Mata 2
2
Mboya ge nda ge zwam ma way ya ndwa ndil van kaare
1Zeso too ge suwal Betlehem diŋ, ge no ge suwa ge Jude ne go, ge zaman ge gan ga̰a̰l Heroɗ ne go. Ḛ kuwa, nda ge zwam ma, àa ɗege ge mbii ya, àa deɗ-ɗa ge suwal ga̰a̰l Jerusalem diŋ, 2àa ele sok go: «Gan ga̰a̰l ge Yahuɗ ma way ge too jin̰al ge diya de? Ago, i kuwa gùwa̰ ge ngay ne tolla ge mbii ya go, i mbo ya no ndwa uware ne.» 3Sok ge gan ga̰a̰l Heroɗ za̰a̰ fare mbe go, mbo ya iigi digi, nda ge suwal ga̰a̰l Jerusalem diŋ-ge ma peɗ mbo ya iigi digi waɗme. 4Ge sok mbe go, kwate ga̰a̰l ge nda ge kee tuwaleya ma way mage nda ge hate eeya ge Moyiz ne ma ya se mɔɗwag, ele num go: «Gan ga̰a̰l ge Yahuɗ ma way, ge wa tii ke ge ne pe mbiya tol ge diya de? Ne ge àa tol ne go Krist, ndu ge Dok taa ne.» 5Àa gwan ge ne janna go: «Ge suwal Betlehem diŋ, ge no suwa ge Jude ne go. Ago, i dee ya kuwa ano mbe ge fare ge ndu ge zwagre Dok wa njaŋe ne na maktub zì pe go:
6“Mo Betlehem ge no suwa ge Juda ne go,
A fareba go, mo be hoɗege jiyale ge suwal ga̰a̰l ge Juda ne ma buwal zì to.
Ago gan ga̰a̰l mbo waɗ ge mo zì,
Mbo kaɗ Ba ge koy mbi ɓase Izrayel van ma ne.”»#Mic 5.1.
7Ge sok mbe go, Heroɗ tol nda ge zwam mbe ma ya chala jan, ele num go, num ngay na dwam ge num ee pe kuwa gùwa̰ mbe ndaaya go tem. 8Sok ɓyare teme num mbo suwal Betlehem go, jan num go: «Ḛ mbo hale fare ge van jiyale ne mbe pe kwaɗa, sok ge ḛ seɗ ne ya, ḛ ke mbi ne kuwaya ndwa go, mbi sḛ waɗme, mbi wa mbo uware ne.»
9Guwa̰ ge àa za̰a̰ gan ga̰a̰l go, àa kan ta mboya. Ḛ kuwa, gùwa̰ ge àa kuwa ne ge mbii ya mbe gwan dyan tene ya num ndwa go, gaa ɗeme num ɗiŋ mbo ya mḛḛ ge zok ge van jiyale no ne diŋ pagal nga. 10Sok ge àa kuwa gùwa̰ ga̰a̰l mbe mbo ya mḛḛya go, àa kee laa saal gḛḛ. 11Àa waɗ zok mbe diŋ, àa kuwa van jiyale mage ge na na̰ Mari, àa guu maa ko ma ge ne ndwa se, ndwa uware ne. Guwa̰, àa hage maa galam ma wa, àa ɔwabe bobo ge yee gḛḛ ma ya se, ndwa go dinar, ɔwara ge huu tii mage ɔwara ge àa tol ne mir ya, àa hon ne num. 12Sok ge àa ɗege ɓyare vin̰a gwan mbo maa suwal yà, Dok wuwage num ge kin̰a zì go, num guwa̰ ge Heroɗ ta yà to. Ge sok mbe go, àa mbo ya hee vin̰a ge ɗogle.
Chiyaya ge mbo kaɗ mbày ge suwa Ejypt yà
13Sok ge nda ge zwam ma ɔwabe zum gwan mbo maa suwal yà, malayka ge Bagezok ne a̰me ɗu dyan tene ge Jozef ta kin̰a zì, jan ne go: «Ɗege digi, wa̰a̰ van jiyale mage na na̰, chiya mbo Ejypt, mo kaɗ ya go ɗiŋ ge go mbi guwa̰ ya gwan jan mo fare. Ago, Heroɗ mbo ɓyare van jiyale mbe pe ndwa hun ne gezi.» 14Ge sok mbe go, Jozef ɗege digi ɗaal zì, wan van jiyale mage na na̰, àa ge num ɔwabe zum mbo Ejypt. 15Sok ge àa dee yà, àa gaa kàɗɗa da̰a̰reya go Heroɗ suu ne mbḛḛ. Kaŋ mbe dee ya keeya tetem ndwa huy fare ge Bagezok dee jin̰a ne, ge na ndu ge zwagre na wa, wa zì go: «Mbi too mbi van ne wuwa zum ge Ejypt diŋ.»#Oze 11.1.
Puuya ge nda jabso way ge suwa ge Betlehem ne go
16Sok ge Heroɗ kuwa go nda ge zwam ma lase na lase, ne twam juliliya mbo ya waɗe kon pagal. Hoɗ na wa go, a hṵṵ nda jabso van ge soɗob ma ge del zi go gwan-na se, ge no ge suwal Betlehem mage suwal van ge na ziya go ge ma diŋ peɗ, ge dwam ge nda ge zwam ma ngay na ne pagal tem. 17A go mbe no, Jeremi, ndu ge zwagre Dok wa fare ge dee jin̰a num ge zḛḛ ya kaal day ma wa huy no:
18«Nda za̰a̰ ka̰a̰l fiyaso ge suwal Rama diŋ,
Fiyaso fyalla ge kirgi ta mage sḭḭ mballa jɔjwag,
A Rachel ka fyalla ne ge na van ma pe,
Kuri laa eyalla ge dape, gaa be van.»#Jer 31.5.
Gwanna ge suwa Ejypt ya
19Guwa̰ swày ge Heroɗ ne go, ḛ kuwa malayka ge Bagezok ne gwan dyan tene ge Jozef ta kin̰a zì ge Ejypt go, 20jan ne go: «Ɗege digi, wa̰a̰ van jiyale mage na na̰ Mari, ḛ ge num gwan mbo ge suwa ge Izrayel ne yà. Ago nda ge ka ɓyare hun van jiyale mbe ma suu ya go.» 21Jozef ɗege digi, wan van jiyale mage na na̰, àa ge num gwan-na ge suwa ge Izrayel ne go. 22Sok ge za̰a̰ go Arkelayus kee muluk ne ge Jude pagal ndwa go Izrayel suwa lee ge ham-ge go, ge na ba Heroɗ byalam go, voo waɗ ge ne zì, daa gwan ee na ko mbo ge suwa mbe ya to. Guwa̰, Dok gwan wuwage ne fare ge kin̰a zì, ɔwabe mbo ge Galile yà, ndwa go Izrayel suwa lee ge chiya-ge go. 23Mbo ya kàɗɗa ge suwal ga̰a̰l ge àa tol ne Nazareɗ go, ndwa go fare janna ge nda ge zwagre Dok wa ma way ma wa huy: «Àa mbo tol ne van Nazareɗ.»
Избрани в момента:
Mata 2: kiaGRB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2017 Wycliffe Bible Translations, Inc. All rights reserved.