Nugana 6
6
‘UPWA 6.
1Ta gete ‘i apwesa, ni‘atu tomota si enugana be si saila bwa‘a matanaia, ta natudi mewainedi si tubua ‘edia, 2ga Eaubada natunao me‘olotodi tomota natudiao mewainedi si ‘itedi ‘aene ‘adi ‘ita bobo‘ana; ta iauiaudi si ‘ita‘esi‘esinuedi ‘ediega mwanediao ‘ediega si ‘ewedi. 3Ta Ieoba ‘i ona, Iaruiaruagu gea‘abo tai ‘ena ‘i da loina ‘ataia, tauna wate ‘i eesio ta ‘enega: ta ‘enega ‘ana tuta ‘i da iakwara wani anaredi ta tweniti. 4To didiga bare‘uia si miami tuta gote, ta wate muriega, ‘ena Eaubada natunao me‘olotodi tomota natudi mewainedi ‘edia si rugu, ta mewainedi gogama si enatunedi ‘edia: taudi gete tai waiwai to mia lowaenei, tai nidi ‘adi esana ‘arena ‘i apwesa. 5Ta Ieoba i ‘itena tai ‘ina bubuna to‘umalina ‘i sinabwa bare‘uia, ta ‘atena ‘ina nuanua iauiauna ‘i to‘umali daita tuta iauiauna. 6Ta Ieoba nuana i ‘ebunina tai ‘i bubuna bare‘uia manuna, ta ‘atenega i ‘elo‘uia. 7Ta Ieoba ‘i ona, Tai ni‘atu ia mweruruina bwa‘a matanega ia da elosaooridi; tomota be, bomitawa be, iage ‘i lookawara be, mwatui manuina be; ia nuaebuni ia bubudi manuna ta ‘enega. 8Ta Noa nua‘ole‘ole ‘i lobena Ieoba matanaia.
9Noa ‘ina ‘ebetubua getedi. Noa tai adelina paruparuna, ta ‘ana epatao ‘edia ‘i bobo‘ana maibo‘ana: Noa Eaubada a‘ieana si lopilidadana. 10Ta Noa natunao me‘olotodi ‘e toi, Sema, Ama, Iapeta. 11Ta bare‘u ‘i to‘umali Eaubada matanaia, ta bare‘u ‘i maa toitoilega. 12Ta Eaubada bare‘u i ‘itena, ta, wa ‘ita, ‘i to‘umali; esio iauiauna ‘ina bubuna ni‘atu si gieto‘umaliena bare‘uia ta ‘enega.
13Ta Eaubada Noa ‘ena ‘i ona, Mataguia esio iauiauna ‘adi ‘ebelosaroni ni‘atu ‘i mai; bare‘u ‘i maa bubuna toilega ‘ediega ta ‘enega; ta, wa ‘ita, bare‘u ma‘enao ia da loesawaridi. 14‘Emuia waga kaiwe gopera ‘u da bubu; anua ‘u da bubudi waga nina ‘enaia, ta ‘u da bwada bwadega gamwanega ta guaunega. 15Ta gete nadigega ‘u da bubuna: waga ‘ana dudura kubita ‘e teri anaredi, ‘ana bababa kubita ‘e pipiti, ta ‘ana gitu‘etu‘e kubita ‘e tati. 16‘Ebema‘edana ‘e bweu ‘u da bubuna waga ‘enaia, ta kubita ‘e bweuna ‘ena ‘u da loegumwarina ‘etanega; ta waga ‘ana ‘awa ‘u da sa‘una deideinega; ma‘ana sea‘upa ‘ubunaia, ta ‘e ruena, ta ‘e tonina ‘u da bubuna. 17Ta ‘abo‘agu, u ‘ita, boasi murua ia da me‘ena bare‘uia, esio iauiauna ‘i da lo‘esaoori, ‘ena iawasidi ‘i miamiana, garewa ‘agaraunaia ‘enega; iage iauna bare‘uia ‘i miami ‘i da mwawasa. 18Ta ‘igu ona‘upa‘upa ‘emuia ia da sa‘u ‘ai‘aili; ta ‘oio waga ‘ena ‘u da mai, ‘oio be, natumuao me‘olotodi be, mwaneio be, natumuao mwanediao be. 19Ta esio iauiauna ‘ediega iage maiawasidi iauna ‘enega iage ‘e bweuna ‘e bweuna ‘enega ‘e rua ‘u da me‘edi waga ‘enaia, be ma‘emuao wa da bobo‘ana; me‘olotona ta mewainena. 20Manua ‘ediega adelidi nadigega, iobai adelidi nadigega, bwa‘a ‘ina iage lookawaridi iauna ‘enega adelina nadigega, iage ‘e bweuna ‘e bweuna ‘e rua ‘emuia si da mai, be ‘u da ‘ita‘i‘isidi be si da bobo‘ana. 21Ta masura si ‘e‘ani iauna ‘u da ‘ewa ‘emuia, ta ‘emuia ‘u da egogone; ga ‘i da masura manuio, ta manudi. 22Nadigega Noa ‘i guinua; na‘ieana iage iauiauna Eaubada ‘ena ‘i onaona, nadigega ‘i guinuena.
Избрани в момента:
Nugana 6: DOBOT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the British and Foreign Bible Society in 1919