Matayo 13
13
Wikhori wa mufandëi
(Mrk 4:1-9; Luk 8:4-8)
1Itiku ërëëro ërëëro, Yesu agadua munyumba ësëë, agenda umpeo a irambo agikhaa. 2Maburi makuu a antu ëgamufiimëëya mpeoayo Yesu aganatëa mumasua, agikhaa. Antu vasaa vëgimëka umpeo a irambo, 3Yesu mweeso agavakhanëa mantu mingë gwa nyinkhori: “Tegheeyi! Mufandëi agenda ufandëa mbeyu. 4Nënaa uguyëfandëa ingëja igagwa munjia, nyonyi igaja igayila. 5Ingëja igagwa fana magwe fana naa gutie irongo në ringë. Mbeyu isii igakinda mugënyafaafo gusoko irongo na ikeevuu. 6Nënaa yuva radua, igafya, na gusoko mërye ayo naa ëtina nguu, iguma. 7Ingëja igagwa mu mëtë a maghuya, nyeeso ëgakura na maghuya igaitunyiywa. 8Ëgweeso ingëja igagwa mu irongo në ija, igakinda, igafa; ingëja mpeke ighana rëmwe, ingëja makumi mutandatu na ingëja makumi atatu. 9Uvii, tegheeyihe nësa mwina makutwe!”
Ndolyo aurëghëtya gwa nyinkhori
(Mrk 4:10-12; Luk 8:9-10)
10Asëywi vakwe vëgamwendea, vëgamuweeya, “Asikë nëugurighëtya na antu gwa nyinkhori?” 11Yesu agavasucha, “Nyee mwafewe ugëmanya gëmpihë ga utemi wa girunde, ëgweeso veeso vinakunukuërwaa. 12Gusoko, nëukweti intu ugufewa na goongeeyechwa, ëgweeso wasuu nëatikweti intu mbesa nanë rësëë nëukweti uguhegheywa. 13Ëyëë unë sokoayo ngurighëtya na veeso gwa nyinkhori, gusoko vëraraavie ëgweeso vëtighune vëtegheeye ëgweeso vëtitegheeye, mba umanya vëtimanyie. 14Kunë veeso ëgukhondeka ayoo nëwarighëtiye munyagëdaghu Isaya:
‘Utegheeya muutegheeya,
ëgweeso mutiumanya,
uraraava muuraraava,
ëgweeso mutigoona.
15Gusoko mahaa a antu avaa atendekie mafutu,
vayagiviye makutwë awe, vatutiye miho awe.
Nësa ti uvii, sa vagune gwa miho awe,
sa vategheeye gwa makutwë awe,
sa vamanyie gwa mahaa awe,
na unsukëa uguhanya Müküü,
neenoo sanaaforiye.’
16Gweeso ëforiwe miho anyu gusoko ëgoonaa na makutwë anyu gusoko ëgutegheeyaa. 17Tutë namwëëra, nyee anyagëdaghu na antu vingë naavëufenjaa uyoona asaa nëmwuuyoonaa vinayoonaa, na utegheeya asaa nemuuyategheeyaa vatayategheeye.”
Riana ra nyinkhori a mufandëi
(Mrk 4:13-20; Luk 8:11-15)
18“Uvii, nyee tegheeyi riana ra wikhori uroo wa mufandëi. 19Gëkaku muntu nëugutegheeya ukhani wa utemi na udëa uwumanya wëë mwino mbeyu ëyoo nëyagwee munjëa, Murughu uyoo ugujaa na ugëhora gësëë nëgafandëwa munkhoo a muntu wasuu. 20Mbeyu ëyoo nëafandëwa fana magwe uu në wikhori wa muntu nëughutegheeya ukhani wasuu na muugënyafaafo uguughenyifa gwa uyanjo. 21Ëgweeso utiumwingëaa na utenda mërye mukhatë akwe, ugufwaghëëra uwukwatëëra ukhani wasuu gwa iyoma ikufë gutufu na itungo në makhasëko na wifumpi adwëëra gusoko a ukhani wasuu ugugwea muugënyafaafo. 22Mbeyu ëyoo nëagwee mukhatë a mëtë a maghuya unë wikhori wa muntu nëugutegheeya ukhani wasuu ëgweeso faghafagha a urëmi uruu na nkumbu a maari ëguwutunyëëyaa ukhani wasuu weeso utiufa nkhari. 23Mbeyu ëyoo nëafandëwe mu irongo në ija unë wikhori wa muntu nëuguutegheeyaa ukhani wasuu na uwumanya, weeso ugufaa nkhari, na mbeyu ëmwe ëguduya mpeke ighana, ëngëja makumi mutandatu na ëngëja makumi atatu.”
