku nèn a yeʼéy wíri é lav cù vishiíy vidzə̀m bèy. Yií lóo dzə vitsə́ʼ, wù lò, e kòʼ é Gwan Vicì vé Oliv, e shìíy fo. 38Ndzə bvəə́shi, javì, wíri nèn a banén e lav cù fó a yuurí kinyo kfə́.
Избрани в момента:
Luk 21: LNB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 CABTAL