Siin Giala 2
2
1Lon laanka tán nɛ, ka ǹ gɔ́ɔ̃gɔ́ɔ̃ ǹ mànan tumaa nə́ n zɛnaa, ǹ nə́ nya. 2#EBR 4.4,10.#BBN 20.11. Lawa bɛ́ a ná a dí nya á nya, a lɛawaa sɔbaabaa ǹ wɔ pinaa, á n susu.
3Lawa barka wɔ bɛa lɛawaa sɔbaabaa ǹ wɔ pinaa lɛ nɛ, á bɔ á koa a gɔrɔn a din wɔ lɛa. A giala, a bɛ́ á màn tumaa zɛnaa á nya, a na á n susu bɛ lɛ a pinaa.
4Lawa lon laanka tán da lɔn, bɛ lɛa boo n ka bɛ nɛ.
Edɛn dù gɔrɔ boo
Dɛnaa Lawa bɛ́ á tán laanka lon zɛnaa ǹ mɛn waáraa, 5bɛ̀ da kɔ́n ba tán la bɔrɔ wa, buu kɔ́n dɔ banban bɔrɔ wa. A giala, bɛa biikoo li, bɛ̀ Dɛnaa Lawa tɔn la kaa tán la bɔrɔ wa, bɛ̀ minbuiin nɛ dɔ din banban bɔrɔ, á n tán kɔsɛ wa. 6Sɛnɛ, mu na á goã soe tán giulun, a n tán tumaa basɛ̃.
7 #
KOR1 15.45. Dɛnaa Lawa tán tii saa, á zɛnaa minbuiin nɛ lɛa. Á yiikoonaabaa ǹ piɛ̃ dɔ a nyin ni, á n baa màn yiikoonaa lɛa.
8Bɛ kio, Dɛnaa Lawa tɔ́n bǎã sonbore kɔ́n zɛnaa lɛ̀giala-n, ǹ nə́ bíi Edɛn dù gɔrɔ, a ná a min zɛnaa lɛ da walan. 9#SNS 2.7; 22.2,14. Dɛnaa Lawa da tɔrɔ din tumaa bɔ tán la, siĩn yɔrɔ-a, ǹ nɛ dɔ n kɔɔ̃n lɛ-n. Á yiikoonaabaa ǹ da da dù gɔrɔ lɛ bii, ka sii bǐɛ̃ laanka sii baraa dɔ̃ ǹ da nɛ.
10Tà goon a mu na á goã n toɛ Edɛn, die kiɛ dù gɔrɔ lɛ ganaa. A nə n toɛ walan doo, a n tala kɔn gùrù sii. 11Ǹ goon tɔ n Pisɔn. Bɛ n Avilaa gána tumaa lɛnpɛnɛ. Sana tá bɛa gána lɛ nɛ; 12a sana á siĩni. Da gon gìĩ kɔɔ̃n kɔ́n dɔ tá ǹ li, ka kɔlɔ tɛ-pɛle siĩn kɔ́n nɛ. 13Ǹ tà lɛ goon dɔ tɔ n Giɔɔ̃. Bɛ n Kuusu gána tumaa lɛnpɛnɛ. 14Ǹ goon kɔsɔ dɔ tɔ n Tiigrə. Bɛ n baa sii Assiirii gána a lɛ̀giala gɔn la. A siibaa ǹ wɔ ǹ ka Efrati tà nɛ.
15Dɛnaa Lawa giĩ lɛ saa á koa dù gɔrɔ lɛ nɛ, mà a kɔsɔ, a ga a walan. 16Á pɛ á laa a ganaa kɛnɛn: «Ń tá boe la n dù gɔrɔ dan lɛn tɔrɔ tumaa a nɛ bii. 17Sɛnɛ, sii bǐɛ̃ laanka sii baraa dɔ̃ ǹ da ke, n nyan toa bɛa nɛ wɔ n lɛ-n wa dɛ! A giala, bɛ̀ n ná a nɛ bii ǹ mɛn pinaa, n tá re giɛ̃, sàabaa ba bɛ la wa.»
18Dɛnaa Lawa tɔ́n pɛ kɛnɛn: «A siĩni giĩ goã a dinsɔɔ̃ wa. Ma á re dɔmalɛ wole zɛnɛɛ, a din miã lɛa, ma kɔ la.» 19Dɛnaa Lawa don màn tɔrɔ tumaa laanka bàanan tumaa zɛnaa ka tán tii ni, á ǹ kũ á daa ǹ nɛ giĩ lɛ li, a bɛ́ re ǹ tɔ bíi lɔn, asɛ ga bɛ ganaa. A bɛ́ re tɔ mɛn koe bɛa màn yiikoonaan lɛn ganaa, mà ǹ die ǹ nə ǹ bíi ka bɛa tɔ lɛ nɛ. 20Giĩ lɛ piɛ mànan laanka don mànan tumaa tɔ kɔ, ka bàanan tumaa nɛ. Sɛnɛ, a dinmaa na a din miã yɛ, a dɔmalɛ wole lɛa wa.
21Dɛnaa Lawa tɔ́n nyuù gole da giĩ lɛ ganaa, á nyuù wɔ. A bɛ́ nyuù ni, Dɛnaa Lawa ná a garsawe goon bɔ, á bɛa bǎã tã ka siĩ ni. 22Dɛnaa Lawa garsawe mɛn lɛ bɔ giĩ ni, á bɛ lɛ zɛnaa lɔ lɛa, á daa kɔ la. 23Giĩ bɛ́ á yɛ, á kaa a foo la, yǎa á n toa kɛnɛn: «Taarɛ! Sisia kəni, masɛ din miã goon ne ka kɛ nɛ,
ma din gɔ̀nɔn kɔ́n nɛ ka kɛ nɛ.
Mà ǹ die bíi giĩ a paabaa ǹ wɔ,
a giala, a na á bɔ giĩ ni.»
24 #
MAT 19.5; MAR 10.7,8; KOR1 6.16; EFƐ 5.31. Bɛ lɛ na á toa, giĩ á re n niɛ a n bɔ ǹ di laanka ǹ dan ganaa, a n doa kɔn ka a lɔ nɛ, ǹ nə n baa goon.
25Giĩ laanka lɔ nɛ, ǹ dinin min paa tumaa gɔ̀nɔn tontoro na á goã, min kɔ́n a sìi ba ǹ miã ganaa wa.
Избрани в момента:
Siin Giala 2: SCE2013
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
San Catholic Edition Bible © Bible Society of Burkina Faso, 2013.