Wikhori wa Mafafee
24Yesu agavakhanëa antu wikhori ungëja: “Utemi wa girunde wikhweti na muntu nëwafandëe mbeyu njija mu muundaakwe. 25Gweeso, antu nënaa vëree, murughu wakwe agaja agafandëa mafafee mukhatë a ngano, agenda kunë winjë. 26Uvii, ngano nënaa akinda na gwandya ubeeka, mafafee noo ëgaandya udwëëra. 27Atumami va munya muunda wasuu vëgamwendea, vëgamwëëra, ‘Müküü, gutie wisaghasaghii naawafandëe mbeyu njija mu muundaako. Itungwee mafafee adwëëra feehe?’ 28Mweeso agavasucha, ‘Murughu unë watendaa uvii.’ Faafo, atumami vakwe vëgamuweeya, ‘Wurë, ugufenja sese gwende uyakurana?’ 29Mweeso agavasucha, ‘Tiuvii, tajee fangëja nëmuhwangwëëya mafafee, mukura nanë ngano yayonoo. 30Reki ëkure itambëëmwe faka itungo ra ntënange. Itungo rasëë nëjoovakhanëa anyautënanga: hwaangwëyi tanju maregheera mwende uyatunga maburi maburi a ufembewa. Ëgweeso ngano mëhaangwëëyi mumëvëke mumaseengwaanë.’”
Wikhori wa mbeyu a iharadali
(Mrk 4:30-32; Luk 13:18-19)
31Yesu agavëëra antu wikhori ungëja: “Utemi wa girunde wikheti na mbeyu a iharadali nënaa muntu agamëduya wamëfandëa mu muundaakwe. 32Njeeso unë nyughuu ukëra mbeyu yoong'e, ëgweeso nëakinda ëgutendaa nkhuu ukëra nkinda yoong'e na ëgutendekaa mutë na nyonyi ya gunto igujaa na utuma viuri mumakhanja ayo.”
Wikhori wa gëlulëyo
(Luk 13:20-21)
33Yesu agavëëra wikhori ungëja: “Utemi wa girunde wikhweti na gëlulëyo nënaa agagëduya mukhema umwe wagëhangëënkhania na wutu idebe rëmwe, faka wutu woong'e ugafumpunëa.”
Utumëa nyinkhori
(Mrk 4:33-34)
34Yesu agavëëra antu asaa oong'e gwa nyinkhori. Inavakhanëëa intu mbanduvë gwa udëa utumëa nyinkhori. 35Gusoko ihanyo nënaarëgarëghëtiwa na munyagëdaghu rëkhondeke:
“Ngurëghëtya gwa nyinkhori.
Nguvakhanëa mantu nëafihëkie
ufuma utundwa gwa urëmi.”
