San Juan 7
7
Jesusiri erachichaksï no jakajkukusti.
1Ísï tátsekua, Jesusi Galilea isï jámaxapti. No uéksïrempti Judea jámani jarhani, jimbokaksï judiouecha uándikukuekaxapka. 2Ka enga judiouecheri Uapajtsïtakuecheri k'uínchekua andamutani jápkia, 3erachi jémbechaksï arhispti:
–Ásï ixujku ja; Judea ni, jurajkuksïni imajtu exeni ambe engari újka, ima engaksïni mintsikajka. 4Jimboka enga nema uéjka eska mítekateuaka nómbema jirikorhetini úsïndi. Engari indeni ambe újka, iámenduechani japarini u.
5Jimbokaksï erachi jémbecha jamberi no jakajkukusïrempka 6Jimajkani Jesusi arhiaspti:
–Jucheti jurhiatarini nótki janochexati, enga úka, chájtsï ambe uéjki jurhiata sési xésïnga. 7Parhakpeni anapuechaksïni no úsïndi chánksïni kurhunheni; jíndentsïni k'óru kurhunhesïndi, jimbokani ji k'amak'amasï xarhatakuasïnga ambe engaksï nósesi niátani jaka. 8Cha ni je k'uíncheni; ji no niuaka, jimboka nótki janosïnga jucheti jurhia.
9Ísï arhiaspti ka Galilea pakaraspti.
Jesusi k'uínchekuarhu nirasti
10Ka engaksï na erachi jémbecha nípkia k'uínchenia, Jesusijtu sïpatekuarhku niraspti ka no xarhatspespti. 11Judiouechaksï k'uínchekuarhu jirinhantaxapti, ka uandasïremptiksï:
–¿Nanixamu jámani jaki ima acheti?
12Kánekua imeri ambe uandatsenhaxapti. Máruksï uandasïrempti: “Sési ambe úristi”; ka máteruksï uandasïrempti: “No sési ambe úsïndi; tandojchpesïndi.”
13Enga úpka, k'uiripuni japarini nónema tekaasïrempti imeri ambe uandani jimbokaksï judiouecheri achamasïchani chérheasïrempka.
14Enga k'uínchekua terumeni jápka, Jesusi k'éri tiósïo inchaspti ka jurhentpeni uénaspti. 15Judiouechaksï ísku pakareratini uandasïrempti:
–¿Néna jámani i xáni uáni ambe míteski, nándi no jurhengua p'iti?
16Jesusi arhiaspti:
–No juchetisti xáni jurhengua engani kámka, imeristi engarini axaka. 17Enga nema uéjka Diósïri eratsekua úni, exeati eka Diósïrika jucheti jurhentperakua o ekani újtsïkorheni jaka. 18Ne enga uandakorhejka, k'érikua jirinhakorhexamti; ka ne enga imeri k'érikua jirinhajka enga axaka, imani ambe uandasïndi enga ísïka, ka nómbema arhikua jukasti.
19“¿Andi nóksïni Moisesisï juramukuani íntsku? Ka k'órujtsï nónema kurhandirakusïnga. ¿Andijtsïnisï uandikukuekajki?”
20Arhisptiksï:
–¡Nóambakitikini incharhetixati! ¿Andi nékini uandikukuekaxaki?
21Jesusi arhiaspti:
–Iamendujtsï ísku pakareraspka ima milagruni jimbo engani [sábadu] úpka. 22Moisesiksïnisï jurajkucheti eskajtsï sapichani ts'iuekuarhu pasïri p'ikujtsïkukuauaka, (nájkiruka no Moisesi jimboeka, tua anapuechani jimboesti) ka chájtsï p'indeska sábadu jurhiatekua ts'iueratichani ísï káani. 23Ekajtsï sábadu jurhiatekua ts'iueritichani mínda jatsikuajka, Moisesiri juramukuanijtsïsï no uékani jurajkuni ísï jámka, ¿Jimajkani andijtsïnisï ikiachejki engani ji achetini sábadu jurhiatekua k'amak'amasï ambakerantaka? 24Ásï nósesi xétspe je ambe ma imani jimbojku eska na xarharanhani janhajka, sési mítetini arhijpe je.
Jesusi uandakorhentaxati néski.
25Máruksï Jerusaleni anapuecha uandani uénaspti:
–¿Andi nóksï ínisï jirinhantani jaki uándikukuekani? 26Nájkichka jimini jakiia uadaxetspeni ka nónema ambe arhisïndi. ¿Óksï juramuticha jiókorhia sési jimbo eska inde Krístueska? 27Ka juchachi míteska inde nani enga anapueka; ka eka Krístu janoaka, nónema míteati ima nani anapueski.
28Jesusi, tiósïo jurhentpeni jatini, uinhachaparini uandasti:
–¡Cháchkajtsïni míteskia anoo! ¡Ka míteskachkajtsïa anoo ji nani anapueski! K'óruni no jutsïkorheska, nemarini axasti enga mintsinharhikueka ka enga cha no míteka. 29Ji míteska imani, jimbokani imeriska ka imarini axasti.
30Jimajkanksï jupikani uékaspti, k'óru nónema tekaaspti, jimboka nótki niárakusïrempka jurhia. 31Uánekuaksï jakajkukuspti, ka uandasïremptiksï:
–Enga ambe Krístu jurhaska ¿Imaxamu sánderu k'érati milagruechani úaua?
Fariseuechaksï Jesusini jupikani uékasti
32Fariseuechaksï mítespti enga Jesusiri ambe uandanhempka; ka imaksï tátecheri urhejtsïkuricha jinguni axaaspti máru tiósïo anapu p'urhejkutichani eskaksï jupikapiringa. 33Jimajkani Jesusi uandaspti:
–Sánderkusïni chánksïni jinguni jauakia, ka tátsekua k'uanhatsentaaka imani jinguni engarini axaka. 34Chájtsïni jirinhantaaka, ka nójtsïni xéntaaka, jimbokajtsï no úaka jima nirani engani ji jauaka.
35Judiouechaksï jimajkani uénaspti kurhamarhperani:
–¿I nanixamu xáni iauani niua, engachi no úaka xéntani? ¿Óxamu judiouecha jinguni niua engaksï máteru iretecharhu irekaka ka no judiouechani jurhendaani? 36¿Ambe arhikuekaxaki enga uandajka: Jirinhantaakajtsïni, ka nójtsïni xéntaaka, jimbokajtsï no úaka nirani jima engani ji jauaka?
Itsï tsípitiri iurhekua
37K'uínchekua k'amarhuni jámani jurhiatekua sánderu k'érispti. Ima jurhiatekua Jesusi anhaxurhitini ka uinhachaparini uandasti:
–Ne emanga k'arhichani jaka, andarhererini ka itsïme, 38ne engarini mintsikajka.
Eska na jataka Karakatarhu: Imeri inchanhetinksï itsï tsípiti iurhekuecha iurheati.
39Indeni uandakua jimbo, arhikuekaxamempti eska ne enga imani mintsïkapiringa Espirituni intsïnhapiringa; ka jimbokachka Espiritu Sántu nótki íntspenhasïrempka, jimboka Jesusi nótki uarhixapka ka tsíntani.
Arhukurhinhasti
40Teruakuni isï janhaspti máru engaksï ísï kurharini uandapka:
–Ístimendiata Diósïri Uandari engachi aiamenhapka.
41Máteruksï uandasïrempti:
–Ístia enga Erakukateka.
Enga úpka, máruksï uandasïrempti:
–Nómbe, ¿Andi Erakukata ua Galilea anapueni? 42Karakata arhisïndi eska Erakukata irecha Dabiri sïrukueuaka, ka eska Beleni anapueuaka, jima enga Dabi anapuepka.
43Ka ísï jimbo, Jesusini jimbo arhukurhinhaspti. 44Máruksï uéksïrempti k'ataperakuarhu páni, k'óru nónema p'árhespti pákuekani.
Juramutichaksï Jesusini no jakajkukusti
45P'urhejkutichaksï niántaspti jima engaksï fariseuecha ka tátecheri urhejtsïkuricha jápka, ka kurhamarheasptiksï:
–¿Andijtsïsï no jua?
46Kuárichaksï mókukorhespti:
–¡Nónema, ka nómeni nema ísï uandasti eska ima!
47Jimajkanksï fariseouecha arhiaspti:
–¿Chájtu jurajkutakorheskia eskaksïni tandojchaaka? 48¿Andi náki juramuti jakajkukuxaki, o náki fariseo jakajkukuxaki? 49Eka úka, ima engaksï no míteka juramukuani, ikimenhaatiksï.
50Nikodemu, enga fariseuepka ka enga nitipka ma xanhari Jesusini uandaxekuni arhiaspti:
51–¿Andi juchaari Juramukua nemani ísku jatini ambe ma nósesi xékusïnki? ¿Andi no urheta kurhajchasïnki ka míteni ambe enga úka?
52Imaksï arhispti:
–¿Andi t'újtu Galilea anapueski? Arhintsïtkiria, ka exeakari eska Galilea anapu nónema Diósïri uandariska.
Uarhiti ísku jándi
53Ka táchani isï nitsïkorhenhantasptia.
Избрани в момента:
San Juan 7: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.