मत्ती 18
18
सुरग राज में सारा ऊं मोटो कुण?
(मरकुस 9:33-37; लूका 9:46-48)
1जद यीसू गै चेला आ'गे बिनै पूछयो, “सुरग गै राज में सारा ऊं मोटो कुण है।” 2जद यीसू एक टाबर नै बुला'गे बांगै बिचाळै खड़ागे केयो, 3“मैं थानै साची केऊं जद तांई थे ईं टाबर गी तरियां अपणै आपनै ना बणाओगा तो सुरग कोनी जा सकोगा। 4ईंखातर झिको अपणै आपनै ईं टाबर गी तरियां छोटो बणावैगो बो ई सुरग में मोटो मानिज्यैगो। 5जे कोई हिस्यै टाबर नै मेरै नाम ऊं मानल्यैगो तो बो मनै मानल्यैगो।
पाप करण गी परीक्सा
(मरकुस 9:42-48; लूका 17:1,2)
6पण झिको कोई मेरै पर बिस्वास करण आळै माणसां गै रा में अड़ेको लगावै तो बिं खातर इंया होवै कै बिंगै गळ में चकी गो पाट बांदगे समुंदर में फेंक दैयो। 7संसार में बिस्वास लोग छोडै है। बो इतो खतरनाक है। संसार में इंया होवंतो रेवै। पण बिंगो बुरो होवैगो झिको किंगैई खातर ठोकर गो कारण बणै। 8ईंखातर जे तेरो हात अर पग तनै ठोकर खुवावै है तो बानै बाडगे फेंक दे। हात पगां गै सागै नरक में जाण ऊं आच्छो है टुण्डो या लंगड़ो बणगे सुरग में जाणो। 9जे तेरी आंख सुरग में जाण ऊं रोकै है तो बिनै काडगे फेंक दे क्यूंकै तेरै खातर बिना आंख गै सागै सुरग में जाणो आच्छो है।”
यीसू गी माफी गै बारै में सिक्सा
(लूका 15:3-7)
10-11“तो देखो, मेरै आं भोळै भाळै बिस्वासियां मू किनैई कमजोर ना जाणियो। मैं थानै केऊं कै बानै बचाण आळा सुरगदूत सदां पिता परमेसर गै सागै रेवै। क्यूंकै मिनख गो बेटो भटकेड़ा नै सई रा पर ल्याण खातर आयो है। 12तूं इंया सोच, किंगैई कनै सौ भेड़ है अर बामूं एक भेड़ गमज्यै तो निन्याणवै भेड़ा नै छोडगे बिं एक नै ढूंडण जावैगो। 13मैं थानै साची केऊं कै जद बा लादज्यै तो बां निन्याणवै नै छोडगे बिं एक खातर बो भोत राजी होवै। 14ईं तरियां आं भोळै भाळै बिस्वासियां ऊं पिता परमेसर ओ कोनी चावै कै एक बी नास होवै।
15जे तेरो भाई तेरै सागै बुरो बरताव करै तो तूं बिनै जा'गे समझा। जे बो तेरी बात मानल्यै तो तूं बिनै जीत लियो। 16पण जे बो तेरी बात ना सुणै तो ओर लोगां नै तेरै सागै लेज्या जिंऊं झिकी बात तूं केवै बिं बात गी गवाई हो सकै।#व्यवस्ता विवरण 19:15 17जे बो बांगी बी ना सुणै तो बिस्वासी मण्डली गै लोगां नै बता। जे बो बांगी बी ना मानै तो तूं बिनै एक गेर यहुदी अर कर लेण आळा बरगो समझ। 18मैं थानै साची केऊं झिको कीं थे धरती पर बांधोगा बो परमेसर सुरग में बांधैगो झिको थे धरती पर खोलोगा बिनै परमेसर सुरग में खोल दैयगो। 19मैं थानै केऊं थे दो जणां आपसरी में साम्पत कर'गे कीं मांगोगा तो परमेसर थानै जरूर देवैगो। 20क्यूंकै जठै मेरै नाम ऊं दो या तीन जणा भेळा होवैगा बठै मैं जरूर होस्यूं।”
21जद पतरस यीसू कनै आ'गे केयो, “प्रभु मनै मेरै भाई गै गुनाह नै किती बार माफ करणो चईयै। जे मैं सात बारी माफ करूं तो ठीक है के?” 22यीसू केयो, “सात बार नइ, बो जिती बार बी गुनाह करै तूं बिनै बिती बारी माफ करतो रेयी। 23ईंखातर सुरग गी बराबरी बिं राजा सागै करीजा सकै झिकै आपगै नोकरां गो हिसाब नकी करणो चायो। 24जद बो हिसाब करण लागग्यो तो बिंगै सामै एक आदमी आयो, झिकैगो करजो दस हजार टका हो। 25पण बिं कनै करजो भरण खातर कीं कोनी हो। जद राजा आग्या दी कै इंगै परिवार गै लोगां नै अर झिको कीं ईं कनै है सारा नै बेच गे इंगो करजो पूरो करो।” 26जद बो नोकर पगां पड़ग्यो अर बिनती करण लागग्यो, “धीरज राखो। ओ करजो मैं होळै होळै भर दैयूंगा।” 27ओ सुणगे राजा नै बिं पर दया आ'गी। बण बिनै माफ कर दियो अर बिंगो करजो बी माफ कर दियो अर बिनै छोड़ दियो। 28जद बो बठूं जावै हो तो बिंगो दूसरो नोकर भाई मिल्यो झिकै कनूं बण कीं रिपिया लेणा। अर बिंगो गळबो पकड़गे केयो, “बोल मेरा रिपिया कद देसी।” 29जद बो नोकर भाई पगां पड़गे बिनती करी कै मैं होळै होळै भर देस्यूं। 30पण बो मान्यो कोनी। बिनै जेळ में बंद करा दियो जद तांई करजो ना भरदैय। 31दूसरो नोकर ओ सुणगे भोत दुखी होयो अर आ सारी बात राजा नै जा'गे बता दी। 32-33जद बिं राजा नै रीस आ'गी अर केण लागग्यो, “अरै नीच दास, तूं जद बिनती करी तो, मैं तेरो सारो करजो माफ कर दियो। तनै तेरै बेली पर दया कोनी आयी जिंया मैं तनै माफ करयो। 34जद बण राजा बिनै सजा करवा दी कै, जद तांई ओ करजो ना भरदैय। 35ईंखातर जद तांई थे थारै भाई बेलियां नै पूरै मन ऊं ना माफ करोगा तो पिता परमेसर बिंयाई थारै सागै करैगो।”
Избрани в момента:
मत्ती 18: BGQ
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2023 (Active), Wycliffe Bible Translators, Inc. All rights reserved. © WIn Publishing Trust