मरकुस 3
3
सुकेड़ै हात गै आदमी नै ठीक करणो
(मत्ती 12:9; लूका 6:6-11)
1फेर यीसू एकर सबत गै दिन सत्संग घर में गेया बठै एक आदमी हो झिकै गै हात गै लकवो होयेड़ो। 2जद केई लोग यीसू पर दोस लगाण गी ताक में बेठया कै देखां आपां ओ आज गै दिन इनै ठीक करै, कै कोनी? 3यीसू बिं लकवै होयेड़ आदमी नै सारा गै सामै खड़यो होण खातर केयो। 4जद यीसू बां दोस लगाण आळा आदमिया नै पूछयो कै नेम विधान गै अनुसार सबत गै दिन आच्छो काम करणो चईयै या बुरो? किंगी जान बचाणी चईयै या ना बचाणी चईयै? पण आं बाता गो बां कनै कोई जबाब कोनी हो।
5जद यीसू च्यारूंमेर खड़यै बां लोगां नै गुसै ऊं देख्या। अर बिं लकवै गै आदमी नै केयो तेरो हात आगै कर अर बण आपगो हात आगै करयो अर बो जदी ठीक हो'ग्यो। 6जद फरीसी लोग बारै आ'गे यीसू नै मारण गी योजना बणाण लागग्या।
भीड़ गो यीसू गै लारै होणो
7इंगै बाद में यीसू आपगै चेला सागै गलील झील गै किनारै उड़ग्या। अर लोगां गी मोटी भीड़ बां कानी चाल पड़ी। 8झिकी गलील अर यहुदियां प्रांत गै गांवा ऊं, यरुसलेम ऊं, इदूमिया प्रांत गै गांवा ऊं, यरदन नदी गै दूसरी ओर गै गांवा ऊं, सूर अर सेदा प्रांत गै गांवा ऊं आयेड़ी ही। ऐ सारा यीसू गै चमत्कारा नै सुण गे बां कनै आया। 9भीड़ बोळी होण गै कारण यीसू आपगै चेला नै केयो कै मेरै खातर एक किस्ती तैयार राखो। जिंऊं ऐ लोग मनै दबा ना सकै। 10क्यूंकै बां भोत सै लोगां नै ठीक करया ईंखातर भोतसा लोग बांगै हात लगाणो चावा झिका रोगी हा। 11अर झिकै लोगां में ओपरियां गी कसर ही बां लोगां गी ओपरियां यीसू नै देख गे बिंगै आगै लिटण लाग ज्यावंती अर चिलागे केवंती कै तूं परमेसर गो बेटो है।
12पण यीसू ओपरियां नै खबरदार करी कै बे ना बतावै कै यीसू कुण है।
बारा खास चेला नै पक्का करणा
(मत्ती 10:1-4; लूका 6:12-16)
13फेर यीसू एक पहाड़ पर चढ'ग्या अर झिका नै बे चावा बानै कनै बुलाया। 14-15जद बां बामूं आपगा बारा जणा नै आपगै सागै रेण खातर अर लोगां में परचार करण खातर, अर लोगां मू ओपरी काडण गो अधिकार देगे बानै चुण लिया।
16-19झिकै बारा लोगां नै बण चुणया बे ऐ है समौन झिकै नै यीसू पतरस नाम दिओ, जब्दी गो बेटो याकूब, यूहना, अन्द्रियास, फिलिप्पुस, बरतुल्मे, मत्ती, थोमा, हलफई गो बेटो याकूब, तदाई, सीमोन झिको देस भगत हो, अर यहूदा इस्करियोती झिकै यीसू नै दुसमणा गै हात पकड़ायो हो।
यीसू अर बेलजबूल
(मत्ती 12:22-32; लूका 11:14-23; 12:10)
20फेर यीसू एक घर में आया तो बठै लोगां गी भीड़ इती भेळी होगी कै रोटी जीमण नै ई सांस कोनी मिल्यो। 21जद यीसू गै घराणै नै ओ ठा लागग्यो कै बिनै रोटी जीमण नै ई टेम कोनी मिल्यो तो बां बानै केयो, “इंगो दिमाक खराब हो'ग्यो। अर बे बानै लेण खातर गेया।”
22बठै यरुसलेम ऊं आयेड़ा यहुदी धर्म गा लोग केण लाग्या, “इंगै मा सैतान गो प्रधान बेलजबूल है अर ओ बिंगी मदद ऊं ओपरिया नै बारै काडै है।”
23यीसू बानै कनै बुला'गे उधारण ऊं समझाण लाग्या कै, “सैतान गो प्रधान आपगै सैतान नै किंया भजा सकै अर काड सकै। 24जे एक राजा गै राज में आपस में फूट पड़ज्यै तो बिंगो राज किता दिन चालै। 25जे एक घर में फूट पड़ज्यै तो बो घर किंया बदंयो रे सकै। 26अर सैतान जे आपगै भूता नै काडण लागज्यैगो तो बिंगो सारो राज खत्म होज्यै'गो।
27जे कोई आदमी एक तकड़ै आदमी गै घर नै लूटणो चावै तो पेलां बिं तकड़ै आदमी नै बांधणो पड़ैगो। बिंगै बाद में ई बिंगै घर नै लूट सकैगो।
28मैं थानै एक पक्की बात बताऊं कै परमेसर हर प्रकार गै पाप अर निंदा नै माफ कर दैयगो। 29जे कोई पवितर आत्मा गी निंदा करैगो तो बिनै कदी माफ कोनी करैगो। पण बो नरका गो भागी बणैगो। 30यीसू आ बात ईंखातर कैई कै लोग केवा कै यीसू में ओपरी गो निवास है।”
यीसू गी मां अर भाई
(मत्ती 12:46-50; लूका 8:19-21)
31इंगै बाद में बठै यीसू गी मां अर बिंगा भाई आया। अर बां बारूं ई बुलावो भेज्यो। 32यीसू गै चारूंमेर लोगां गी भीड़ बेठी अर बां यीसू नै आ'गे केयो, “थारी मां अर थारा भाई थानै मिलण खातर बारै खड़या है।”
33यीसू बानै केयो, “मेरी मां अर मेरा भाई कुण है।” 34जद बण चारू मेर बेठयै लोगां कानी देखगे केयो, “ऐई मेरी मां अर मेरा भाई है। 35मेरा बेई भाई, भेन अर मां है झिका परमेसर गी इच्छा पर चालै।”
Избрани в момента:
मरकुस 3: BGQ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2023 (Active), Wycliffe Bible Translators, Inc. All rights reserved. © WIn Publishing Trust