Juanasiup Aglangit 8
8
Arnaq Angunniaqtillugu Angujaujuq
1Jiisusili qaqqamut majuaqpuq uqsuksaujunnaqtunik paurngaqasuunik napaaqtulingmut. 2Ullaamarikkulli Tuksiarvigjuarmuarivuq; inuillu Jiisusiup avataanut kativut, ingilluni ajuriqtuliqpait. 3Piqujanik ilisaijiit Paarisillu arnamik tavvunngaujjivut asinniaqtillugu angujaujumik, inugiaktut akurngannuarutivaat. 4Jiisusimut uqaqput, “Ajuriqtuiji, una arnaq asinniaqtillugu angujaungmat. 5Pikujattinni Muusisiup Piquvaatigut arnaq taimaittuq milluqtauluni tuqutaujariaqarniraqtlugu. Ivvilli qanuilijauqurmangaaqpiuk?” 6Taimailivulli Jiisusimik uukturasuarlutik, pasijaksannguqtitsijumallutik taassuminga. Jiisusili ukulluni tikirminut nunakkut titiraliqpuq. 7Apiqsukkannilirmata nikuvilluni uqautivait, “Nallisi ajuqtulilauqsimanngittuup ujaqqamut miluriaqqaalaurliuk.” 8Amma ukugilluni nunakkut titiralirivuq. 9Tamatumingali tusaramik, qimaruutiliqput, atausiunaaqtirlutik, inutuqaulaanit pigiaqqaarlutik. Jiisusilu qimaktauvuq inutuulirluni, arnarlu nangiqtuq piqatituariliqpaa. 10Jiisusiulli takusarluniuk arnaq uqautivaa, “Arnaq, namunngaqtulliikkua? Uvaniittuqarunniiqpa ilingnik sugiaqtauqujijumik?”
11Arnaup kiuvaa, “Ataniq tavvaniittuqarunniiqpuq.”
Jiisusiup uqautivaa, “Uvangattauq sugiagaksautittunniiqpagit; tamaanngat nuulirit, kingurngagullu ajuqtulikkanniqtaililirit.”
Jiisusi Silarjuarmut Qaumaniuvuq
12Jiisusiup Paarisit uqautikkanniqpait, “Silarjuarmiut qaumanirivaanga; uvannik maliktuq taaqtumi inuunianngilaq, qaumajumili inuuniaqpuq.”
13Tavva Paarisit uqautivaat, “Ilingnik tavva nalunailivutit; nalunaijarutiit tamanna sulinngilaq.”
14Jiisusiup kiuvait, “Uvannik nalunairaluaruma, nalunaijarnira sulivuq, qaujimagama nakit pisimangmangaarma namullu ainiarmangaarma, ilissili qaujimanngilasi nakit pingmangaarma namullu ainiarmangaarma. 15Timiup iliqqusinga maliglugu iqqaqtuivusi, uvangali iqqaqtuinngilanga kinamigluunniit. 16Ilaak iqqaqtuiguma, iqqaqtuinira sulivuq, inutuujjinnginnama iqqaqtuinirmik, Ataataulli tilijima ilagivaanga. 17Piqujassinni titiraqsimajuqaqpuq inuuk marruuk qaujisimaningik sulivuuk; 18uvanga uvannik nalunaiqpunga, Ataatagalu tilijiga nalunaijaigivuq uvannik.”
19Taimaimmat tavva apirivaat, “Nauktaima Ataatait?”
Jiisusiup kiuvait, “Uvannik Ataatamigluunniit qaujimanngilasi; uvannik qaujimagussi, Ataataga qaujimagajarivasi.”
20Uqausiit Jiisusiup uqausirivait Tuksiarvigjuarmi, tunirrutinik puuqqaiviup sanianiilluni; tigusijuqanngilarli taassuminga, pijauviksanga suli nalliutisimanngimmat.
Upangniaqtannut Upagutijunnanngilasi
21Tavva Jiisusiup uqautikkanniqpait, “Aullarniaqpunga, qinirumaaqpassinngalu tuqujumaaqpusilu ajurnissinniinginnarlusi; upangniaqtannut aijunnannginnassi.”
22Tavva Juutit uqaqput, “Upangniaqtanganugguuq aijunnannginnatta, unaa imminik tuquttumalirami taimaak uqaqpa?”
23Jiisusiup uqautivait, “Ilissi maanngat pivusi, uvangali tappaanngat pivunga; ilissi silarjuarmit tamatumanngat pivusi, uvangali silarjuarmit tamatumanngat pinngilanga. 24Taimaimmat uqautivassi tuqujumaarnirarlusi ajurnissinniillusi, tuqujumaaqpusi ajurnissinniillusi ukpilinngikkussi Uvangauninnik.”
25Tavva uqautivaat, “Kinauviit?”
Jiisusiup uqautivait, “Uqautisimalauqpassi taimanngat pigialisaarninnit. 26Amisunik uqausiksaqaqpunga ilissinnut iqqaqtuijjutiksaqarlungalu; tilijigali sulijuuvuq, silarjuarmiullu uqautivakka taassumanngat tusalauqtannik.”
27Tukisinngilalli Jiisusiup uqausirijanganik Ataatamik. 28Tavva Jiisusiup uqautivait, “Inuup Irninga nappautigussiuk, tukisilaaqpusi Uvangaugama, tukisilusilu uvannik pinasuaqsimannginninnik uqausiqaramali Ataataup uvannut ajuriqtuutigilauqtanginnik. 29Tilijimalu ilagivaanga; inutuutinngilaanga, taassuma quviagijanganik pinasuatsainnarama.”
