यूहन्ना 17
17
अपन लग येशूक प्राथना
1येशू अपन चेलनसे यी बात कहिके सेक्लाँ ते उप्पर स्वर्ग ओहोँर हेरके कलाँ, “हे बाबा, उ समय आसेकल बा, अपन छावाहे महिमित करदे ताकि छावा फेन तुहिहे महिमित करे। 2काकरेकी तैँ उहिहे सक्कु मनैनके उप्पर अधिकार देहल बते, ताकि ऊ ओइन्हे सदाकालके जीवन देहे, जेनहे तैँ ओकर हाँथेम देले बते। 3सदाकालके जीवन यहे हो, कि मनै एक्केथो किल सच्चा परमेश्वरहे चिन्हिँत, और तोरिक पठाइल येशू ख्रीष्टहे चिन्हिँत। 4जोन काम तैँ महिन्हे देले, उहिहे पूरा करके मै तुहिहे पृथ्वीमे महिमित बनाइल बतुँ। 5और हे बाबा, आब अपन हाजिरीमे महिन्हे महिमित पारदे, वहे महिमा जोन संसारके सृष्टि हुइनासे आघे मोरिक थेन रहे, जब मै तोरिक संग रहुँ।”
चेलनके लग येशूक प्राथना
6येशू कलाँ, “जोन मनैनहे तैँ संसारमे मोरिक हाँथेम देले, ओइन्हे मै तोरिक बारेमे बतैनु कि तैँ के हुइते। ओइने तोरिक रहिँत, और तैँ ओइन्हे मोरिक हाँथेम देले रहिस, और ओइने तोरिक शिक्षा पालन करल बताँ। 7आब ओइने जानलेले बताँ कि, ज्या चिज तैँ महिन्हे देले बते, उ सक्कु चिज तोरिक थेनसे आइल। 8काकरेकी जोन सन्देश तैँ महिन्हे देले, मै ओइन्हे बतादेनु और ओइने उ सन्देशहे स्वीकार करलाँ। जात्तिक ओइने जानलेले बताँ कि मै तोरिक थेनसे अइनु, और महिन्हे तहिँए पठैले कहिके ओइने विश्वास कर्ले बताँ। 9मोरिक प्राथना ओइन्के लग नै हो, जेकर संसारसे सम्बन्ध बतिन। पर ओइन्के लग हो जेने तोरिक हुइँत, और जेनहे तैँ मोरिक हाँथेम देले बते। काकरेकी ओइने तोरिके हुइँत। 10और जोन मनै मोरिक हुइँत, उ सक्कु जाने तोरिके हुइताँ। और जेने तोरिक हुइँत, उ मोरिक हुइताँ। मोरिक महिमा ओइन्से प्रकट हुइल बा। 11आब मै यी संसारमे नै रहम, और मै तोरिक थेन आइतुँ। पर मोरिक चेलनके जेनहे तैँ महिन्हे देले बते, ओइने अभिन फेन संसारमे पलिबताँ। हे पवित्र बाबा, अपन शक्तिसे ओइन्हे सुरक्षित धार। ताकि ओइन्के फेन एक्के मन हुई सेकिन, जसिके हमार फेन एक्के मन बा। 12जबसम मै ओइन्के संग रहुँ, तैँ महिन्हे देलक तोरिक नाउँमे ओइन्हे सुरक्षित धर्नु। मै ओइन्के रक्षा कर्नु। और ओइन्मेसे एकथो भटकके चलगिल, ओकर बाहेक दोसुर केऊ फेन नाश नै हुइल, ताकि पवित्र शास्त्रमे ज्या लिखल बा उ पूरा होजाए। 13पर आब मै तोरिक थेन आइतुँ। और संसारमे रहलमे यी बात मै बोलतुँ, ताकि ओइने मोरिक आनन्दहे पूरा रुपमे भेटाई सेकिँत। 14मै ओइन्हे तोरिक सन्देश देनु, पर संसारके मनै ओइन्हे घृणा करलाँ। काकरेकी जसिके मोरिक संसारसे कौनो सम्बन्ध नै हो, ओस्तेके ओइन्के फेन संसारसे कौनो सम्बन्ध नै हुइतिन। 15तैँ ओइन्हे संसारमेसे लैजा कहिके मै प्राथना नै करम, पर ओइन्हे शैतानसे सुरक्षित धारदिस। 16जसिके मोरिक संसारसे कौनो सम्बन्ध नै हो, ओस्तेके ओइन्के फेन संसारसे कौनो सम्बन्ध नै हुइतिन। 17तोरिक वचन सच्चा बा। तबेकमारे ओइन्हे तैँ सच्चाइसे पवित्र बनादे। 18जसिके तैँ महिन्हे संसारमे पठैले, ओस्तेके मै फेन ओइन्हे संसारमे पठाइल बतुँ। 19ओइन्के भलाइक लग मै अपनेहे पवित्र बनैथुँ, ताकि ओइने फेन सच्चाइसे पवित्र बनाजाँइत।”
सक्कु विश्वासीनके लग येशूक प्राथना
20येशू कलाँ, “मै यी चेलनके लग किल प्राथना नै करथुँ, पर ओइन्के लग फेन करथुँ, जेने यनके देहल सन्देशसे मोरिकमे विश्वास करहीँ। 21ताकि ओइने सक्कु जाने एक हुई सेकिँत। जसिके हे बाबा, तैँ मोरिक संग एकतामे बते और मै तोरिक संग एकतामे बतुँ। ओस्तेके ओइने फेन हमार संग एकतामे होजाँइत, और तैँ महिन्हे पठैले कहिके संसारके मनै विश्वास करिँत। 22जोन महिमा तैँ महिन्हे देले बते, वहे महिमा मै ओइन्हे देले बतुँ, ताकि जसिके हमार मन एक्के बा, ओस्तेके ओइन्के मन फेन एक्के होजाइन। 23तैँ मोरिकमे और मै ओइन्केमे बतुँ ताकि ओइने पूरा रुपमे एक होजाँइत। जिहिसे संसारके मनै यी जानलिँत कि तहिँए महिन्हे पठैले, और तैँ ओइन्हे ओस्तेहेँ प्रेम कर्ले, जसिके महिन्हे कर्ले। 24हे बाबा, मै चहथुँ, कि तैँ जोन मनैनहे मोरिक हाँथेम देले, ओइने मोरिक संग वहैँ रहिँत, जहाँ मै बतुँ। ताकि ओइने मोरिक उ महिमा देखिँत, जोन महिमा तैँ महिन्हे देले बते। काकरेकी संसारके सृष्टि हुइनासे पैलेहेँ तैँ महिन्हे प्रेम कर्ले। 25हे धार्मिक बाबा, संसारके मनै महिन्हे नै चिहिन्लाँ। पर मै तुहिहे चिहिन्नु, और यी चेलनके फेन चिहिन्लाँ कि महिन्हे तहिँए पठैले। 26और मै ओइन्हे जनैनु कि तैँ के हुइते। और जनैती रहम कि जोन प्रेम तैँ महिन्हे कर्ले, वहे प्रेम ओइन्के संग पलिरहे, और मै पवित्र आत्मक रुपमे ओइन्केमे पलिरहुँ।”
Избрани в момента:
यूहन्ना 17: DVGNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.