Mataayo 14
14
Yohana Omubhatisaachi ˆakanungu omutu
(Maariko 6:14–29; Ruuka 9:7–9)
1Eriibhagha riire, omutëmi Herote Antibha are omukangati o Ghariraaya, ꞉nooghwire amangʼana ghano Yesu are araköra. 2Mbe, akabhabhoorera abhatamishi bhaache akabhugha, “Uyo n‑Yohana Omubhatisaachi, naryokiri koru mo‑bhaku. Nikyo anyi no obhotoro bho ghuköra ebheroghooro.”
3Herote ꞉naasiikiire hangʼu gho kubha naare amughöötiri Yohana, akamubhöha, akamotoora mwighërëcha. ꞉Naamubhöhiri gho ghiri e kobhugha amangʼana ighoro Herotiya, uno ekimbërë are omukari o Bhiiribho, omonyi waache, 4gho kubha Yohana naare aramobhoorera Herote arabhugha, “Taanyi bhoheene ambërë e Ryobha komokwira omukari o möönyu, eriibhagha ömöönyu akeere anyi muhöru.” #14:4 Mööhi Abharaawi 18:16, 20:21. 5Mbe, Herote naare aratabhara anchëra e komwita Yohana, amare akabha aratiina Abhayahuuti gho kubha ꞉mbaamokumiri Yohana Omubhatisaachi kubha m‑murööti o Ryobha.
6Hano rohikiri orosiko ro kohiita kwibhoru kooche Herote, omuukë o Herotiya akabhina ambërë e bhaghëni, akamotegheri Herote chwee. 7Niho akamuraghera kwo riiraheri komuha omuukë uyo ghyokyose kino angamusabhiri. 8Omuukë uyo aghaseesibhu na nyina, akamobhoorera Herote akabhugha, “Nuuhë hano omutu o Yohana Omubhatisaachi mo‑rohongo.” 9Omutëmi Herote aghiitumata chwee, amare gho ghiri e riiraheri rino arahiiri ambërë e bhaghëni bhaare, akahatëka kubha omuukë uyo ahaabhu. 10Mbe, Herote akamotoma omooto umu, aghaye mwighërëcha na konunga omutu o Yohana. 11Omooto uyo akaacha no omutu o Yohana mo‑rohongo na komuha omuukë uyo, akawiimoki akamuha nyina. 12Niho abhaanabheegha bha Yohana bhaaghaye bhakiimoki erihundughu na koreryeka. Bhakamara bhaaghaye komobhoorera Yesu ghoose ghano ghaköruru.
Yesu ˆakabharaagheri abhaato bhaaru ghokera ebheku bhitaano
(Maariko 6:30–44; Ruuka 9:10–17; Yohana 6:1–14)
13Hano Yesu oghwire ghayo ghoose, aghatanura hayo no obhwato, aghaye ahaghiro hano abhaato bhataanyi. Amare hano abhaato bhooghwire hayi anyi, bhaakaru mo‑meghya gheebho, bhaaghaye bharaghënda kwo maghoro komutambana Yesu. 14Mbe, hano ikiri mo‑bhwato, akarerighi erikinda ikoro re bhaato, akabhaghwera ebheghongi, na akabhahöri abhabhabharu bhaabho.
15Eriibhagha re mughörööbha mo‑masikera gha ryobha, abhaanabheegha bhaache bhakaacha bhakamobhoorera Yesu bhakabhugha, “Hano toonyi m‑mwiteregho, na ˆbhookiira. Nobharaghe abhaato bhano bhaghëndë ghwighorera ebhiinyakurë mo‑bhyaro.”
16Yesu akabhagharokeri akabhugha, “Bhataakwëndëru ghuye. Mobhahë inyu ebhiinyakurë.”
17Nabho bhakamugharokeri bhakabhugha, “Ntoonyi ne emighaate etaano hangʼu na chaasu ibhere.”
