Nugana 11
11
‘UPWA 11.
1Ta bare‘u maibo‘ana ‘enadi ‘e bweuna ta ‘idi ona ‘e bweuna. 2Ta gete ‘i apwesa, si tautauia bomatu ‘ena, ga abatau ‘e bweu si lobena ‘asa Sinaa ‘enaia; ta ‘ena si miami. 3Ta si onaona ‘e bweuna ‘e bweuna ‘enaia, Ta da iage, bwa‘a‐gabugabuna ta da bubu, be ta gabu ‘ai‘ailidi. Ta bwa‘a‐gabugabunina ‘idi gurewa, ta bitumena ‘idi bwada. 4Ta si ona, Ta da iage, ‘asa ta da lolia ta anua kesorana, tauna anua nina debana ‘i da tu‘e ga garewaia, ta ‘ada esana ta da bubuna; ‘abona nai ta sawara lelewana bare‘u maibo‘ana matanaia. 5Ta Ieoba ‘i mwa‘uta sabi ‘ita ‘asa nina ta anua kesorana nina, taudi tomota natunao si ‘abina. 6Ta Ieoba ‘i ona, wa ‘ita, tomota ‘e bweuna, ta iauiaudi ‘enadi ‘e bweuna; ta gete ‘enega nigea ‘e bweu iage ta da egagarena ‘ediega, ‘abo iage nina si nuena si da guinua. 7Ta da iage, ta da mwa‘uta, ta ‘enadi ‘ena ta da giekwanikwani, be ‘enega ‘enadi ‘e bweuna ‘e bweuna gea‘abo si da sinasinapu. 8Ga Ieoba gote ‘enega ‘i lolelewana dadanedi bare‘u maibo‘ana matanega: ta ‘asa nina ‘ana lolia si sa‘una. 9‘Enega si eesena Babela; gote ‘ena Ieoba bare‘u maibo‘ana ‘enana ‘i giekwanikwanina: ta gote ‘enega Ieoba ‘i lolelewana dadanedi bare‘u maibo‘ana matanaia.
10Getedi Sema tubunao. Sema ‘ana iakwara ‘e wani anaredi, ga Apakasada ‘ena ‘i tubua murua murinaia iakwara ‘e rua: 11Ta ni‘atu Apakasada ‘i tubua ga Sema ‘i miami ga iakwara ‘e paibe anaredi, ta natunao me‘olotodi ta natunao me wainedi si tubua.
12Ta Apakasada ‘i miami ga iakwara ‘e tati paibe, ga Sela ‘ena ‘i tubua: 13ta ni‘atu Sela ‘i tubua ga Apakasada ‘i miami ga iakwara ‘e poa anaredi ta teri, ta natunao me‘olotodi ta natunao me wainedi si tubua.
14Ta Sela iakwara ‘e tati ‘i miami, ga Ebera ‘ena ‘i tubua: 15Ta ni‘atu Ebera ‘i tubua ga Sela ‘i miami ga iakwara ‘e poa anaredi ta teri, ta natunao me‘olotodi ta natunao me wainedi si tubua. 16Ta Ebera ‘i miami ga iakwara ‘e tati poa, ta Pelega ‘ena ‘i tubua: 17ta ni‘atu Pelega ena ‘i tubua ga Ebera ‘i miami ga iakwara ‘e poa anaredi ta tati, ta natunao me‘olotodi ta natunao mewainedi si tubua.
18Ta Pelega ‘i miami ga iakwara ‘e tati, ta Reu ‘ena ‘i tubua: 19ta ni‘atu Reu ‘i tubua ga Pelega ‘i miami ga iakwara ‘e tu anaredi ta naine, ta natunao me‘olotodi ta natunao mewainedi si tubua.
20Ta Reu ‘i miami ga iakwara ‘e tati tu, ta Seruga ‘ena ‘i tubua: 21Ta ni‘atu Seruga ‘i tubua ga Reu ‘i miami ga iakwara ‘e tu anaredi ta sebeni, ta natunao me‘olotodi ta natunao me wainedi si tubua.
22Ta Seruga ‘i miami ga iakwara ‘e tati, ta Naora ‘ena ‘i tubua: 23Ta ni‘atu Naora ‘i tubua ga Seruga ‘i miami ga iakwara ‘e tu anaredi, ta natunao me‘olotodi ta natunao mewainedi si tubua.
24Ta Naora ‘i miami ga iakwara ‘e tweniti naine, ta Tera ‘ena ‘i tubua: 25ta ni‘atu Tera ‘i tubua ga Naora ‘i miami ga iakwara ‘e wani anaredi ta nainetini, ta natunao me‘olotodi ta natunao me wainedi si tubua.
26Ta Tera ‘i miami ga iakwara ‘e sebeniti ta Aberamo be, Naora be, Arana be, ‘ena si tubua.
27Ta getedi Tera tubunao. Tera natunao Aberamo be, Naora be, Arana be; ta Arana natuna Lota. 28Ta Arana ‘i mwawasa tamana Tera matanaia ‘ina ‘asa ‘ina ‘ebetubua ‘enaia, me Kaladea ‘idi Ura ‘enaia. 29Ta Aberamo ta Naora si ai: Aberamo mwanena ‘ana esana Sarai; ta Naora mwanena ‘ana esana, Milika, Arana natuna, tauna Arana nina Milika tamana, ta Isaka tamana, 30ta Sarai ‘i megagara; nigea ‘e bweu natunamo. 31Ta Tera natuna Aberamo i ‘au‘ewena, ta Lota Arana natuna, natuna natuna, ta Sarai lawana, tauna natuna Aberamo mwanena; ta ma‘ediao si tauiawa me Kaladea ‘idi Ura ‘enega, sabi tauia ‘asa Kanania ‘enaia; ta ‘asa Arana ‘ena si mai, ta ‘ena si miami. 32Ta Tera ‘ana tuta iakwara ‘e tu anaredi ta paibe: ta Tera ‘i mwawasa Arana ‘enaia.
Избрани в момента:
Nugana 11: DOBOT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the British and Foreign Bible Society in 1919