Yesu uguhanya riana ra wikhori wa mafafee
36Yesu agavanyaghwisya antu asaa, agingëa ukhaya. Asëywi vakwe vëgamwendea, vëgamwëëra, “Gukhanëe riana a wikhori uroo wa mafafee mu muunda.” 37Yesu agavëëra, “Mufandëi wa mbeyu ësëë në njija unë MwaaMuntu. 38Muunda wasuu unë urëmi. Mbeyu ëyoo në njija unë antu vasaa në utemi uu wawe. Ëgweeso mafafee asaa unë antu avoo në va murughu uyoo. 39Murughu nëwafandëe mafafee asaa unë Ibilisi. Ntënange unë mpeo a urëmi na anya utënanga unë vamalaëka. 40Mwino chu mafafee ëguhaangwëëywa na ufembewa moto, uu ëgutendeka uvii uvii nëafika mpeoayo a matungo, 41Mwaamuntu uguvatuma malaëka vakwe vëahaangwëëye ufuma mu utemi wakwe vasaa voong'e nëvëgweetaa mahutye, na voong'e nëvëutendaa në mabë 42na uvagumëa mu ikungu ra moto, na kuuko vëgëëra na usia mino. 43Uvii, avoo nëaja vinjë uvëvëna mwino yuva mu utemi wamwa Tata wawe. Tegheeyi uvii, nësa mwina makutwë!
Wikhori wa mpamba nëëfihëkie
44“Utemi wa girunde wikhweti na mpamba nëëfihëkie mu muunda. Muntu umwe nënaawamëhanga agamëfiha kangë. Agayanja ino faka ageenda urinja oong'e nënaa ukweti, agaughura muunda wasuu.
Wikhori wa lulu
45“Kangë, utemi wa irunde wikhweti na mughwarë nënaa ugufenja intu në rina ughuri üküü. 46Mweeso agahanga intu rëmwedu në rina ughuri üküü nanguu, agaenda na agarinja oong'e nënaa uyakweti agarëghura intu rasë.
Wikhori wa ikwatya somba
47“Kangë utemi wa girunde wikhweti na ikwatya somba nëragumëwaa mwirambo, rakwatya somba hiya hiya. 48Nënaa rijua, antu vëgarëuta umpeo a irambo vëgikhaa, vëgahwaania somba në njija vëgayivëka mumpinda yawe, na nëmbë vëgayijughuta. 49Ëgutendeka uvii uvii mpeoayo a matungo: malaëka vëudwëëra, vëuvatemanua antu në avë na antu nëaja, 50na uvajughuta avoo neabë mu ikungu ra moto. Kuuko vëgëëra na usia mino.”
Mpamba në mpyaa na a khae
51Yesu agavawërya, “Mwaamanyaa mantu ayaa oong'ena?” Vëgamusucha “Nhaa.” 52Mweeso agavëëra, “Uvii, mu musëyi wa Seria në wasëywe wa utemi wa girunde wikhweti na munya khaya nëuguduyaa mu mpamba akwe mantu në mafya na nëakhee.”
Yesu uguhitwa uNasareti
(Mrk 6:1-6; Luk 4:16-30)
53Yesu nënaa wadaha urëghëtya nyinkhori isii agadua ufuma faafo, 54agenda ugëjiji gakwe. Kuuko agaa uvasëya antu muisinagogi rawe faka vëgataka vëgahanya, “Uyuu warehangiëfee ihaa ërëë na makura aya? 55Wurë, uyuu ti uyoo mwana amwa mufara mbaona? Wurë, yiu wakwe ti u Mariamuna? na vaunaakwe ti vaa Yakobo, Yosefu, Simoni na Yudana? 56Na ahajaakwe wurë ti voong'e vërëfo afaa itambëëmwe naseena? Uvii wayahangëefee ayaa oong'e?” 57Uvii, vëgaa vina wisaghasaghai na mweeso. Ëgweeso Yesu agavëëra, “Munyagëdaghu atiudëaa ukuriwa, ëgweeso ti mung'ë akwe na ukhaakwe!” 58Gwa uvii, inatendaa makura në mingë faafo gusoko a veeso udëa uhuvëa.
Избрани в момента:
Matayo 13: RIMRC
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Kirimi New Testament © Bible Society of Tanzania, 2008.