MATIYE 6
6
Yeesu hate kaŋ cəərə aye bə kara a kaa kə caacaŋ
1«Aŋ golə kusrəŋ la pisi ku kar gə minti aŋ bə jiitiya bə ke awalna a Pepeŋ. Aŋ a jəy wəra kəkər tiinə kaa kə ablawa minti yə asaŋ la daana yə aŋkaŋ la guudi ba. Aŋ jəəne bə ji bədoonaŋ, aŋ fele werke ciiri kasi Bəraŋ Pep bə minti apəy naŋ pəda. 2Bədoona ana, tam ɗəlaŋ ne aye karman a hulum bə caacaŋ, a naakte kum cuuru minti kaŋ asam la ba. Jəəti bədoona haa kaa gə minti waate kel neeteŋ də kuy təwa giidə *kuli bə toose kə kaanə Ziwifiŋa daana agəjaŋ də kəkəya minti kaŋ aŋkə té la, səma ku tərməyi paapa ada baŋ. Gəəzi, ten waataŋ, kaa teŋ ha'aŋ, yə fəlaŋ werke neeteŋ ne wəra. 3Nəmtiŋ ha'aŋ, tam ɗəlaŋ ne aye karman a hulum bə caacaŋ, əyu du la kir minti kaŋ a əsu ba, koo kaasam gulaŋ a ase karman bə minti kaasam kemer bə jəwaŋ ba. 4Bədoona ana ta, əyu karman la dəgaaya-dəgaaya. Bəram Pep bə minti ase kar gə minti tam əyəy dəgaaya-dəgaayaŋ bə werkem yaŋ cuuru gəm.»
Yeesu hate kaŋ cəərə kel kə tooseŋa
(Liki 11.2-4)
5«Bə minti aŋ ɗəlaŋ ne tooseŋ, aŋ a ji kusrəŋ akas kaa gə minti waate kel neeteŋ də kuy anəkay təwaŋ ba. Yə bele toose neeteŋ haa sə kampa gil-gil giidə *kuli bə toose kə kaanə Ziwifiŋa, daana agəjaŋ də kəkəya minti kaŋ astə té la. Gəəzi, ten waataŋ, yə fəlaŋ werke neeteŋ ne wəra. 6Səma nəmtiŋ ha'aŋ, tam ɗəlaŋ ne tooseŋ, kalə la aləwa gerdəma, gisə ku kuliŋ la dərəma, toosə Bəram Pepeŋ la a ko bə metə-mete toŋa. Kəya Bəram Pepeŋ bə minti ase karman bə minti tam jəw setetiŋ bə werkem yaŋ cuuru gəm. 7A kəkəy bə tooseŋa, aŋ a dogte kel anə petpeti damdi kaa gə minti Pepeŋ paapa də diri baŋ bə jiŋ ana ba. Yə ɗiki haa minti té jəəne bə dogte kela ablaw, Pepeŋ bə əski ku té yaŋ. 8Aŋ a toose də hel neeteŋ ba, gud maa mo Bəraŋ Pepeŋ wəra bə asə-ase karman bə minti aŋ də caaduŋ ajew də bə minti aŋ məntunu kəəsuŋ ɗaw. 9Aŋ ɗəlaŋ toose neŋ, aŋ golə sar kel té la haa kənaŋ:
‹Bar are bə minti apəy daŋ,
kaŋ tokɗə səmam cetceti la gud bə minti tam Pepeŋ.
10Bəəda a ji kumna nəmtiŋ cəərə are.
Doŋ kir minti kaŋ jəə karman bə minti giidim bəluŋ la cəərə seŋkaŋa kəna,
damdi wə bə ji apəya ana gəm.
11Aytə hame bə minti are də tay du daynaŋ la a are.
12Vəəgə giidim la wəra cəərə baymele naareŋa
damdi are vəəgtətəŋ giidə are wəra cəərə kaa gə minti a jəətəŋ baymeleŋ sar areŋ ana gəm.
13A yaakə are bə ve dər kel gə minti Nərtitiŋ ke ku kaŋ diiriŋ ba.
Səma, doo are la wəra kaasa .›
14Bədoona ta, aŋ jəəne bə vəəgtiti giidiŋa wəra cəərə kaa gə minti bə jəətətəŋ baymeleŋa sarəŋaŋ, Bəraŋ bə minti apəy daŋ vəəgi giidu yaŋ wəra cəərəŋa bədoona ana gəm. 15Səma, jəəne minti aŋ paapa bə aye vəəgi bə giidu a kaa gə minti jəŋ baymele sarəŋa baŋ, Bəraŋ Pepeŋ ayaŋ vəəgi bə giidu cəərə baymele nəətiŋa bə gəm.»
