San Lucas 11
11
Jesús y u t'ʌna K'uj
(Mt. 6.9-15; 7.7-11)
1Jump'e k'in Jesús tʌn t'ʌnik K'uj y kaj ts'o'ki, junturi' u kʌ'sa winik tu ya'ti':
—Ts'uri, e'seto' ak t'ʌnik K'uj bex a Juan tu ye'sa ti' u kʌ'sa winik.
2Y tu ya'tio':
—Kʌ' t'ʌne'x K'uj a'e'x:
“Tet, ka' u k'oo'tech tu woro a winik jach ja'ri' techech K'uj,
ko'ten a wesinteno',
mete a baiki a k'at way ix lu'm a bex ka metik ix kʌ'.
3Y ts'aten in wo'cho' tu woro k'in.
4Y sa'se in k'ebo'
bex to' kak sa'sik u k'ebo'
a mok ku metik mo' taj ba' ti' teno'
y ma' cheik u tunta' in woro' y ʌnto' ak jok'o tu mo' tsoy ba'.”
5Jesús bexi' tu ya'ti' u kʌ'sa winiko':
—¿Moki teche'x wa yʌn u bojo' ku bin tʌnchuk ak'ʌ' u yire y ku yei'k ti: “Ts'ak mʌjʌnte oxp'e pʌn,
6Junturi' in bojo' mʌni u ch'eten ix in watoch y mʌnʌ' ba' in ts'ati',” 7y u bojo' a tiʌ ix u yatoch tu nuka ti': “Ma' tar a t'ʌnen; u jor y watoch ya mʌkʌ', ya laj nʌ'ken chata yete in ti'o' y mo' bik in lik'i in ts'a tech”? 8Ki wei'k, tak mu' k'at lik'i u ts'ati' u bojo', yʌnti' u lik'i ti mu' ya'bati' ten a winiko', a ti', mo' tsoy u tuku. 9Y ten kin wei'k teche'x: K'ate'x y K'uj je' u ts'ek teche'x; kʌxte'x y je' a wike'x; t'ʌne'x yok'o u jor y jeu' jea' teche'x. 10A mok ku k'atik, ku ts'abati'; y a mok ku kʌxtik, ku yirik; y a mok ku t'ʌn yok'o u jor, jeu' jea' ti.
11«¿Ba' teti wa ku k'ata' pʌn ten u tia' ku ts'ekti' tunich? ¿Ba' teti wa ku k'ata' ti' kʌy ku ts'ek ti kʌn ti' u ti'a? 12¿O u ts'ekti' jump'e aj loch tuk'in ku k'atik yej kax u ti'a? 13Chen a teche'x mo' pajtie'x, ka ts'ekti' tsoy ba' a ti'a ¿Maj tukrike'x teche'x jeu' jach ts'ek teche'x a Tete'x a tiʌ kʌ' wa ka k'atke'x ti' u Pixʌn K'uj ka u ts'atech?»
Jesús y u ts'uri a kisin
(Mt. 12.22-30; Mr. 3.19-27)
14Jesús tʌn u jarik kisin ti' jump'e xi'ra a lʌji' tu p'ʌta mo' jak'ʌ u t'ʌn, kaj jok'i a kisin ti' a xi'ra chu'mpʌ u t'ʌn y a winik ne pekno' u yoro'. 15Chen tax jujuntu tʌn u yei'ko':
«A Beelzebú u ts'uri a kisin lʌji' ku ts'ek u muk' a Jesús ti' u jarik a kisin.»
