यूहन्ना 20
20
खाली कब्र
(मत्ती 28.1-8; मरकुस 16.1-8; लूका 24.1-12)
1हप्ते री पहिली धियाडी मरियम मगदलीनी दोती निहारे हुंदे ही कबरा सेटा बे आई, होर कब्रा का पाथर सकेऊ दअ हेरू। 2तेबा त्या ठुरी होर सिमोन पतरस होर तेऊरे दूजे चेले सेटा बे जासू संघे यीशु प्रेम डाहंदा थी, इछी करे बोलू, त्याहे प्रभु कब्र मेज़ा का काहडी नीऊं, होर हामें नांई ज़ाणदे कि सह कंई डाहू। 3तेबा पतरस होर सह दूजअ चेलअ निखल़ी करे कब्रा फेरा बे चली। 4त्या दुहे संघे -संघे ठुरदे लागदे तिही, पर दूजअ चेलअ पतरसा का जेह बढ़ीकरे कब्रा सेटा पहिले पुजू; 5होर झुकी करे झिकड़े पड़ी दे हेरी, तेबा भी सह मितर नांई नाठअ। 6तेबा सिमोन पतरस तेऊ पीछे-पीछे पूजी, होर कब्रा मितर नाठअ होर झिकड़े पड़ी दे हेरी; 7होर सह अंगोछा जोह तेऊरे मुंडे अंगोछअ बानू दअ थी, झिकड़े संघे पडू दअ नांई, पर अलग जागहा में लपटी करे डाहु दअ हेरू। 8तेबा दूजअ चेलअ भी जोह कब्रा में पहिले पुजू, मितर नाठअ, होर हेरी करे बुशाह करू। 9त्याह ऐबरे तणी पवित्र शास्त्रा री तेसा गला नांई समझी, कि तेऊ मुएंदे मज़ा का जिऊंदअ हूँणा। 10तेबा त्या चेले घरा बे बापस नाठे।
मरियम मगदलेनी पेंदे प्रकट हूँणा
(मत्ती 28.9,10; मरकुस 16.9-11)
11पर मरियम लेरा लाउंदी कब्रा सेटा बाग़े ही खड़ी रही, होर लेरदे-लेरदे कब्रा फेरा बे झुकी करे, 12दुई स्वर्गदूत शेते झिकड़े बान्हीं दे एक शरहणे होर दूजअ जागा फेरा बे हेरु, जखे यीशु रअ शव डाहू दअ थी। 13त्याहे तेसाबे बोलू, हे नारी, तूह लेरदी किबे लागी? तेसे तयाबे बोलू, त्याहे मेरअ प्रभु चुआकी नीऊं होर हाऊं नांई ज़ाणदी कि सह कई डाहू। 14यह बोली करे पीछे मुड़ी होर यीशु खड़दअ हेरू पर नांई पछेणु कि यीशु साहा। 15प्रभु यीशु तेसाबे बोलू, हे नारी, तूह किबे लेरा? कासु लोडी लागी दी? तेसे माली समझी करे तेऊबै बोलू, हे महाराज, अगर तांई सह चुआकू तेबा महा बे खोज़ कि सह कई डाहू, होर महा सह निणअं। 16यीशु तेसाबे बोलू, मरियम! तेसे पीछे मुड़ी करे तेसे इब्रानी में बोलू, रबुनी! मतलब हे गुरु। 17यीशु तेसाबे बोलू, महा नांई छुंऐं किबेकि हाऊं ऐबर तणी बापू सेटा बे उझे नांई नाठअ, पर मेरे भाई सेटा बे नाहीं करे तयाबे बोल, कि हाऊं आपणे बापू होर थारे बापू, होर आपणे परमेश्वर होर थारे परमेश्वर सेटा बे उझे नाहंदा। 18मरियम मगदलीनी नाहीं करे चेले बे खोजू, मांई प्रभु हेरू, होर तेऊ मांई संघे या गला करी।
चेले पैंदे प्रकट हूँणा
(मत्ती 28.16-20; मरकुस 16.14-18; लूका 24.36-49)
19तेसी धियाड़ जोह हप्ते री पहिली दिहाड़, बयाल्के वक्ते जेबा तखले दुआर ज़खे चेले यहूदी री डरे बन्द होई दे थी, तेबा यीशु आउअ होर त्याह मेंझ खडअ होई करे त्यावै बोलू, तमा शांति भेटे। 20होर यह बोली करे तेऊ आपणे हाथ होर पसली तयाबे रिहाई। तेबा प्रभु हेरी करे चेले खुश होई। 21यीशु तयाबे भी बोलू, तमा शांति भेटे; जेडअ बापू हाऊं भेजुदअ तेड़े ही हाऊं भी तमा भेज़ा। 22यह बोली करे तेऊमें फुकरू होर तयाबे बोलू, पवित्र आत्मा निआं। 23ज़ासके पाप तमे क्षमा करा, त्यारी तणी क्षमा करी दे साहा; ज़ासके तमे डाहा, त्या डाही दे।
थोमा पैंदे प्रकट हूँणा
24पर बारा मेंज़ा का एक, मतलब थोमा जोह दिदुमुस कहलाउंदा, जेबा यीशु आउअ तेबरे सह त्याह संघे नांई थी। 25जेबा होरा चेले तेऊबै बोलदे लागे, हामे प्रभु हेरू तेऊ बोलू जेबरे तणी हाऊं तेऊरे हाथा में किला रे छेद नांई हेरे, होर किला रे छेदे आपणी गुठी नांई पाए, होर तेऊरअ हाथा में आपणें हाथ नांई पाए, तेबरे तणी महा बुशाह नांई करणा। 26आठा धियाड़े बाद तेऊरे चेले घरा मितर, होर थोमा त्याह संघे , होर दुआर बन्द, तेबा यीशु आउअ होर त्या मेंझ खड़े होई करे बोलू, तमा शांति भेटे। 27तेबा तेऊ थोमा बे बोलू, आपणी गुठी अखे आणी करे हेर होर आपणें हाथ आणी करे मेरे हाथा में पाआ, होर अबिश्बासी नांई पर बुशाह करने आलअ हो। 28यह शूणी करे थोमा उतर दिंना, हमारे प्रभु हमारे परमेश्वर! 29यीशु तेऊबै बोलू तांई हाऊं हेरुदअ साहा, कैह ऐतकी तणी बुशाह करूदा? धन्य त्या साहा जूणी बिना हेरे बुशाह करू।
एसा कताबा रा उदेश्य
30यीशु होर भी बहू चिन्ह चेले रे सामने रिहाई, जोह एसा कताबा में नांई लिखी; 31पर या एतकि तणी लिखी तमे बुशाह करा कि यीशु ही परमेश्वरा रअ शोहरू मसीह साहा, होर बुशाह करी करे तेऊरे ना का जीबन पाए।
Избрани в момента:
यूहन्ना 20: ISJNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.