Joon Shúu Fù
Shúu Fù
Á yoŋ Jesus e ŋwàʼ wo Joon‑eè saŋen vən jii, Jínyùy wo wù‑uù siìn fó kèʼ, bìʼ fo dzəə̀n wun wo wù tiísi jí se Nyùy e wíri. Wù nèn wìy e nsay fèn, e lì mbom wìr, a dzə wùn à wíri. Joon wáa saŋ kimfèr ke Jesus kìn bèn ji vèsən lóo yòŋ, aá fíʼ a biimé ji Jesus dzə̀ á Wan Nyùy, a dzə̀ Mfə̀ə́r wò Nyùy‑iì kàʼàn. Vèsən biíme, wáy shilív é wùn wó, é wù fó vèsən dzəʼə̀m yee là may (20.31).
Joon lóo kèʼ ŋwàʼ və̀n, e tòmbìy dìn ji ŋgaà wo wù yoŋ ji Jínyùy dzə̀ á Jesus. Wù nen shaà fo mbìy, a fèr viŋgaʼnìn ve vinyò vímóʼ ví ve Jesus‑eè yii, a ví din ji wù dzə̀ á Wan Nyùy wo wù wìyìn ji wun luŋer wíri. Wù wáa naàrì mo Jesus‑eè li vinyo ve wù‑uù yii vìn, fiʼsìn, yéʼey wíri shó mo wun woo Wan Nyùy wùn Tàr wov dzəə̀n. Kilíŋ kee shooy ki kfə́n a dìn mo wír ámóʼó yuúri kinyo ke Jesus, biíme, táti wùn áwune, bo ámóʼó wáa ten, e nèn lò, a bàn wun bánen. Vintsə̀m vee 13–17 vi nén a fèr mo Jesus‑eè kòŋèn wón və́ lìm, e dù, e jòʼsì. Wáa dzə vitsə́ʼ ve vé‑eè sí yìi koo wun, wù rə́sí, a tir áwune, a baʼtí melív mev, fo á wíy lóo yuyrí wun, é melív mev mè weey, aá léʼ Nyùy. Vintsə̀m ve ví jòʼsìn ví nén a fèr mo vé‑eè koon Jesus, e sàʼ nsaʼ rə, e yùyrí e kintam, bo wù fəə́ fó kpu, a dìn kitú kfə́ e wír vəə́.
Kinyo ke Joon nan feyì e ŋwàʼ fèn ki dzə̀ kee kùm dzəʼə̀m yee là may. Wù naarì ji dzə̀ á mbùʼmé wo Jesus buʼ wír ve á táti wun sho adzə̀m, bìʼ fo dzəə̀n wun dzə́ə ye yì du fo Nyùy, a kinyo ke rú kí lo a dzə̀ fo wun, a fó wun dzəʼə̀m yee là may. Ŋwàʼ Joon və́ne din, e shaà aŋwàʼ ámóʼó mo Jesus‑eè li vifá ve wír veé Judàa kér aáwuné dzə̀ʼə̀m, yeʼéy wíri kinyo ke Nyùy sho, moo mendzə́v, kibán kee kév, kikaʼày, njiì wùn à nshìy wov, à dzəə̀ ye áwune yii náŋsin kitiír ké kifa sho, bo kí wáa koóm kijuŋ.
Vilíŋ ve ŋwàʼ
Shúu mbìyi 1.1‑18
Joon woo Ŋgaà Wáyndzəv wùn à wón lìm Jesus mbìyi 1.19‑51
Jesus ghán, yéʼey wíri 2.1–12.50
Vishiíy vé Jesus ve kinjòʼsìbàm é Jerusalem 13.1–19.42
Jesus fəə̀ fó kpu, e dìn kitú kfə́ e wír vəə́ 20.1‑31
Jesus yèn wón və́ é ghaa kibaŋ keé Galeli 21.1‑25
Избрани в момента:
Joon Shúu Fù: LNB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 CABTAL