Eyɔɔ 19

Paylet tsɛrɛ kpe Yeso kú

1Paylet ndɛ̀ʼ Yeso e wuru engɔ ene akanda. 2Bɔ ebiri à furu ekɛd ene ńtwɔn tɛʼ ato ngɔ na ǹtàm m̀fɔ̀ nɔ. Â ge angwa ǹdi fàn ekwa ngɔ é tee kpe engɔ na m̀fɔ̀. 3E sa sèrè engɔ ga kpe, “Chaʼ! M̀fɔ̀ bɔ Juu, tsɔmɔ ene endzobo dɔɔdɔɔ.” Angɔ à gɛrɛ fɛ engɔ. 4Paylet wu gli ese ga ebe bɔ Juu kpe, “Mbɔn kɔʼɔ anɔ, mmɛ wa nu engɔ é ndɛʼ endɔn. Mbɔn shi nɛɛ kpe mmɛ ke zɔ ebwa bɔɔbɔɔ deʼ engɔ me le bo.” 5Éngɛ Yeso gli zeʼe ese nè ǹtàm ǹtwɔn mane angwa ǹdi fàn yɛ, Paylet gâ ebe angɔ kpe, “Egho wɛ wu.” 6Aŋu m̀fɔ̀rɔ̀ zhiri mane abɔ byɛ â ma kɔʼ ndɔngwe kɛ̀, â zɔ Yeso ngɛ, angɔ flaba akwâ ga kpe, “Kɔmɔ engɔ! Kɔmɔ engɔ!” Bɛʼngɛ Paylet gii kpe, “Mbɔn nu engɔ kɔmɔ ene egha ndzɔn. Mmɛ ke zɔ ǹji ebwa deʼ é ga kpe mbɔn kɔmmɔ engɔ bo.” 7Eto bɔ Juu byɛ fuumu ga kpe, “Mbyɛɛ be le etsɛrɛ e me tee kpe engɔ we koʼro é ku, mbɔʼnga engɔ kpe mbè na ŋwɔ Ngwe.” 8Èndzobo chɛ Paylet à zo kpe engɔ we koʼro é ku ngɛ, èklɔ̀ bere engɔ. 9Paylet wu nyii a ndɔ biiri ebe Yeso kpe, “Ngwo ne zeʼe awe?” Yeso zhwezhwe. 10Paylet biiri kpe, “Ngwo ke ma ga ena bo? Ngwo ke nɛɛ kpe mmɛ we le ekama é pwèerè awɛ kà é kɔmmɔ awɛ bo?” 11Yeso ga kpe, “Mala Ngwe à ne ndɛʼ ekama engɛ̂ nyɛ̀rɛ̀ zèʼe ekere bo, shi ngwo ke le ekama deʼ edɔm ndza bo. Éngɛ egho wɛ à ndɛʼ angu engɛ̂ ngɛ, we go ebwa ghɛʼ.” 12Enyɛrɛ éngɛ, sa ngɔ̀ɔ embè, Paylet à zɛʼɛ aghɛʼ kpe mbè pweere Yeso, abɔ Juu byɛ sa flaba akwâ ga kpe, “Mala ngwo saara egho wunɔ shi ngwo ke me esɔrɔ Kaasa bo. Egho wɛ è ma ga kpe mbè na m̀fɔ̀ ngɛ na gho m̀pɛ̀ʼ Kaasa.” 13Èndzobo chɛ Paylet à zo énde ngɛ, è nu Yeso zeʼe ese, è tsɔmɔ edɔm atan m̀fɔ̀ ene afwɔ deʼ â me byɛ ene atye, e ma zɔʼrɔ ene atsoʼ Aramayk kpe Gabatha. 14À na aghɛɛghɛɛ nchi, anji bɔ â ma ndèerè amɔ ene antara fɔɔ ekere, Paylet ga ebe bɔ Juu byɛ kpe, “M̀fɔ̀ ndzɔn zɔ!” 15Abɔ byɛ flaba akwâ ga kpe, “Nu engɔ nɛŋɛ! Nu engɔ nɛŋɛ! Kɔmɔ engɔ.” Paylet biiri kpe, “Mbɔn kpe ayɛ nɔ? Mmɛ kɔmmɔ m̀fɔ̀ ndzɔn?” M̀fɔ̀rɔ̀ zhiri gii kpe, “M̀fɔ̀ njɛɛ tye Kaasa.” 16É ngùdù, Paylet ndɛ̀ʼ Yeso ebe angɔ é kɔmmɔ engɔ.

