Nugana 17
17
‘UPWA 17.
1Ta ni‘atu Aberamo ‘ana tuta iakwara ‘e naineti‐naine, ga Ieoba Aberamo ‘ena ‘i apwesa, ta ‘ena ‘i ona, ‘Abo‘agu Eaubada Toewaiwaisana; mataguia ‘u da tauia, ta ‘u da bobo‘ana maibo‘ana. 2Ta ‘igu ona‘upa‘upa ia da bubuna ‘eguia ta ‘emuia, ta ia da gieiauiemu sinabwana. 3Ta Aberamo ‘i be‘u sanamwa‘uta: ta Eaubada ‘i onaona ma‘ieana, ‘i gwae, 4Manugu, u ‘ita, ‘igu ona‘upa‘upa ma‘ieaio, ta ‘oio ‘u da ‘asa e iau‘ena‘ina tamadi. 5Ta gea‘abo wate ‘amu esana Aberamo ta ‘amu esana i da Aberaamo; ni‘atu ia bubuio ‘asa iau‘ena‘ina tamadi ta ‘enega. 6Ta ia da bubuio be ‘u da uaua sinabwana, ta ‘ebeloinao ia da bubudi ‘emuiega, ta kiniao ‘emuiega si da apwesama. 7Ta ‘igu ona‘upa‘upa ia da sa‘u ‘eguia ta ‘emuia ta tubumuao murimuia ‘idi epatatomota ‘edia be ‘i da ona‘upa‘upa ‘ataia, be ia da Eaubada ‘emuia ta tubumuao murimuia ‘edia. 8Ta ‘asa nina ‘imu ‘ebetauia dadana, ‘asa Kanania maibo‘ana, ia da ‘ebwaemu, ta tubumuao murimuia ‘edia, ‘egu‘eguia ‘ataia manuna; ta ‘abo‘agu ia da e ‘idi Eaubada. 9Ta Eaubada Aberaamo ‘ena ‘i ona, Ta manuio, ‘oio ‘igu ona‘upa‘upa ‘u da ‘ita‘i‘isi, ‘oio, ta tubumuao murimuia ‘idi epatatomota ‘edia. 10Gete ‘igu ona‘upa‘upa, tauna wa da ‘ita‘i‘isi, ‘eguia ta ‘emuia ta tubumuao murimuia ‘edia; me‘olotodi iaudi ‘emia ‘i da daba. 11Ta bwarami matana esiona wa da daba; ta ‘i da ona‘upa‘upa ‘ana we‘iwe‘iiaia ‘eguia ta ‘emia. 12Ta tauna ‘ana tuta asiata ‘e eta ‘emia ‘i da daba, me‘olotodi iaudi ‘imi epatatomota ‘edia, tauna ‘imu susu ‘ena ‘i tubua, nai tauna to‘u‘umara ‘enega wa gimwagimwanena maniega, tauna nigea tubuio. 13Tauna ‘imu susu ‘ena ‘i tubua, ta tauna ‘u gimwaniena ‘imu maniega, si da daba: ta ‘igu ona‘upa‘upa esiomi ‘ena ‘i da miami ona‘upa‘upa ‘ataia manuna. 14Ta me‘olotona nigea lodabanamo tauna bwarana matana esiona nigea si dabadaba, iaruiarua gote si da ‘upwaiaulena ‘ina tomota ‘ediega; ‘igu ona‘upa‘upa ni‘atu ‘i li‘oena.
15Ta Eaubada Aberaamo ‘ena ‘i ona, Sarai mwaneio manuna, gea‘abo ‘ana esana u ‘ina‘inana Sarai, ta ‘ana esana Sara. 16Ta ia da onaobobomena, ta wate ‘enega natuio me‘olotona ia da ‘ebwaeio: tamo, ia da onaobobomena, ta tauna ‘i da ‘asa sinadi; ‘enega tomota ‘idi kiniao si da mai. 17Ga Aberaamo ‘i be‘u sanamwa‘uta, ta ‘i edagi, ta ‘atenega ‘i gwae, Tauna ‘ana tuta iakwara ‘e anaredi goama ‘ena ‘i da tubua nai? ta Sara, tauna ‘ana tuta iakwara ‘e naineti, ‘i da enatuna nai? 18Ta Aberaamo ‘i ona Eaubada ‘ena, Isimaela matamuia ‘i da bobo‘ana! 19Ta Eaubada ‘i gwae, Nigea, ta Sara mwaneio natuio me‘olotona ‘i da enatunena; ta ‘u da eesena Isaako: ta ‘igu ona‘upa‘upa ia da sa‘u ma‘ieana ona‘upa‘upa ‘ataia manuna tubunao manudi murinega. 20Ta Isimaela manuna, ni‘atu ia nonomu: u ‘ita, ni‘atu ia onaobobomena, ta uana ia da bubuna, ta ia da gieiauiena sinabwana; ‘inapwanao ‘e twelu ‘ena si da tubua, ta ia da bubuna be ‘i da ‘asa sinabwana. 21Ta ‘igu ona‘upa‘upa Isaako ma‘ieana ia da sa‘ui, tauna Sara ‘i da enatunena ‘emuia gete tuta nina iakwara nina ‘i memai ‘enaia. 22Ta ‘ina ona ma‘ieana i pilisinena, ta Eaubada Aberaamo ‘enega ‘i tu‘e. 23Ta Aberaamo natuna Isimaela i ‘au‘ewena, iauiaudi ‘ina susu ‘ena si tubutubua ta, iauiaudi ‘inamaniega ‘i gimwagimwaniedi ta, Aberaamo ‘ina susu taidi me‘olotodi iauna, ta asiata ai‘aila gote bwaradi matana esiona i ‘edabena, na‘ieana Eaubada ‘i onaona ‘enaia. 24Ta Aberaamo ‘ana tuta iakwara ‘e naineti‐naine, ‘ena bwarana matana ‘i daba‐sakowasiena. 25Ta natuna me ‘olotona Isimaela ‘ana iakwara ‘e tatini, ‘ena bwarana matana si daba‐sakowasiena. 26Asiata ai‘aila gote ‘enega Aberaamo ‘i dabena, wate Isimaela natuna. 27Ta ‘ina susu taidi iauiaudi, taudi susu ‘ena si tubua ta taudi to‘u‘umara mani ‘enega ‘i gimwagimwaniedi, ma‘enao si dabedi.
Избрани в момента:
Nugana 17: DOBOT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the British and Foreign Bible Society in 1919