Hechos 2
2
I. AMBAKITI AIANGPERAKUA JERUSALENI UANDANHANTASTI
Espiritu Sántu kétsesti
1Penteskostesïri k'uínchekurhu jimboksï iámenduecha tángorhentatixapti. 2Ka mátirku auandarhu uératini nósesi kúspuspti, eska ambe uinhamu tarhiani, ka méntku k'umanchekuarhu xamantskantaspti jima engaksï ima jápka. 3Ka katambeni járhati chpíririksï xarharaspti ka etsakurhisptiksï, ka mándani arhisptiksï imechani andajtsïkueraani. 4Iámenduechani Espiritu Sántu andajtsïkueraaspti, ka uénasptiksï máteru uandakuechani jimbo uándani, ísï eska Espiritu na uandarauempka.
5Ka Jerusalenksï irekaxapti máru judiuecha, kánekua jakajkuticha engaksï iápuru ísï uératini jútipka. 6Imani xamanguntskuani kurhanhatini uánekua tángorhenhantaspti, ka ískuksï pakareraspti, jimbokaksï táchani kurhajchakorheaxapka imecheri uandakua jimboksï uandani jarhani. 7Ískuksï jarhaspti eratsentani ka uandasïremptiksï:
–¿Andi íksï no Galilea anapuecheski engaksï mámaru uandani jaka? 8¿Néna jimbochisï kurhangukuani jaki imani uandakuani engachi jucha sapirintki uandajka? 9Ixuchi jarhaska Pártosï anapuecha ka Médosï anapuecha ka Elami anapuecha, ka jucha engachi Mesopotamia irekaka; ka Judea ka Kapadosia ka Pónto ka Ásia, 10ka Frígia ka Panfilia ka Ejiptu ka Áfrika ísï, ka Sirene jini sánderu ísï, ka Róma anapuecha engaksï ixu irekani jaka; 11máruksï judiouesti ka máruksï judio úkorhentasti. Ka ístuksï ixu jarhasti Kréta anapuecha ka Arabia anapuecha, iámenduechachi kurhajchakorheaxaka engaksï juchari uandakua jimbo, Diósïri k'éri ambekueri ambe uandani jaka.
12Iámenduksï ísku pakareratixapti ka mámaru ambeksï eratsexapti ka arhijperasïremptiksï:
–¿I ambexamu arhikuekajki?
13Ka máteruksï arhinhchaasïrempti:
–Íksï kauirixati.
Pédru uandasti
14Ka Pédru, jauaraspti máteru témbeni ma Jesusiri uandakua párichani jinguni ka uinhamu uandaspti: “Judiouecha, ka iámendu engajtsï Jerusaleni irekorheka: Sési mítetini ja je íni ambe, ka kurhajtsïni je ambe engaksïni arhiaka. 15Íksï no kauirixati eskajtsï cha na eranhaskani jaka, nóchka xarheniski andi. 16Ísï ima ambeti enga Diósïri uandari Joeli uandaka:
17Diósï uandasti:
Jiájkani engaksï jurhiatekuecha k'amarhuni jámaaka,
jucheti Espirituni k'uiripuni andajtsïteraaka,
ka chári uátsïtichaksï
Diósïri ambe uandajtsïkpeaati;
chári tumbichaksï jánhaskaati,
ka tata k'ératichaksï tsánharhiati;
18sési jimbo ji jucheti jántspirichani,
ima jurhiatekuechani jimbo
Espirituni andajtsïterauaka
ka uandajtsïkujpeatiksï.
19K'érati míndechani xarhatauaka auandarhu,
ka parhakpeni iurhiri ka chpíri
ka kánekua sïraata.
20Tata jurhiata pájpakaxeati,
ka nana kutsï iurhirkuentaati,
enga nótki niárani jauaka
Acheri k'éri jurhiatekua.
21Ka ima engaksï Achani kómarhiaka,
p'ímutanhantaatiksï.#2.21 Joeli 2.28-32.
22Kurha je íni ambe Israeli anapuecha, engani uandani jámka: Jesusi Nasareti anapu imesti, engaksïni Diósï erakucheka, ka imaksïni Diósïni jimbo, k'éri ambe, ka míndechani ambe xarhatachesti eskajtsï cha na mítetini jáka; 23ka indenksï intsïnharhitpesti ísï eska na eratsekata jápka, eska Diósï na eratsetini jápka; ka uándikutarkorheskajtsï cháparhatarkorheparini nóambarhati k'uiripu jimbo. 24Ka Diósï tsítantasti, ka kénditakusti uarhikueri p'amekuani, jimboka uarhikua no úpiringa andani. 25Jimboka irecha Dabi, Jesusini arhikuekani uandasti:
Ji exeni jarhasïnga
eskarini jucheti Acha urhechepasïnga,
jimbokarini jurhijkandani pámbexaka,
ka nómbemarini úati andani.