Aŋu â kɔmmɔ Yeso ngɛ

Éngɛ e ge Yeso eblabwo bɔ ebiri. 17Yeso beʼ azɔd baʼra mɔ ngɔ̀ɔ afwɔ Akɔʼato, afwɔ deʼ â ma zɔʼrɔ atsoʼ Aramayk kpe, “Golgotha.” 18Â kɔmmɔ engɔ aŋu mane bɔ tsɛrɛ fyee, ewu abɛɛ zɔ̀ êwè abɛɛ ze, Yeso mwɔ aghɛɛghɛɛ. 19Paylet à ŋwɛʼrɛ kɔmɔ edɔm azɔd baʼra yɛ kpe, “YESO GHO NAZARƐD, M̀FƆ̀ BƆ JUU.” 20Bɔ Juu akɛkɛ â zɔʼrɔ ebwa wunɔ mbɔʼnga afwɔ yɛ â me kɔmmɔ Yeso ngɛ à ne ebara antiri abɛ, e gɛrɛ me ŋwɛʼrɛ ene atsoʼ Hibru, Latin mane Grik. 21M̀fɔ̀rɔ̀ zhiri bɔ Juu tsɛrɛ ebe Paylet kpe, “Ke ŋwɛʼrɛ kpe m̀fɔ̀ bɔ Juu bo, ŋwɛʼrɛ kpe ‘Mmɛ na m̀fɔ̀ bɔ Juu.’ ” 22Paylet gii kpe, “Engɔ wɛ mmɛ à shi ŋwɛʼrɛ ngɛ, mmɛ à shi ŋwɛʼrɛ.” 23Èndzobo chɛ bɔ ebiri â shi kɔmmɔ Yeso ngɛ, e nu ǹdi ngɔ tsɛddɛ ene entiri kwɛ̀, egho wu nu amɔ, à shi tye ma ǹdi efwɔ ngɛ. Ǹdi zɔnɔ à ke le afwɔ deʼ yɛ à me sɔŋɔ ngɛ bo. Â ne timi nyɛrɛ enji bwɛrɛ ato. 24Angɔ ga àmɔ̀ àmɔ̀ kpe, “Ntsɔ ka tsɛddɛ, ntsɔ ndwa antsántsá, è zɔ kpe ka awɛ ma nu.” Â le énde mbɔʼtye ebwa wɛ â me ŋwɛʼrɛ efwɔ aŋwɛʼrɛ Ngwe ngɛ gli éŋwaʼa kpe, “Angɔ à gɛbbɛ ǹdiri ntsa, le ndwa antsántsá ene ǹdi efwɔ ndza.” Ewunɔ ne ebwa wɛ bɔ ebiri â le ngɛ. 25Áʼɔ̧̀ Yeso, ghongwaaye mɔ Meri, eye Kleyopas mane Meri Magdalɛn â ne tamma ebara azɔd baʼra Yeso. 26Èndzobo chɛ Yeso à zɔ áʼɔ̧̀ mɔ mane egho bɛ̀ɛrɛ abwa wɛ à me doʼo engɔ ghɛʼ e me tamma aŋu ngɛ, è ga ebe angɔ kpe, “Aye! Ŋwɔ ngwɛ wu.” 27Engɔ gɛrɛ ga ebe gho bɛ̀ɛrɛ abwa wɛ kpe, “Ŋwɔ, áʼɔ̧̀ ngwɛ wu.” Enyɛrɛ èndzobo chɛ egho bɛ̀ɛrɛ abwa wɛ nu engɔ sa tsɔmɔ nè engɔ.