Yeesu hate kaŋ cəərə kel kə je də kuŋa
16«Bə minti aŋ jəəne bə *je də kuŋ, aŋ a kole kusrəŋ wəra laawe damdi kaa gə minti waate kel neeteŋ də kuy təwa'iŋ ana ba. Kaa teŋ kole kusri wəra laawe kirka minti kaŋ asə la wəra keɗe minti té bə je də ku té. Gəəzi, ten waataŋ, yə fəlaŋ werke neeteŋ ne wəra. 17Səma nəmtiŋ ha'aŋ, tam jəəne bə je də kum, baadə dərəm la wəra pəsa daana corkə cəərəm la wəra pasa gəm 18kir minti kaŋ a ase minti tam je də kum ba. Asə la haa Bəram Pepeŋ bə minti a ko bə metə-meteŋaŋ təwa. Kəya Bəram bə minti ase karman bə minti tam jəw a ko bə metə-meteŋa bə werkem yaŋ cuuru gəm.»
Yeesu hate kaŋ cəərə bege bə minti apəy naŋ
(Liki 12.33-34)
19«Aŋ a kote cəərə bege nəətiŋ adawra kəna ba, gud bə minti anə atəwerneneŋ daana googoŋ bə ɓəlku wəra, kaa kə dəgaayaŋ bə hiti ku kuliŋ wəra cuuru bə humtu gəm. 20Ɗe nəətiŋ jəə la pisi kir minti Pepeŋ kotə kar pəsaŋ la a nəənəŋ apəy na. A ko toŋ na ha'aŋ, anə atəwerneneŋ daana googo hudruy wəra ba, kaa kə dəgaayaŋ neke bə hiti ku kuliŋ bə gəm. 21Gəəzi, ko bə minti bege nəmtiŋ adaŋ, ku tarməyam ji haa ada na gəm.»
Yeesu hate kaŋ cəərə kel kə ɗiki neeteŋa
(Liki 11.34-36)
22«Gosə gole la kəm, dərəm ha'aŋ akas lampa kə kusruma ana. Jəəne minti dərəm wəra holoŋ, kusrum wəra keɗe dər pəɗakiŋa gəm. 23Jəəne minti dərəm paapa holoŋ baŋ, kusrum wəra keɗe dər tilməŋa .»
Yeesu hate kaŋ cəərə hel də ŋemeŋa
(Liki 12.22-31; 16.13)
24«Hulum bə joŋre neke bə jəw a kəkamna ɓasi ba. Ɗalba wə bele naayaw toŋ daana wə mele dər naayaw toŋ wəra, ɗalba wə he cəərə naayaw toŋ apəya daana wə gole naayaw toŋ wəra ko bə boobo. Aŋ neke bə aye kusrəŋ a Pepeŋ daana a soloy ɓasi keɗe ba! 25Gud teŋa ta, ten waataŋ haa minti: aŋ a yaake ɗiki dəŋ bə lente gud kar kə hame daana kə se gə ji zugiŋa ba daana gud kel kə dəməəmə də tereŋa bə gəm, gud bə minti dədərgə də hulum dəŋaŋ kar kə hameŋ, daana kusru dəŋaŋ dəməəməŋ. 26Aŋ golə la sə kasko gə apəyaŋa, yə jo'e ba, yə ceme kaasaw ba, yə feke kar neete giidə dorgoɗi bə gəm. Anaaŋa Bəraŋ bə minti apəy daŋ əyəy hameŋ haa tó. Aŋ gəm, aŋ dəŋaŋ kaskoŋ kampa ablaw bə mo? 27Mindi aduubə dəŋa neke bə ze laate du ajewa weseka gud laawe bə kusruŋa mo?
28Aŋ lente ɗiki dəŋ wəra gud kel kə dəməəməŋa haa səm mo? Aŋ golə la kəm sə huufi bə giidə akaŋ, yə si haa naanaanə mo? Yə ji joŋre bə gəm, yə ke dəməəmə a kusri bə gəm. 29Ten waate haa teŋ: kumna *Salomoŋ də kusru, də məyan nuutuŋ anə keɗe ɗaw, wə vaŋ dəməəmə pasa suru bə kə huufiŋ ana ba. 30Jəəne minti Pepeŋ gene kaɗəkaw gə minti aŋ fələy dayna giidə akaŋa, anaaŋa dibiini yə vay warna dər cəwaŋ naŋ, wə gənaŋ yaŋ dəŋaŋ teŋ kampa aniinə mo, aŋ gə minti de dəŋ bə kerpə-kerpeŋ? 31Aŋ a yaake ɗiki dəŋ bə lente minti aŋ bə hame, bə se daana bə tere haa maa toŋ moŋ ba. 32Hõye bə golde kar teŋa saksaki ha'aŋ, kaa gə minti Pepeŋ paapa də diri baŋ. Səma nəətiŋ ha'aŋ, Bəraŋ bə minti apəy daŋ wəra bə asə-ase minti aŋ də tay də kar teŋ keɗe. 33Nəətiŋ, aŋ goldə *Kumna kə Pepeŋ la ajewa daana karman bə minti gole duru ɗeker, wə bə ayaŋ kar kaayaŋ teŋ yaŋ ada keɗe. 34Gud teŋa ta, aŋ a ji walka cəərə kel kə dibiiniŋa ba, gud minti walka də kel duŋ haa dər hi toŋa faɗi gəm. Gəəli bə dər hi mundu mundu mo wəra bə nakə-neke, aŋ a ve baalaŋ ada ba.»
Избрани в момента:
MATIYE 6: KERNT05
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Texte de la Bible: Kera © Alliance Biblique du Tchad, 2004.