30Jiisusi taakkuninga uqaqtillugu, amisut ukpiliqput taassuminga.
Aiprahaam Qiturngangit
31Tavva Jiisusiup Juutit ukpirijini uqautivait, “Uqausikka malitsainnalirussigik, sulijumik ilinniaqtigiliqpassi, 32sulijuq qaujiniaqpasi, sulijuullu qilarujjaarniaqpaasi.”
33Tavva kiuvaat, “Aiprahaam kinguvaarivaatigut, nalliannuulluunniit sialaarijaulauqsimanngilagut. Qanuq tukilingmik uqaqpit, ‘Qilarujjaarniaqpaasi’?”
34Jiisusiup kiuvait, “Sulijumik uqautivassi, nalliat ajuqtulijuq ajuliqtitausimavuq ajurnirmut. 35Ajurnirmut qilaksuqtausimajuq iglumiitsainnarunnanngilaq; irnirli tavvaniitsainnarniaqpuq. 36Irniup qilarujjaaqpasi, tavva qilarujjaaqsimallaringniaqpusi. 37Qaujimavunga Aiprahaam kinguvaaringmasi; tuqunnasuaqpassinngali, uqausikka itirviksaqanngimmata ilissinnut. 38Uqallakpunga Ataatannit takulauqtannik, taimailiurivusi tusalauqtassinnik ataatassinni.”
39Taakkua kiuvaat, “Aiprahaam ataatagivavut.”
Jiisusiup uqautivait, “Aiprahaap qiturngarikpasi, Aiprahaam pinialauqtangit pinasuarajarivasi, 40maannali tuqunnasuaqpassinnga, sulijumik uqallaktillunga Guutimit tusalauqtannik; Aiprahaamli taimailiulaunngilaq. 41Ataatasi pinialauqtanginnik pinasuaqpusi.”
Taakkua uqautivaat, “Asinniarnirmut qiturngaqtaangusimanngilagut; atausirmik Ataataqaqpugut Guutimik.”
42Jiisusiup uqautivait, “Guuti Ataatagigussiuk, nagligigajaqpassinnga, Guutimit pilaurama tavvanngaaqsimallungalu maanna tavvaniippunga; uvannik tamaunngaqtilaunnginnama, taassumali tililauqpaanga. 43Sungmat uqausirijakka tukisinngippisiuk? Uqausikka naalagumannginnassigik tusaajumanagillu. 44Ataatassinnit Saataanasimit pivusi, ataatasilu pijumajangit maligumavasi. Taanna pigiarninganit inuaqtiuvuq, sulijumiglu pisimalauqsimanngilaq, suliniq taassumaniinngimmat. Sagluguni, piusiminik atuqpuq, saglutujuugami sagluniullu ataatagivaa. 45Uvangali sulijumik uqallakkama, ukpirinngilassinnga. 46Nallisi ajuqtulininnik nalunaiqsijunnaqpaa sulijumigli uqallakkuma, sungmat ukpirinngilassinnga? 47Guutimit pijuup Guutiup uqausingit tusaqpait; taimaimmat Guutimit pinnginnassi, tusarunnanngilasi.”
Jiisusilu Aiprahaamlu
48Tavva Juutit Jiisusi apirivaat, “Nalaussinngilagut uqaqtilluta Samiariarmiutauvutit anirnirlungmiglu ilummiqtausimallutit?”
49Jiisusiup kiuvait, “Anirnirlungmik ilummiqtausimanngilanga; Ataatagali upigivara, ilissili narrugivassinnga. 50Niqtuqtauniksara qininngilara; tamatumingali qiniqtuqariiqpuq taannalu iqqaqtuijumaaqpuq. 51Sulijumik uqautivassi, nalliat uqausinnik maliktuq, taanna tuqunianngilaq.”
52Tavva Juutit uqautivaat, “Maanna qularnanngittumik tukisivugut anirnirlungmik ilummiqtausimagavit. Aiprahaam tuqulauqpuq, nalauttaijullu tuqulaurivut; ivvilli uqaqputit, ‘Nalliat uqausinnik maliktuq taanna tuqunianngilaq.’ 53Aiprahaammit ataatattinnit anginiqsauvit, tuqulauqtumit? Nalauttaijullu tuqulaurivut! Ilingnik sunautinnasukpit?”
54Jiisusiup kiuvait, “Uvannik niqtuutiguma, niqtuutinira aturajanngilaq; Ataatagali taannauvuq uvannik niqturnaqtitsijuq, taanna Guutiginiraqtasi. 55Taannali qaujimannginnassiuk; uvangali qaujimavara. Qaujimannginnirarajarukku, ilissituttauq sagluqitsinajaqpunga; qaujimavarali uqausingillu malikpakka. 56Aiprahaam ataatasi quviasulauqpuq takujumaalirami ullurijumaaqtannik; takugamiuglu quviasulauqpuq.”
57Tavva Juutit uqautivaat, “50-nigluunniit suli arraaguqanngilatit, Aiprahaamlu takulauqsimaviuk?”
58Jiisusiup kiuvait, “Sulijumik uqautivassi, Aiprahaam inuulauqtinnagu, tavvaulauqpunga.”
59Tavva ujaqqanik tigusivut millurumallugu; Jiisusili ijiqpuq, anillunilu Tuksiarvigjuarmit.
Избрани в момента:
Juanasiup Aglangit 8: EAIBR
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Eastern Arctic Inuktitut Bible (Romanized) © Canadian Bible Society, 2022-2023.