18Yesu akabhabhoorera akabhugha, “Mundëëtërë hano.” 19Niho akahatëka abhaato bhayo kubha, bhiikare haase mo‑manyaaki. Akiimoki emighaate ghiire etaano na chaasu chiire ibhere, aghagharaamereri Mwishaaro, akariitabheri Eryobha. Akamara aghaghesuura emighaate, akabhaha abhaanabheegha bhaache haghirohamu na chaasu, nabho bhakabhahööhi abhaato. 20Abhaato bhoose bhakaraaghëra, bhaghiighota. Bhakamara abhaanabheegha bhaache bhaghakoma amatigho gha bhiinyakurë bhino bhisaaghiri, bhaghiichori ebhetonga ikomi na bhibhere. 21Abhaato bhano ꞉bhaaraghiire ebhiinyakurë bhiire, mbaare abhasubhe ebheku bhitaano (5,000) koruusi abhakari na abhaana.
Yesu ˆaghaghënda ighoro e manche
(Maariko 6:45–52; Yohana 6:15–21)
22Hayo hayo, Yesu akabhahatëka abhaanabheegha bhaache kubha bhasöhë mo‑bhwato, bhakangate ghuye amwambuko o nyancha e Ghariraaya eriibhagha riyo iwe araragha erikinda re bhaato. 23Hano amariri koriragha erikinda riire re bhaato, Yesu aghatiira omwene chiri mo‑gheghoro, kubha asabhe Eryobha. Hano bhwiriri, naare akeere anyi iyo mo‑gheghoro omwene chiri. 24Eriibhagha riyo obhwato bhuure mboore bhohikiri ghateghate e nyancha, amare emekunda ngeere gherabhutëma gho kubha obhukama mboore bhorabhotughuta. 25Mbe, mo‑changökö, Yesu akahika hano abhaanabheegha bhaache ꞉bhaare, ino araghënda ighoro e manche. 26Amare hano abhaanabheegha bhamorooche araghënda ighoro e manche, bhaghatiina chwee na ghuköra eriireghe bharabhugha, “Kino n‑ekehu!”
27Hayo hayo, Yesu akabhabhoorera akabhugha, “Mwitoore omukörö! Motatiina. N‑eni.”
28Bheetero akamugharokeri akabhugha, “Oo Omutëmi, aribha n‑iye mahëënë, nomboorere kubha niiche hayo onyi, ino neraghënda ighoro e manche.”
29Yesu akamugharokeri akabhugha, “Nuuche.”
Mbe, Bheetero aghiika mo‑bhwato bhuure, aghasëëma ghughënda ighoro e manche kwërëkëra hano Yesu are. 30Amare hano obhukama bhuhaari bhomotughutiri, Bheetero aghatiina chwee, aghasëëma komeru. Aghakuura kwo riiraka akabhugha, “Oo Omutëmi, ontoori!”
31Hayo hayo, Yesu aghaghöröröki okubhökö, akamughööta, akamobhoorera akabhugha, “Iye uno onyi no obhokumi bhosuuhu, ngwake orooche ahaho?” 32Hano Yesu na Bheetero bhasöhiri mo‑bhwato, obhukama bhuure bhoghateneka. 33Mbe, abhaanabheegha bhano ꞉bhaasaaghiri mo‑bhwato, bhakamusëngëra Yesu bhakabhugha, “Mahëënë, iye n‑Omoona o Ryobha onyi!”
Yesu ˆakahöri abhabhabharu bhaaru bha Ghenesareeti
(Maariko 6:53–56)
34Hano Yesu na abhaanabheegha bhaache bhatëënyiri anyancha e Ghariraaya, bhakahika mo‑se e Ghenesareeti. 35Eriibhagha abhaato bha mo‑se yiire ꞉bhaamënyiri kubha Yesu nahikiri hayo, bhakaraghani amangʼana ghaache chambaara choose. Mbe, abhaato bhakamurëëtëra Yesu abhabhabharu bhoose. 36Abhaato bhayo bhakamusabha Yesu kubha abhiisherereri abhabhabharu bhamoturi mo‑muköbha o righööti reeche. Niho abhabhabharu bhoose bhano ꞉bhaamoturiri, bhakahöra.
Избрани в момента:
Mataayo 14: ntk
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 Wycliffe Bible Translators, Inc. All rights reserved