Joon 2
2
Jesus bínér mendzə́v é melùʼ
1Kishiíy kí shaà, ndzə bvəə́shí, e ràn, á wáa ker vijín é ntèʼ yee Kaana e Galeli foo fèy, yìy à Jesus dù fo, 2a vé‑eè bì sá Jesus wùn à wón və́ lìme. 3Á yiì dù, e nò meluʼ, mè mày, yìy à Jesus suúy shó jii, «Meluʼ mè mày ne.» 4Wù yòŋ jii, «Yìy, à wáa bi mo shó ji m yée? Ghán se dzə̀ m kèʼ lim yém sí yóʼ ne ghèén.» 5Yè wov ku yòʼ sùúy e vé kijàvi jii, «Vèn wáa yu a dzə̀ fo Jesus, wù suuy mo wù suuyin, vèn wàa yiì.»
6Mbìʼ sé mendzə̀v sí‑iì tíy fo ntuùfú, a dzə̀ se wír veé Israyi yii kér aáwuné melav ji á wáa sù virə́ʼ shó mo nsər yev taʼà. A wo mòʼóné dzə̀ moo kèʼ fo tin e tàn, e dù, e meé tin saàmbà. 7Jesus yiì lò, e sùúy e vé kijàv vìyi jii, «Vèn tú mendzə́v mè, e wày é mbìʼ sí fey, é sí rúnkír.» Á ku nèn yiì bèy, mbìʼ siy si rúnkír ji njìír, e yèr. 8Wù nèn sùúy jii, «Vèn sér memoʼ mè, e fò, é ŋgaà ntaŋ yútí.» Á sér, e dù, e fò shó. 9Wù yútí, a mendzə́v mèy mè bínkír ne ji meluʼ, a bó wù yòʼ kì ji kì dzə̀ á mendzə́v, kù‑uù kì vé kijàv ve vé‑eè serin a dzə̀ mendzə́v. Wù nèn jàŋ ŋgaà vijìn, 10e sùúy sho jii, «Wìr yii kaʼ kinyo, wù tòmbìy fə̀ə́r meluʼ me juŋ mè, wíri nó, yú, bo wù fó mee fó tèr. Kì yiì ka, bo à bávtí meluʼ me juŋ mè, a fəə́r a dzə̀ lèn?»
11Jesus‑eè yiì kinyo kìn e Kaana woó Galeli foo fèy, a dzə̀ kiŋgaʼnìn ke kinyò ke mbìy ki ke wù‑uù dìnèn, wíri wáa yen vitaáví ve Nyùy foon shó. Mo wón və́ lìme yenen, e nèn màysì, e wày shilív é wùn wó.
Jesus jum vé wayí fó *lav cù
(Matio 21.12‑13; Maak 11.15‑17; Luk 19.45‑46)
12Kee shooy ki shaà, Jesus nèn lò, a dù e ntèʼ yee Kapeenahum. Yè wov wùn aàfə́r vəə́, à wón və́ lìme wáa dù wùn áwune. Á dù, e yiì vishiíy fó vishàr. 13Mo yì‑iì siìn ghán se wír veé Israyi kì sí wìy a yi *Ŋkǎʼ Yáʼayshaà, Jesus nèn lò, a dù e Jerusalem. 14Wù dù, e nə̀ə́ e lav cù, e yèn, aá fiinè nyám se cù see moo anàʼ, wùn aànjìi, à vibìŋ ví fó. Wù kfən yèn, a wír ámóʼó dzə́ fo, kúvsin mbàm se wìr ve vé‑eè wiykìr fo vitum vímóʼ ví, yí séʼ. 15Wù nèn tàʼ kfəə̀, e sə̀ə́y ji ŋgwàn, a wiv wír vìy sho, a tatí wùn aànàʼa, aànjìi, a jùm fo lav cù fèy, a bàʼtì visə́r ve wìr ve vé‑eè kúvsin mbàm, mbàm sév sí wáa taʼrí fo nsay. 16Wù kfə́n a kàntì wír ve vé‑eè fiinè vibìŋ jii, «Vèn shaʼar vifá vìn bèn, e fəə̀ shó. Lá vèn yòʼ bìnèr lav Tàr wor ji kirə́ʼ ké way.» 17#Nsùyrì Nyùy 69.8. Wón və́ lìme nèn kuùmé kinyo ke vé‑eè saŋen é Ŋwàʼ Nyùy ji wìr wùmòʼ‑oò lò sùúy e Nyùy a jii, «M kér shií fo wò lav e ŋàŋ, a wù baári e mǒ shiliv moo və́y.»
18Vé wòŋe yén kinyo ke Jesus yiìn kin, e dzə̀r shó jii, «À yii kinyo kìn moo la? Ku dìn kisəəm kí fo à li vitaáví, e bó a yiì vinyo ve à yii vìn.» 19Wù bìnèr jii, «Vèn ker lav cù rə̀n, vishiíy ví lóo meé vitaár, a m siír ne fo.» 20Á dzə́r shó jii, «Vé‑eè bòm lav cù rə̀n kiyá nshòv ntuùfú e mkweè, áà wìy bòm ké vishiíy vitaár à?» 21Aá suuy bèy, a bó á yòʼ kì ji wù yoŋ lav cù, a dzə̀ á yee kitú kfə́. 22Wón və́ lìme nèn wìy sìíy sa, a kuumé kinyo ke wù‑uù màʼàn kin, a wù fəə́ ne fo kpu. Á nèn biìmé ji kinyo ke Jesus‑eè suuyin, a vé‑eè lo dìn sa e Ŋwàʼ Nyùy kìn, ki dzə̀ á rú.
23Jesus ku nèn a dzə e Jerusalem e ghan sé Ŋkǎʼ Yáʼayshaà sìn, a yiì viŋgaʼnìn ve vinyò, ví wáa dìn vitaáví vé Nyùy. Wír aníne wáa yen, a way shilív é wùn wó. 24Yii bèy, la Jesus yòʼ a way shilív aáwuné wùn ji sì rú á wùn áwune, bìʼ fo wù‑uù kiìn liì wíri kijuŋ. 25A bó yòʼ‑oò dzə̀ á kfə̀n a naàrì liì wìr sho náarin gheéy. Wù‑uù kì vinyo vidzə̀m ve ví dzəə̀n e wìr shiliv.
Избрани в момента:
Joon 2: LNB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 CABTAL