Génesis 14
14
Abrami jurak'uspti Lótini
1Ima jurhiatekua ísï enka Amrafeli, Sinari irecheni jápka, enka Arioki, Elasari irécheni jápka, enka Kedorlaomeri, Elami irécheni jápka, ka enka Tidali, Goimi irécheni jápka, 2iámentu íksï irechecha arhispti Bera, Sodoma anapu irecha, Birsa, Gomorra anapu irecha, Sinabi, Adma anapu irecha, Semeberi, Seboini anapu irecha ka Soari, Bela anapu irecha eskaksï uékasïrempka uarhipeni. 3Íksï Sidimi pákua tánkorhentaspti jima enka k'éri japunta etumarha jaka. 4Témpeni tsimani uéxurhini marhuakusptiksï Kedorlaomerini ka témpeni tanimu uéxurhini jámani, ikiakusptiksï. 5Témpeni t'amu uéxurhini jámani Kedorlaomeri ka irechecha enkaksï imani jinkuni jápka, atasptiksï Refaita anapuecha, Astaroti Karnaimi echeri jimpo, ka atasptiksï Susita anapuecha Jamini echerirhu, ka atasptiksï Emita anapuecha Sabe-Kiriataimi echerirhu, 6ka atasptikï Jore anapuecha, Seiri juátarhu, ka Parani juátarhu jamperiksï niáraspti, jima enka k'arhinteka ka no nema irekaka ját'akutini jaka. 7K'uánhatsentani jamani Eni mispati anapuechani niárakuasptiksï enka Kadesi jaka, ka k'amantskaasptiksï Amalesi ka Amorreo echerirhu enkaksï Jasesoni-Tamari jaka irekani.
8Nirasptiksï kúmani irechecha Sodoma, Gomorra, Adma, Seboími ka Bela anapuecha, ka Sidimi pákua niraspti ka jimaksï urhipespti, 9irecha, Kedorlaomeri, Tidali, Amrafeli, ka Arioki irechechani jinkuni, t'ámuesptiksï irechecha Elami, Goimi, Sinari, Elasari anapu. 10Sidimi pákua kánekua p'orhontespti, jima enkaksï xunhanta jatsirempka, ka enkaksï sïpakorheni jámempa Sodoma ka Gomorra anapu jimaksï uékanhespti, ka máteruechaksï juátarhu niraspti sïpakorheni.
11Enkaksï antapka uarhipeni, iámentu ampeksï pákorhespti Sodoma ka Gomorra anapu, pát'akorhesptiksï t'irekua ampe ka úratakua ampe. 12Lóti enka Abramiri erache jemperi uáp'aniksï jupikata pásptiksï ka iámentu ampeksï euákorhespti, ima jima irekaxaptika. 13Imaksï enkaksï sïpakorhekuapka, ma niraspti Abrami ebreoun aiánkuntani, jima enka Mamre enka urhikua jukaka enka jima irekani jápka, ima enka nípka aiankuntani ima Eskoli ka Aneri erachi jémpespti, íksï tsimani Abrami jinkunispti.
14Enka Abrami mítepka eskaksï márku jempani jupikata paspka, tánantaspti témpeni iumu ekuatse ka témpeni iumu tanimu (318), jántspirichani, ka imechani enkaksï jima antap'enupka, ka nirasptiksï Dani jamperi antankuani. 15Abrami, ka imaksï enkakï imani jinkuni jamani jápka, chúrekua niárakuaspti ka Jobá jamperiksï niraspti antakuani enka Damasco jurhiata antarakuarhu t'irek'antani jaka. 16Márku jempani enka jupikata pánhani jápka euakuantaspti ka imani ampe enka sïpakataksï páni jápka ka nanakechani ka k'uiripuni enkaksï xáni jupikata paani jápka.
Melkisedeki úch'akuraspti Abramini
17Enka Abrami k'uanhatsentani jápka uarhiperatarhu uératini enka na ántapkia Kedorlaomerini ka irechechani enkaksï ima jinkunipka, Sodoma anapu irecha niraspti kúmani Sabe pákua jima imerispti pákua. 18Melkisedeki enka Salemi irechepka ka Diósïri jántspirini, kurhinta ka ubasï itsïrhukata jinkuni erokaspti. 19Ka úch'akuraspti uantaparini:
Abrami eskakini Diósï úch'akuraa
ka ima enka auantechani ka parhakpenini kueraaka,
20K'éri ampe arhikuesti Diósï enka auantarhu anapueka, enkakini jarhuata antani uarhipeni chéti ikiatspirichani ka Abrami témpeni arhutakata jatsikorhekua íntskuspti.
21Sodoma anapu irecha arhispti Abramini:
Jurak'uchearini k'uiripuechani ka pákorhe jatsikorhekua ampe.
22Abrami arhispti: Aiakuska ACHA Diósïni imani enka kuerak'a auantani ka echerini.
23Eskani no ma ampe p'ikuaka enka chétiuaka, ni kuarhachi jóntukua ma, ni piruakua ma, ka nóri uantaaka ji Abramini intsïkorheska jatsikorhekua. 24Imani ampek'usïni p'ikuaka enkaksï t'ireka inte enkaksï jinteni jinkuni jamani jaka, ka intet'uksï p'ikukorheati ampe, Aneri, Escoli, Mamre enkaksï jínteni jinkuni nípka.
Избрани в момента:
Génesis 14: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.