Hechos 12
12
Pédru ónhanhasti
1Imani jurhiatekuechani jimbo, irecha Erodesï máru jakajkutichani jupiaspti kuikirhiani. 2Ka Santiaguni, Juánueri erachi jémbani uandikutarkorhespti. 3Judiouechani exearini eskaksï íni ambe kánekua jaiapanhentaspka, Pédruntu Páskueri k'uínchekuarhu jupirkorhespti. 4Ka k'ataperakuarhu incharaspti, ka témbeni k'uímu p'urhejkutichani kuáritaaraxapti, jimboka k'uínchekua Páskueri nimatirku Pédruni iretani xarhatakuntani uékaxapka. 5Pédrunchkaksï k'ataperakuarhu jatsispti, k'óruksï jakajkuticha no jurajkuntaxapti Pédruni kómarhijpekuni.
Pédru k'ataperakuarhu pétanhasti
6Enga Erodesi Pédruni petakuekani jámempkia, Pédruni chúrekua k'uíxapti ka tsimani purhejkutichaksï mándani akandani jakuspti, ka tsimapuru tiámu tepekata jimbo jójkukata jarhaspti, ka ístuksï tsimani p'urhejkuticha k'ataperakuarhu anhamukuspti kuáni. 7Ka jimajku Acheri ánjeli ma xarharaspti ka k'ataperakuarhu kánekua t'íkjantskaraspti.
Ánjeli Pédruni p'áxukuspti ka enga tsínharhitapka arhispti:
–“Jauara kókuani.” Ka tiámuechani chkéjkurhantaaspti. 8Ka ánjeli arhispti: “Xukuparhantsï ka kuarhachichani jónduantsï.” Ka Pédru sóntku ísï úspti, ka ánjeli arhisptiteru: “Xukuparhantsï ka chúxapurini.”
9Ka Pédru ánjelini chúngumaspti uéntani, méntku no úsïrempti jánhaskani eska ísïspka ambe enga ánjeli úni jápka, sánderu sáni tsánharhikueni jánhaskaxapti. 10Ka p'urhejkutichani máru uanonhaskaaspti ka máteruechantu, k'ataperakuarhuksï andamukueraspti enga tiámu jimbo míkorhempka, ka jima jandiojku jatini mítakorhespti. Ka iretarhu inchaakuntaspti, ka ma ambokuta xanharaspti ka ánjeli jima kéndikukuspti.
11Pédru ambonhaskantaspti ka uandaspti: “Iásï kurhanguska eskarini Acha ánjelini jémbani axacheska engani Erodesïni úka uéjkuni ka uérakuni ambe engaksï judiuecha erokorheni jápka.”
12Ka enga úpka sési jánhaskantani Mariauo niraspti, Juánu Márkusïri amambo; jima enga uánekua tángorhenhantatini jápka uandamukukorhenhani.
13Ka Pédru uámutaspti ka jántspiri ma kurhakorhespti enga Rode arhinhempka, 14enga ima Pédruni míchakupka, xáni tsípeni k'uanhajpatsespti aiangpentani eska Pédru jamukutini jarhaspka ka no jamberi mítakuspti.
15Ka arhintasptiksï:
–¡Nájtumendu ísï, jánhaskandi jaka!
Ka ima inchandimentaspti uandani eska jindespka. Ka imaksï arhintaspti:
–Ánjeli jémbeti.
16Ka Pédru uámutaxaptiteru. Mítatinksï exespti ka ískuksï pakareraspti. 17Ka Pédru níjkurhakuaspti eskaksï pínasku japiringa, ka tátsekua aianguantaaspti na enga Acha k'ataperakuarhu petapka. Ka uandasptiteru:
–Íni ambe Santiaguni ka erachichani aianguantsï je.
Ka tátsekua uéntaspti ka máteru nani isï niraspti.
18Enga na erandepkia, p'urhejkutichaksï mámaru ambe arhijperantaxapti Pédru nénaxamu nípi. 19Jiájkani Erodesi jirinhatarkorhentaspti ka engaksï no úpka xéntani, p'urhejkutichani uándikutarkorheaspti. Tátsekua Erodesï Judea uératini Sesarea kétsemaspti ka jima pakaraspti.
Na enga Erodesï uarhika
20Erodesï Tíro ka Sidoni anapuechani kánekua ikiakuaxapti, jimesï anapuechaksï k'óru Blástusïni andajtsïteraaspti. Ima ireche Erodesïri ambe patsarispti, ka arhisptichkaksï eskaksï sési pájperapiringa jimbokaksï ima t'irekua, irecheri echericharhu tánakorhesïrempka. 21Imani jurhiatekua enga Erodesï p'itajkorheapka, irecheni xukuparhantaspti ka imeri k'éri uaxantskuarhu uératini uandontskorhekuaxapti. 22Jiájkaniksï uénaspti uínhachakuni: “¡No k'uiripusï ma uandani jati, Diósïsï uandani jati!” 23Ka Diósïri ánjeli ma Erodesïni jimajku uándikuspti, jimboka no Diósïni no k'éri ambe arhispka; ka karhasï ántskata uarhispti.
24Ka Acheri uandakua mítekorhepaxapti ka uánenhaxapti.
25Bernabeksï Sáulu jinguni, Jerusaleni uératini kuanhatsentaspti engaksï imecheri ánchekorhetani k'amarapka, ka Juánu Márkusïnksï pájtaspti.
Избрани в момента:
Hechos 12: BI-PURHE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Biblia en P´urhépecha, Michoacán, México © Sociedad Bíblica de México, A.C.