16Chen u jero' tio' tita, ti' u tuntiko' u yor Jesús, tu k'ato' ti' Jesús ka u ye'se ba' ix kʌ'. 17Chen Jesús yue a baiki ku tukriko' y tu ya'tio':
«Tu woro nukuch kʌjta wa ku ts'iko' y ku jʌtsik u bʌjo', u bʌjio' ku ts'osik u bʌjo', bexi' wa yok'o jump'e nʌj ku ts'iko' yete u yet bojo' a lay a binukaj u ts'okso' u bʌjo'. 18Bexi' a kisin a u k'aba' Satanás, wa ku tsikto' yete u yet kisin, muj bij xʌnta tuku wesintiko', a je' kin wei'k teche'x la' tu ka wei'k tene'x, ki jarik kisin ti winik yete u muk' a Beelzebú 19Wa jach tu jʌy kin jarik a kisin yete u muk' a Beelzebú, ¿moki ku ts'ek u muk' a kʌ'sa winiko' ti' u jarik kisin? Ben lʌjio' ku bin u ya'e wa mo' taj ta wa'ex. 20Chen wa ten ki jarik kisin yete u muk' K'uj, lʌji' ku jach e'sik tu ku wesintik K'uj a tiʌ kʌ' yaj tari ti teche'x.
21»Mo' bik u yakra u ba' yok'o yatoch junturi' xi'ra wa ne chich u muk' y ne u yʌn u ba' ti' u takik u bʌj. 22Chen wa ku tar u jer más ne chich u muk' y ku chesik a xi'ra a ku kʌnʌntik u yatoch, ku laj takik ti' u ba' a to lʌji' tu che tukra jeu takik u bʌj, a mok kʌnʌnʌ biu laj ch'ae u ba' a juntu y biu laj jʌtse a ba' ti u bojo'.
23»A mok mo' tiʌ yete ten lʌji' mo' ket u yor yete ten, a mok mo ket ku much'ik yete ten lʌji' ku ts'ek u laj bin u bojo'.
Tuk'in ku ka' sut oko a kisin
(Mt. 12.43-45)
24»Tuk'in jump'e kisin ku jok'o yok'o u bʌk'e junturi' winik, ku bi u kʌxte tuba u je'sik u bʌj. Y wa muj yirik tuba u je'sik u bʌj, ku yei'k: “binikaj ka' sut to' a uchik in watoch y bin ka but'e in bʌj tita.” 25Kaj ka sutpʌji tuj jok'i uch, kaj u yiraj a je' xi'ra, bex a nʌj ne ki mistʌ y ne ki uts'kinta. 26Lʌji' tuk'in ku bin u pʌye u jer siete u yet kisin jach más ne mo tsoy, ku laj oko' tu kʌjta ti a xi'ra, y a xi'ra ku waya más ne mo' tsoy u tuku y mo' bex uchik k'ʌs ts'ets'i'.»
A mok jach ne ku tsoyta u yoro'
27Ka tʌn u yei'k a je' a ba' junturi' ch'upra to' u pimi a winik ne k'ʌ'm tu ya'a:
—¡Ne jach tsoy u yor a ch'upra a tu tasech y a tu ch'isech!
28Jesús tu nuka:
—Ku jach bij tsoy u yoro' a mok ku yui'k u t'ʌn K'uj y ku jach metik.
Yʌn mok ku k'atko' ka' e'sak tio' jump'e ba' yete u muk' K'uj
(Mt. 12.38-42; Mr. 8.12)
29Ne pim winik k'uchi u yue u t'ʌn a Jesús y ti' chu'mpʌ u yei'k tio': «A je' a winik ne mo' tsoyo' u tuko', toj jari ku k'atko' u ye'sa ba' tio' yete u muk' K'uj; chen mʌnʌ' u ts'aba tio', toj jari ku bij e'sa' tio' a bex tu ye'sa a Jonás. 30A bex tu yuo' u winki Nínive baij mʌni ti' Jonás lʌji' tio' p'is u ye'sa ba' tio', bexi' u Ti'a Xi'ra, ku bin u yiro' a je' a winiko' kuxo' beje', p'is u ye'sa ba' tio'. 31Ka k'uchuk u k'ini u xu' t'ʌn, ku bij lik'i junturi' ch'upra a lʌji' u wesi u kʌjta Sabá, ti' ku bin u ya'e a ba' ne mo tsoy tu meto' a winik ti' K'uj, kaj wirik a lay ch'upra jach nʌch tari uch kaj tari u yu'e u t'ʌn Salomón tumen u ne jach yue a ba' Salomón, y a mok beje' tiʌ yete teche'x más t'o'o y mo' bex, bex a Salomón. 32Ka' k'uchuk u k'ini u yei'k K'uj o yʌn u si'pi a winik, u winki Nínive ku bij lik'o y ku bin u ya'e ti' a je' a winiko' kuxo' beje' a ba' ne mo' tsoy tu meto' ti' K'uj, ka wirik u winki Nínive kaj u yuo' u tsikba a Jonás a tio' tu jach suto' u t'ʌno' ti K'uj y ki wei'k teche'x a mok tiʌ beje' yete teche'x más t'o'o y mo' bex, bex a Jonás.