Aŋu Yeso à ku ngɛ

28Afwɔ sa ndada, Yeso nɛɛ kpe abwa yɛ â me ŋwɛʼrɛ efwɔ aŋwɛʼrɛ Ngwe ngɛ a shi gli, engɔ gâ kpe, “Fi̧ri ntsa tsa fe.” 29Ekɔɔ deʼ à na aŋu nè atwa mɔm efwɔ. E nu èzɛ̀ʼ ge efwɔ, è fara ene empukɛ̀ʼ, è sàa ekere azɔd baʼra eklo Yeso. 30Èndzobo chɛ Yeso à zhweʼre amɔm myɛ ngɛ, engɔ ga kpe, “E myɛ!” Éngɛ engɔ ndwa ato kwaʼ zhwɛ̀ɛrɛ è ku. 31À na anji ndeere abwa, e ma tama enchwe é mwɔ anji je kɛ́, bɔ Juu â ke doʼo kpe abɔ kudu byɛ tye ekere ezɔd baʼra bo. Angɔ ngɔɔ ga ebe Paylet kpe engɔ le shi e gɔbbɔ elo abɔ byɛ â me kɔmmɔ ngɛ mbɔʼtye angɔ zamma kudu, shi e chwee angɔ ekere ezɔd baʼra. 32Bɔ ebiri gɔbbɔ elo gho mbèmbè, gɛ̀rɛ̀ gɔbbɔ angɔ egho we byɛ â me kɔmmɔ angɔ nè Yeso ngɛ. 33Enɔ bwɛrɛ ebe Yeso, e zɔ kpe engɔ shi ku ngɛ, e ne wu gɔbbɔ elo ngɔ bo. 34Àngwè ebiri bi toʼ ebara Yeso ene éŋwɔ, anɔm gli efwɔ me blidi nè ndim. 35Egho à zɔ eghɔɔ ngɛ à sɛɛrɛ mbɔʼtye ngwo gɛrɛ bɛ̀rɛ kpe ne éŋwaʼa. 36Abwa zɔnɔ à fɔɔ énde nɔ mbɔʼtye ebwa wɛ efwɔ aŋwɛʼrɛ Ngwe ngɛ gli éŋwaʼa kpe, “E ke gɔbɔ awuu deʼ ngɔ bo, ka aŋwaʼ.” 37E gɛrɛ be ŋwɛʼrɛ efwɔ afwɔ aŋwɛʼrɛ tsɛrɛ kpe, “Angɔ ba zɔ egho wɛ angɔ à toʼ ebara ngɛ.”

Aŋu â kpa Yeso ngɛ

38Endzobo abwa zɔnɔ à fɔɔ ngɛ, Yɔsɛf gho Arimatya, zeʼe bii Paylet é nu akudugho Yeso. Yɔsɛf wunɔ à na gho bɛ̀ɛrɛ abwa Yeso, e shi ma bumu eto ebe bɔ Juu é bɛrɛ apɛpɛ. Paylet à bɛrɛ engɔ zeʼe nu akudugho Yeso. 39Nikɔdemɔs, wɛ à shi dye zeʼe ebe Yeso ǹklì anji deʼ ngɛ, à kpede Yɔsɛf. Nikɔdemɔs à zeʼe nè ngud de myɛ â me blidi ene enklila mane egɛ deʼ byɛ à gɛrɛ me kama ekɛb ngɛ. À ne diri na ǹdeʼre ńgbaa fyee nɔ. 40Angɔ bɔ fyee nu akudugho Yeso, è furu ene ǹdi nè ngud nara mbì shi fudu efwɔ eparandi. Ne éngɛ etsɛrɛ bɔ Juu â ma le nè ekudubɔ. 41Ǹkɛmɛ deʼ à na afwɔ yɛ â kɔmmɔ Yeso ngɛ. Atoshe fe deʼ à na aŋu yɛ gho à de bli shi bwɛrɛ efwɔ bo ngɛ. 42Â bwɛɛrɛ Yeso efwɔ mbɔʼnga eshe yɛ à ne mbin, a gɛrɛ mwɔ anji ndeere abwa bɔ Juu ene antara fɔɔ ekere.

Избрани в момента:

Eyɔɔ 19: nbt

Маркирай стих

Споделяне

Копиране

Искате ли вашите акценти да бъдат запазени на всички ваши устройства? Регистрирайте се или влезте

Научете повече за Aŋwɛʼrɛ Ebuumu Fe Nè Ngwe

Eyɔɔ 19

Популярни библейски стихове от
Eyɔɔ 19

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eyɔɔ 19

Eyɔɔ 19

Популярни библейски стихове от Eyɔɔ 19

Библия:

Ngwo

Версия: Aŋwɛʼrɛ Ebuumu Fe Nè Ngwe - nbt

Eyɔɔ 19

Популярни библейски стихове от
Eyɔɔ 19