S. Juan 14
14
Jesús, a bej ti' ik Tet
1«Ma' tukrike'x a bʌje'x, jach ch'ae'x u t'ʌn K'uj y bexi' jach ch'ae in tʌn ten. 2Yok'o u yatoch in Tet ne ya'p nʌj, wo mo' bex, ten mo' tin toj a'te'x wa in bin in mete tu ka bin a k'uchue'x. 3Wo kin bin y ki metik tuka bin k'uchue'x, je' in ka sut, bin in ch'ae'x yete ten, pa ti' tu yʌnen, tiri' yʌne'x teche'x. 4A teche'x ya a we'x tu ki bin y bexi' u beri.»
5A Tomás tu ya'a:
—Ts'uri, mi' in weo' tuba ka bin, ¿bik ki bin in weto' u beri?
6Jesús tu nuka:
—A Ten Lʌjien u taji a bej, u taji a ba' y a kuxta, toj ja'ri' yok'o ten ja' k'uche'x yok'o ak Tet. 7Wo a k'o'muen ten, bexi' in Tet bi a k'o'ote'x y ya k'o'mue'x beje', tu tʌn a wirke'x.
8Felipe tu ya'a:
—Ts'uri, e'se to' ak Tet y bex toj ti'bi to'.
9Jesús tu ya'a:
—¿Felipe, jach uch ti'en yete teche'x y mo'tey a k'o'oten? A mok u yirmen ten u yirmʌ ak Tet, ¿biken ka k'atik ten in cheik a wirik ak Tet? 10¿Maj ch'eike'x a Ten jach ti'en yok'o a Tet, y ak Tet yok'o ten? A ba' kin wei'k tech ten, mo' ten ki wei'k in bʌji', toj ak Tet a tiʌ yok'o ten lʌji' ku metik a ba' a baiki u k'at. 11Jach ki ch'ae in t'ʌn a Ten ti'en yok'o ak Tet y ak tet tiʌ yok'o ten, wa maj ch'eike'x, che ch'ae in t'ʌn yok'o a ba' ku metik. 12Jach toj tu jay kin wei'k teche'x: A mok ku jach ch'eik in t'ʌn, a ti' bexi' ku bin u mete a ba' tin meta y yok'o tu kin bin a ten ich in tet a lay hasta más nuk ku bin u mete a ba'. 13Y tu woro a ba' ka k'atik ti' ak Tet yete in k'aba', jei metik, ti' u yira yok'o ten u jach muk' in Tet. 14A ba' ka k'atik yete in k'aba' ten ki bin in jach ts'ae teche'x.
Jesús ku ts'ek u t'ʌn u tuchi'tik u pixʌn K'uj
15»Wo jach ka yakuntiken je'e a jach metik a tu li'sa u t'ʌn K'uj a toj u ts'ibtamʌ a Moisés uchik. 16Y ten kin bin in jach k'ate ti ak Tet, u je'e u ts'ek te'x u jer a wʌj'ʌni, ti' u p'ata yete teche'x tu woro k'in. 17U pixʌn u jach taji a ba' a to'o a winik mo' bik u yoko tio', tu mu' yirmo' y mix u k'omo', chen a teche'x a wirmue'x a tu toj tiʌ yok'o teche'x y ku bij p'ata yete teche'x.
18»Mʌnʌ' in jach p'ʌtike'x ta juna p'is bex mʌnʌ' a tete'x, je'e in ka' sut ta wikne'x. 19Mʌnʌ' u ne xʌnta, a winik yok'o a je' a lu'm ya mʌnʌ' u yʌ iken, chen teche'x je'e a wirkene'x, y je'e a kuxte'x tu kuxen ten. 20A layo' u k'ini teche'x ka bin a wuete'x a ten ti'en yok'o in Tet, y teche'x yok'o ten, y ten yete teche'x 21A mok tiʌ ti' in t'ʌn tin li'sa u meta' y ku metik, a lay lʌji' ku jach yakuntiken, y a mok ku yakuntiken, ku bij yakunta' ten in Tet, y ten kin bin in yakunte y ki bin in we'se in bʌj ti'.»
22Judas a mo' lʌji' a Iscariote, tu ya'a:
—Ts'uri, ¿Biken ka bin a we'se a bʌj ti teno' y mo' ti a winiko' yok'o a je' a lu'm?
23Jesús tu nuka y tu ya'a:
—A mok ku yakuntiken, ku metik in t'ʌn y in Tet ku bin yakunte, y in tet y ten kin bij taro' kʌjta yok'o ti'. 24A mok muj yakuntiken, muj metik in t'ʌn, y a t'ʌn a tʌn a wui'ke'x mo' ten yʌni, lʌji' u t'ʌn ak Tet a tu tuchi'ten.
25»Tʌn in wei'k teche'x tu woro a je' a ba' a ti'tʌ ti'en yete teche'x. 26Chen u yʌj'ʌni a winik, a lʌji' u Pixʌn K'uj a to'o la' ak Tet ku bin u tuchi'te yok'o in k'aba', ti' ku bin u kʌ'se'x tu woro a ba' y ku bin u k'a'se teche'x tu woro a ba' a ten tin wa'te'x.
27»U tsoyji or kin p'ʌtik teche'x y lʌji' kin ts'ek teche'x, chen ten mij ts'ek bix a winik yok'o lu'm ku ts'ek. Ma' tukrike'x a bʌje'x y ma' sʌjtike'x. 28Ya ta wue'x in wei'k ya binika' y je'e in ka' sut ti' teche'x. Wo jach toj jay ka yakuntiken, tsoyji a wore'x ka ta wue'x ti ki bin ix ak Tet, ka wirik a in Tet lʌji' más t'o'o. 29Kin toj eik teche'x a je' a ba' tuk'in mo'tey mʌnʌk, ti' ka k'uchuk u k'ini u mʌn jea ch'eike'x in t'ʌn. 30»Ya mʌnʌ' in yʌn ya'p t'ʌn yete teche'x, ka wirik tʌn u tar a kisin a ku wesintik a je' a lu'm. A to'o ti' muj k'uchu u muk' ti' ten. 31Bex yʌnti' u mʌn, ti u yirik a winik yok'o lu'm a ten kin jach yakuntik ak Tet, y kin metik a ba' a tu tuchi'ten in mete.
»Lik'ene'x, y ko'xe'x jok'o way.
Избрани в момента:
S. Juan 14: PLacNaha
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Sociedad Biblica de México AC