U kip'i a bʌk'e
(Mt. 5.15; 6.22-23)
33»Mix mok ku t'ʌbik y ku ta'kik a kip' ix jump'e u kuchi ba', mo' toj jay ku t'ʌbik ix u kuchi tuku t'ʌba' kip' y ku kukitik ti' u tichk'a y a mok ku yoko chʌkʌ' u yoko. 34A wich lʌji' p'is u kip'i a bʌk'e, tuk'in a wich ne tsoy ba' ku yirik bexi' a tu woro a bʌk'e ne sasi, chen tuk'in a wich ne mo' tsoy ba' ku yik bexi' a bʌk'e p'is tiʌ ix ts'uakbi. 35Ki' ire'x wa jach ti'e'x ix u sasi y mo' ix u ts'uakbi. 36Ben wo a bʌk'e ne sasi y mʌnʌ' ak'bi ti', tu woro a ba' ne chʌkʌ' a wirik, bex tuk'in jump'e kip' tʌn u tichk'a.»
Jesús ku yei'k mo' taj u kʌ'sa a fariseos yete u ku kʌ'sko' u t'ʌn Moisés a toj u ts'ibtamʌ uchik
(Mt. 23.1-36; Mr. 12.38-40; Lc. 20.45-47)
37Kaj ts'o'k u tsikba Jesús a ba' kaj u kʌ'sa san', tari junturi' u winik a judíos a ku ya'bati' fariseo kaj u pʌya' Jesús ti' u jʌnʌ ix yatoch, ij bini Jesús y kaj oki ix u yatoch, kuraj ix u pojche' a xi'ra. 38A u winik a judíos a ku ya'bati' fariseo peknʌ u yor ka tu yira a Jesús che bay kuraj y muj p'o'a u k'ʌ' ti' u jʌnʌ. 39Chen Jesús tu ya'ti':
—A teche'x a u winiko' a judíos a ku ya'batio' fariseos, a luch y a lʌk jay ka p'oi'ke'x u pach y u jamni ma' a p'oi'ke'x, a teche'x ne yʌn ba' ne mo' tsoy yok'o ichi teche'x y bexi' woro akra ba' yʌn te'ex. 40A teche'x p'is mʌnʌ' a tuke'x ¿Yʌn ma' we'ex, a mok tu meta u pach a ba' bexi' tu meta u jamni? 41Ti' a p'ate'x ne ki', yʌnti' a wʌntik yete a ba'ex yete a mok mʌnʌ' ti'.
42»¡Jach yaj ka bin a wue'x a teche'x u winiko' a judíos a ku ya'batio' fariseos!, A teche'x jai' ka tukrike'x a ts'ek u diezmo a pʌk'a u a p'is a ts'ajkax, a jump'e a ruda y bexi' tu woro a ba' yʌn a pʌk'be'x yok'o a lu'mi a pʌk'ex, chen mo lʌji' más ka tukrik a metik a ts'ibʌ' u t'ʌn K'uj a to' ku yei'k a metik jach u tsoyi ba', y a kʌnik bex K'uj ne otsi u yirik a winik, a je' a ba' tin wa'a yʌnti' a metke'x chen ma' p'ʌtik a metik a jump'e u t'ʌn a K'uj.
