Hechos 4
4
Pédru Juánu jingunksï k'éri tángorhekuarhu pánhasti
1Engaksï Pédru Juánu jinguni uandaxetspeni jápkateru, tátechaksï saduseuecha jinguni ka k'éri tiósïo anapu purhejkuti jingunksï andarheraaspti, 2ka ikiaxaptiksï engaksï Pédru Juánu jinguni jurhentpeni jápka ka aiangpenksï járhani eska Jesusi tsíntaspka. 3Ka jupiasptiksï ka pauandekuarhu jamberiksï ónhaaspti, jimboka ióndakuarhuespkia. 4Ka uánekuaksï jakajkuspti engaksï aiangperakuani kurhapka: Iúmu míli acheticha ísïsptiksï. 5Pauandekua engaksï Jerusaleni tángorhentapka iretarhu anapu urhejtsïkuricha ka achamasïcha ka juramukua jurhentpiricha, 6ka ístu k'éri táta Anasi, ka Kaifasi ka Juanu ka Alejandru ka iámendu engaksï tátecha jingunika. 7Terujkanksï péraspti ka kurhamarheasptiksï:
–¿Néksïni uinhapekua íntskuski o néri jakangurhikua jimbojtsï ísï úski?
8Jiájkani Pédru, Espiritu Sántuni uinirhekorhetini arhiaspti:
–Iretarhu anapu urhejtsïkuricha, ka Israeli anapu tatecha: 9Iásï engachi kurhamarhenhani jáka néna enga p'amenchati ambakentaka, 10mítetini ja je cha ka iámendu Israeli anapuecha, eska Jesusi Nasareti anapueri jakangurhikua jimboeska, ima engajtsï cháparhata ka enga Diósï tsítantaka, imani jimbo i acheti ambakentasti ka cha jinguni ixu jarhasti. 11Jesusi ima tsakapuesti engajtsï cha tsïntsïricha no jaiapanhentaka, enga iásï pítsekuekia. 12Ka nóteru nema jinguni p'ímutantskorhenhasïndi, jimboka Diósï nóteru nemani íntspeska engachi jimbo úaka p'ímutantskorheni.
13Engaksï juramuticha Pédruni ka Juánuni kurhajchaapka eskaksï jarhamekua jinguni uandaspka, ka eskaksï no sïranda arhirispka níksï jánhaskatini, ískuksï pakareraspti eratsentani ka míteantaasptiksï eskaksï Jesusi jinguni jámsïrempka. 14Ka achetinksï exerini enga ambakeranhantapka ka enga anhaxurhitini jápka imecha jinguni, nóteruksï ambe ma úspti arhiparhataani. 15Jiájkanksï tángorhekuarhu petarkorheantaaspti ka mámaru ambeksï 16arhijperaxapti:
–¿Nénachi káua íni achetichani? Jerusaleni anapuechaksï xésti eskaksï k'éri mínda xarhatakuaska, ka nóchi úaka no jiókorheni. 17Eska nóteru i ambe iretarhu uandanhani jáuakateru, ju je chéraani ka ásteruksï nemani ambe arhi óksï Jesusiri jakangurhikua jimbo jurhentpeni.
18Ka uandajpantaasptiksï ka juramukuasptiksï eskaksï nóteru jámapiringa Jesusiri jakangurhikua jimbo uandani ka jurhentpeni. 19Ka Pédru Juánu jingunksï mókukuantaaspti:
Kurhamarhekorhe je, ¿Diósïni jáparini, sési jaki chánksïni kurhajchani o Diósïni? 20Jimbokani jucha no úaka no uandantani indeni ambe engachi jucha xékorheka ka kurhaakorhenchi.
21Ka ménderuksï chéraani uékaspti, jurajkuasptiksï, ka nónanimaru jimboksï úspti úmarheani, iretani jimbo, jimbokaksï iámenduecha k'éri ambe arhisïrempka Diósïni imani ambe jimbo enga úkorhepka. 22Jimboka ima acheti enga mínda jimbo ambakeranhantapka, jukari tsimani ekuatse uéxurhini jatirispkia.
Jakajkuticheri kómakua
23Engaksï Pédru Juánuni jinguni jurajkunhapka, pámpiri jémbechanksï jingunksï niántaspti ka iámendu ambeksï aianguantaaspti ambe engaksï k'éri tátecha ka achamasïchaksï arhiapka. 24Ka imaksï kurhajchaatini, májku k'éri uinhachaspti Diósïni arhini:
“Acha xáni k'éri, t'úeskari Diósï engari auandani ka parhakpenini kueraaka, k'éri japundani ka engateru xáni ambe jima jáka; 25engari chéti jántspiri Dabidi jimbo uandaka:
¿Andisï xáni méntku ísï jánhki,
iretechaksï andisï xáni ísku ambe eratsejki?
26Kúngorhekuntastiksï Diósïni
parhakpeni anapu
irechecha ka juramuticha,
imeri Erakukatani no kurhajchani.”
27“Ka sési jimboksï íni iretarhu, Erodesi ka Pónsio Pilatu no judiuecha ka Israeli anapuecha jinguni chéti erakukatani kungorhekuntaspti; jántspiri Jesusini engari t'u újchakuraka, 28ka ísï jámanksï ústi, engari t'u eratsetini jápka chéti mímixekua jimbo eska úkorhepiringa. 29Iásï Acha, exe ambe engaksïni xáni ambe arhijka, ka sésikua íntsaa chéti jántspirichani eskaksï chéti uandakuani jarhamekua jinguni uandantaaka. 30Xárhata chéti uinhapekuani p'amenchatichani ambakerantaatini ka míndechani ka milagruechani ambe úaparini, chéti erakukata jántspiri Jesusiri jakangurhikua jimbo.”
31Engaksï Diósïni kómarhipkia, jenchespti jima engaksï tángorhentatini jápka, ka iámendu jakajkutichaksï Espiritu Sántuni uinirhekorhespti ka jarhamekua jingunksï Diósïri uandakuani uandantasïrempti.
Jakajkutichaksï márku marhuatasïrendi ambe
32Xánksï uánespti engaksï jakajkupka, májku mintsita jinguniksï jarhaspti, ka májku p'ikuarhenhekua jinguni. Nónema no uinhaasïrempti jatsikorhekua ambe, iámendu ambe iámenduecherispti. 33Ka Jesusiri uandakua párichaksï kánekua uinhapekua jinguni, Acha Jesusiri tsíntskuani uandantasïrempti, ka Diósï kánekua újchakuraasïrempti. 34Imechani jinguni nónema kómu nitamanchakorhesïrempti, jimbokaksï ima enga ambe kángorhempka óksï k'umanchekua ambe jatsikorheni, atarantasïremptiksï ka andakuanksï, 35Jesusiri uandakua párichanksï íntsasïrempti. Ka eskamendu na uétarhechanhani japiringa ísï arhukunhasïrempti. 36Jiájkani Jose, enga Lebiri sïruku jémbepka ka Chípre ómekuarhu anapueni, engaksï Jesusiri uandakua páricha Bernabe arhimpka (enga arhikuekajka “Karhuakpiri”), 37echeri ma kángorhesïrempti ka atarantaspti ka tuminani Jesusiri uandakua párichani íntsaspti.
Избрани в момента:
Hechos 4: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.