26Jimbosï jucheti mintsita tsípejti,
ka andanhentasïnga pirekuni,
ka ji kánekua mintsikaparini irekaaka,
27jimbokari no uarhiricha jinguni jurajkuaka,
ka no jurajkuati eska chéti erakukata teretseaka.
28Xéraaskarini xanharichani
enga sési irestpejka,
ka ji kánekua tsípeaka
engakini exeni jauaka.”#2.28 Pir 16.8-11
29“Tatecha ka nanecha, jurajkuksïni jurhimbitku arhini, eska irecha Dabi uarhiska ka jatsinhantasti, ka jima enga jántaka, útasteru jima jarhasti. 30Enga ima Diósïri uandarini jápka, mítetixapti eska Diósï aiakutixapka sïrukua jémbani ma irechetarani, 31sési eranguntatini, Dabi, Krístueri tsíntskueri ambesï uandapti, eska Jesusi no uarhikuarhu pakarapiringa ka eska no téretsepiringa. 32Ka Diósï Jesusini tsítantasti, ka indeni ambe jucha exekorheska. 33Enga Diósï Jesusini p'íkuntapka, t'irejkandani pérasti, ka ima p'irasti Espiritu Sántuni enga Tátjemba íntskupka ka Jesusijtsïni juchantsïni andajtsïterasti, indesti engajtsï exeni jaka ka kurhani jaka. 34No Dabisï kénchentati, nóchka ima ísï uandaspki andi:
Acha Diósï arhisti jucheti Achani,
jurhijkandarini uaxakachetini ja,
35ekakini jamberi jatandutauaka
imechani engaksïni kurhunhejka.”#2.35 Pir 110.1
36“Mítetini jaueksï Israeli anapuecha, eska Jesusini engajtsï cháparhataka, Diósï újchakurasti ka Acha ústi.”
37Ísï kurharinksï kánekua jáarhaspti ka Pédrunksï ka máteru Jesusiri uandakua párichanksï arhiaspti:
–Tatecha, ¿Jucha nena jámaa?
38Ka Pédru arhiaspti:
–Diósïni andarhentsï je ka Jesukristuni jimbo itsï atajtsï je, ka k'amanharhintskuechantsï púamenhantaaka, ka Espiritu Sántuntsï p'iuaka. 39Jimboka i, ima aiatsperakueska engajtsï cha ka chári uátsïticha ka iámendu engaksï iauani anapuecha aiamenhaka. Arhikuekasïndi, eska imecheriska enga juchari Acha Diósï uékaaka ioarhiani.
40Pédru íni ambe ka uánekua ambeteru arhiaspti ka útasteru arhiaspti:
–¡Ásteru nósesi ireke jeia!
41Ka ima engaksï uandakuani kurhanguntapka, itsï atajtsïkunhasptiksï ka ima jurhiatekuaksï tanimu míli isï jakajkuticha jingunisptia. 42Ka Jesusiri uandakua páricheri jurhentperakuanksï sési marhuatasïrempti, ka iámenduechaksï márku marhuataxapti ambe, t'ireni jámani ka uandamukukorheni jámani.
Jakajkutichaksï uánexapti
43Iámenduechaksï ísku pákareratixapti, ka Jesusiri uandakua párichaksï uánekua míndechani ka k'éri ambeksï úsïrempti. 44Ka ima engaksï jakajkupka májkuksï úkorhentatixapti, ka iámenduechaksï jatsikorhekua ambe márku marhuatasïrempti; 45ambe engaksï xáni kángorhempka, atarantasïremptiksï ka ísïksï arhukuntasïrempti eskaksï nájku ambe uéntarhinchani jápiringa. 46Mándani pauanksï tiósïo tángorhentasïrempti, ka k'umanchekuarhuecharhuksï kurhinda márku ústasïrempti, ka márkuksï t'iresïrempti tsípekua jinguni ka sési jásï mintsita jinguni. 47Diósïnksï k'éri ambe arhiparini, ka iámenduechaksï sési erauasïrempti. Ka Acha mándani pauani uáneraaxapti imechani engaksï p'ímutantskorhepiringa.
Избрани в момента:
Hechos 2: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.