43»¡Jach yaj ba' ka bin a wue'x teche'x u winiko' a judíos a ku ya'batio' fariseos! A teche'x ne tsoy a wiko' a kute'x tuku kuto' a ne t'ojo' yok'o u nʌji tuku much'ik u bʌjo' a judíos u xake u t'ʌn K'uj, bexi' ne tsoy a wiko' u ki t'ʌne'x ten a winiko' yok'o tu ku naj kanik u bao' a winik,
44»¡Jach yaj ba' ka bin a wue'x teche'x u winki a fariseo! ¡Jach yaj ba' ka bin a wue'x a mok a ku naj kʌ'sik u t'ʌn Moisés! A teche'x ka metke'x a bʌje'x ne tsoy a tuke'x chen tusaka'e'x, a teche'x bexe'x bex u mukra a winik a mo' chʌkʌ' charik tak u mʌn winik.
45Tu nuka junturi' a mok ku kʌ'sik u t'ʌn a Moisés a toj u ts'ibtamʌ uchik:
—Wʌjkʌ'si, tuk'in ka wei'k bex, bexi' to' ka ts'ek in pʌjkinsuto'.
46Chen Jesús tu nuka:
—¡Jach yaj ba' ka bin a wue'x a teche'x a lʌjie'x a mok ku kʌ'sik u t'ʌn K'uj a toj ts'ibtamʌ Moisés uchik! Ka wei'k ti a bojo' u metik a ba' a toj ne ya u meta', chen a u bʌjie'x toj mix ka metke'x mix k'ʌs chichin ka pesik a k'ʌo' tia metik.
47»¡Jach yaj ba' ka bin a wue'x a teche'x, tus ne ka ki metke'x jach tsoy a to' u mukro' a profetas a mok a ka' nuke'x lʌji' tu kinso'!
48—Tu ka metke'x bex, ka we'sik ket a worex a bex tu meta a nuke'x, a tio' tu kinso' a profetas y teche'x ka tus metke'x jach ne tsoy u mukro' a profetas.
49»Bein a K'uj ne u jach yej a ba' ka tu ya'a: “Bi in tuchi'te profetas y apóstoles, chen tax jujuntu binukaj kinsa' y u jer binukaj kʌxta' ti u chuka'.” 50A je' a winiko' a kuxo' beje' lʌji' ku bi k'ata u bo'ri ti' ten K'uj tuj kinsa' tu woro a profetas yok'o tu woro a lu'm, 51Toj tij chu'mpʌ ka kinsa' a Abel, hasta tuj kinsa' Zacarías a lʌji' tij kinsa' xok'o tuku k'uba' ba' ti' K'uj y to' tu tiʌ u yatoch K'uj, y ki jach ki ei'k, K'uj ku bin u k'ate u bo'ri a tuj kinsa' a layo' ti'a je' a winko' kuxo' beje'.
52»¡Jach yaj ba' ka bin a wue'x a teche'x a lʌjie'x mok ku kʌ'sik u t'ʌn K'uj a to'o u toj ts'ibtamʌ a Moisés uchik! A teche'x ta ta'ke'ex u llave tuku yoko' ti' u ki k'o'ota K'uj, y mix teche'x ka woke'x y mix ka cheike'x u yoko u mok poch u yoko'.»
53Ka tu ya'ti' a je' a ba' a ku kʌ'sko' u t'ʌn K'uj a toj u ts'ibtamʌ a Moisés uchik y u winiko' a judíos a ku ya'batio' fariseos, chu'mpʌ u kʌxmetko' a Jesús y u k'ato' ti' ne ya'p ba'. 54Chen tʌn u tukriko' u metik k'as ba' tiu yiko' o ku yei'k k'as ba' a Jesús, tiu chujko'.
Избрани в момента:
San Lucas 11: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC