मरकुस 1
1
यूहना बतिस्मो देण आळै गो परचार
(मत्ती 3:1-12; लूका 3:1-18; यूहना 1:19-28)
1परमेसर गै बेटै यीसू मसी गो सुब समाचार इयां सरू होवै। 2जिंया परमेसर गै दास यसयाह परमेसर गी बात बताण आळै लिख्यो कै,
“परमेसर यीसू मसी नै केयो देख मैं आपगै दूत नै तेरै आगै भेजूं।
झिको तेरै खातर रा तैयार करसी।”
3बो बन उजाड़ में खड़यो होगे जोर-जोर ऊं हेलो मारगे केण लागरयो है कै,
“प्रभु गो रा तैयार करो
अर बिंगी सड़का सीदी करो क्यूंकै बो आण आळो है।”
4परमेसर गी ईं बात गै हिसाब ऊं यूहना बतिस्मो देण आळो आयो झिको लोगां नै आपगै पापां ऊं माफी लेण खातर आपगो मन परमेसर कानी फेर गे बतिस्मो लेण गो परचार करतो। 5जद सारा यहुदियां गा अर यरुसलेम गा लोग आपगै पापां गी माफी खातर बिंऊं बतिस्मो लिओ।
6यूहना ऊंट गै ऊन गा बणेड़ा गाबा पेरतो अर आपगी कड़तू गै चामडै़ गी पेटी बांदे राखतो अर टिडी अर सेत खाणतो। 7अर लोगां नै ओ केणतो कै मेरूं बाद झिको आण आळो है बो मेरूं ई सकतीसाली ताकताळो है। अर मैं बिंगै बुंटा गो फितो खोलण गै ई काबिल कोनी। 8मैं तो थानै पाणी में बतिस्मो देऊं पण बो थानै पवितर आत्मा ऊं बतिस्मो देसी।
यीसू गो बतिस्मो अर परीक्सा
(मत्ती 3:13–4:11; लूका 3:21-22; 4:1-13)
9फेर एक दिन यीसू गलील परदेस गै नासरत गाम ऊं आ'गे यरदन नदी में यूहना ऊं बतिस्मो लिओ। 10अर जद यीसू बतिस्मो लेगे पाणी ऊं उपर आया तो बां आकास नै खुलता देख्यो अर पवितर आत्मा नै आपगै उपर कबूतर गी तरियां उतरती देखी। 11अर आकास ऊं बाणी होयी कै, “तूं मेरो लाडलो बेटो है अर मैं तेरू भोत खुस हूं।”
12इंगै बाद में पवितर आत्मा यीसू नै गाम ऊं दूर बन उजाड़ में घाल दिओ। 13अर यीसू चाळीस दिन तांई बठै ई रेया अर सैतान बानै परखतो हो। बठै जंगळी जानवर रेंता अर सुरगदूत आ'गे बांगी सेवा करता।
यीसू गी सेवा करण गी सरुवात
(मत्ती 4:12-17; लूका 4:14,15)
14जद यूहना नै राजा हेरोदेस जेळ में बंद कर दिओ बिंगै बाद यीसू गलील परदेस में आ'गे परमेसर गै राज गो सुब समाचार गो परचार करयो। 15अर आ'गे केण लागग्या कै अब परमेसर गो राज आ'ग्यो है बे अब थारा राजा बणण आळा ई है ईंखातर आपगै पापां नै छोड़गे बांगी बाता पर बिस्वास करो।
16एकर बाद में यीसू गलील झील गै किनारै-किनारै जाण लागरया जद बां सीमोन अर अनद्रयास नै देख्या। बे मछली पकड़ण आळा हा अर झील में जाळ फेंकण लागरया। 17यीसू बानै केयो, “मेरै लारै आओ मैं थानै परमेसर खातर आदमी पकड़ण आळा बणाऊंगा।” 18बे बिं टेम ई जाळ छोड़गे बांगै लारै चाल पड़या।
19बठू थोड़ी सी दूर जाणै गै बाद में बां जब्दी गै बेटै याकूब अर यूहना नै किस्ती पर जाळ सांवटता देख्या। 20बां बानै देखतांई बांगै कनै बुलाया अर आपगै पिता नै मजदूरां सागै किस्ती पर छोड़गे बांगै लारै चाल पड़या।
ओपरी बड़ेड़ै आदमी नै ठीक करणो
(लूका 4:31-37)
21जद बे कफरनहूम परदेस में आया अर जद सब्त गो दिन आयो तो यीसू सत्संग घर में जा'गे उपदेस करण लागग्या। 22बांगो उपदेस सुणन आळा हेरान होण लागरया क्यूंकै बे यहुदी लोगां गै धर्म गुरुआ गी तरियां उपदेस कोनी करा पण बे अधिकार गै सागै बताण लागरया।
23बिं टेम ई बठै एक आदमी हो झिकै में ओपरी बडे़ड़ी ही। 24बो एकदम ई चिलागे बोल्यो, “हे नासरत गाम गा यीसू थारो मेरो के मेळ है? क्यू तूं मनै खत्म करण आयो है? मैं जाणू तूं पवितर जण अर परमेसर कानी ऊं आयो है।”
25यीसू बिनै ललकारयो कै, “चुप होज्या अर इमूं निकळज्या।”
26जद ओपरी जोर ऊं कूकगे बिनै मरोड़ी देगे निकळगी। 27ओ देखगे लोग हेरान होगे केण लागग्या कै आ के बात है? ओ तो अधिकार गै सागै सीख दैय। झिकै ऊं ओपरियां बी आंगो केणो मानै।
28यीसू झिको चमत्कार करयो बिंगी खबर गलील परदेस गै भोत सै गामा में फेलगी।
भोत सारा बीमारा नै ठीक करणो
(मत्ती 8:14-17; लूका 4:38-41)
29फेर बे सत्संग घर ऊं चालगे सीधा याकूब अर यूहना गै सागै सीमोन अर अन्द्रियास गै घरे गेया। 30बठै सीमोन गी सासू बुखार में सुती पड़ी। अर घर आळा दबादब बिंगै बारै में यीसू नै बतायो। 31जद यीसू बिंगै कनै आ'गे बिनै आपगै हात ऊं खड़ी करी अर बिंगो बुखार उतरग्यो अर बा लुगाई बांगी सेवा में लागगी।
32आथण पेर गी जद सूरज डूबग्यो बिं टेम लोग झिका बीमार हा अर झिका में ओपरियां गी कसर ही बानै यीसू कनै ल्यावण लागग्या। 33अर बठै गा भोत सारा लोग बारनै कनै भेळा हो'ग्या। 34अर यीसू भोत जणा नै बीमारियां ऊं ठीक करया झिका न्यारी न्यारी बीमारियां ऊं दुखी हा। अर भोत जणा मू ओपरियां काडी। बां ओपरियां गा मूं ई बंद कर दिया। क्यूंकै बे जाण ही कै यीसू कुण।
यीसू गी एकलै गी पराथना
(लूका 4:42-44)
35दूसरै दिन बे दिनगै दिनगै उठगे घर ऊं दूर सुनसान जिग्यां में जा'गे पराथना करण लागग्या। 36जद सीमोन अर बिंगा साथी बानै ढूंडण गेया। 37जद बे बानै मिलग्या तो केण लागग्या कै थानै सारा जणा ढूंडण लागरया।
38जद बां केयो, “आज्यो आपां नेडै़ नेडै़ गी बस्तिया में चालगे परचार करां। ईंखातर ई मैं अठै आयो हूं।”
39अर बे सारै गलील परदेस गै सतसंग घरां में परचार करण लागग्या अर लोगां मू ओपरियां बी काड़ता रेया।
कोढी नै ठीक करणो
(मत्ती 8:1-4; लूका 5:12-16)
40यीसू कनै एक कोढ होयड़ो आदमी आयो अर झुकगे बाऊं बिनती करण लागग्यो कै जे थे चाओ तो मनै ठीक कर सको।
41यीसू नै बिं पर दया आ'गी अर आपगो हात बिंगै लगागे केयो, “मैं तनै ठीक करणो चाऊं तूं ठीक होज्या।” 42अर बो हातो हात ई ठीक हो'ग्यो। 43-44अर बिनै सखताई ऊं जावंतै टेम केयो, “मैं झिको कीं करयो बिंगै बारै में किंनैई ना बताई अर जा'गे मिन्दर गै याजक नै आप गी जांच कराई झिकै ऊं बिनै आ लागै तूं ठीक हो'ग्यो है।”
45पण बण जा'गे सारा नै बता दिओ अर बांगी बात सारै फेलगी। ईं कारण ऊं यीसू गाम में कोनी जा सक्या क्यूंकै लोगां गी भीड़ लाग जावंती। ईंखातर बे गाम ऊं दूर सुनसान जिग्यां में रेण लागग्या। फेर ई चारूं पासै गा लोग बांगै कनै आंता रेया।
Избрани в момента:
मरकुस 1: BGQ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2023 (Active), Wycliffe Bible Translators, Inc. All rights reserved. © WIn Publishing Trust