Lûk 16
16
Ḿgbán mú mu ne Bubong
1Jisos o/sét bǎmgbán emen o/fu, nkéré obónge, nfang-onet obónge o/mû ne ḿgbán obónge mú mu o-tún n ǎ byěm. Ne banet ba-ba-sét nfang-onet ámu ba/fu, ḿgbán emen ámu mu o-bên n ǎ akpuga. 2Otu-onyinchéng ámu o-kó ḿgbán emen ámu o-bâ. Ne o-bí ǎ o/fu, ebóng dyizong-kyiraa něen ńdyí me n/jwo kyi-kim ne wo. Ne o-sét ḿgbán ámu o/fu, tông mě kángkáng banwet ḿbé amu a-tî ng kyi-kim ne byěm ejí. Ké ebóng, wo aa*ba/chi a-chîkyú onet mú odatún byěm ejí*. 3Mú ḿgbán ámu o-kpet ekabe ne dyityém emen o/fu, bonchí ejí o-kú o-bâ mě efîm ké bǎmkpóngé. Kántîk me n/chi n-chi nǎ, ké ebóng, me busa bu*fí mě ḿbú ndakûkpang kyifát*. Nang byěm erém to, éshwân e-chi i mě erém. 4Ne o-waa ányi o-raa o/fu, kántîk nn/nyît ńkyí n/chi n-chi, eringe nyí ké nkéré mú n*fí to n-chi i bǎmkpóngé* n/chi n-firi ne bacín ḿbé bada mě ekoo ba-tî ké byise ebe. 5Ne o-kó kâng kángkáng banet ḿbé ba/mû ba/ryí bonchí emen ámu afwá ba-bâ. O-bí mbwôp kashú-onet o/fu, wo dyifwá ńdyí eyên ńdyí a/ryí bonchí ejí ndyi nǎ. 6Onet ámu o-sét ǎ o/fu, bajam-biidorôm-bakút batánge. Ḿgbán ámu o-sét ǎ o/fu, di nwet eyên i, kyú me a-bwât a-sáng kyísí bajam-biidorôm bafee esim diǐkpú. 7O-chîbí nnyinyěng-onet o/fu, aa wo kâng, ńdyí eyên ndyi nǎ. Mú mǔ o-sét ǎ o/fu, égot-biimbam-esang-byichí nyí badakó wît etánge. Ḿgbán ámu o-sét ǎ o/fu, di nwet eyên i, bwât a-sáng kyísí égot-biimbam enyii. 8Bonchí-kyibî-ḿgbán ámu o-kpee ǎ ké chwǒm-bubong ńkyí o/chi éné. Ké ebóng, banet ḿbé ké ejíí ńnyín mbe ne bubong chwóó ké byěm eníbî, ba-shwôm banet ḿbé mbe ké kiinwángé.
9Ne Jisos o-chîraa o/fu, nké me mu n-sét ng běn n/fu, ryí n̂g bacín ne barî-banet ké bukwóp ḿbú efang, eringe nyí ké nkéré mú efang ányi ee/man, Osówo o/chi o-koo běn o-tî ké kyikit ńkyí dyikpen ńdyí ne banyá. 10Nang yeě nké ba/kye ǎ boǒnyín-byěm o-tî kámbú kanong, ba-man n ǎ ekye to ḿbyí byiryên. Nang yeě nké o*da/man etî boǒnyín-byěm* nang ḿbyí byiryên oo*man etî*. 11Â ben kâng ba*fí ba-man n etî esang nyí ké ejíí* yeě o/chi o-kye běn ochíchí-esang. 12Â ben ba*fí ba-man n etî esang nyí onet okíri* yeě o/chi o-kye běn efang nyí enen ben bayén.
13Ḿgbán o*fí mú odaman etî banchí bafee*. Bonchí obónge o-nyîn n ǎ, mú obónge oo*nyîn ǎ*. O-bángê e byitwóm ḿbyí obónge, ḿbyí mú obónge oo*bángê*. Ben baa*man efé Osówo cibicibi ne akpuga*.
Kyicê-Byiraa ḿbyí Jisos o/raa
(Mátyuu 11:12-13; ne ké5:31-32; Mâk 10:11-12)
14Banet-ncibi mú badakó Fárasyî ba/jwo ńkyín, ba-kpet ejwó Jisos, ké nǎ, akpuga a/mû a-nyîn n kámbé. 15Jisos o-raa ne mbé o/fu, ben nké bamu ba-chi i banet ba-kû běn eri wǎ banet ḿbé banong. Nké Osówo mu o-nyît ng atyém enen. Ké ebóng, ńkyí banet badari ba/fu, nkyi kanong, kyi-nut ng Osówo.
16Byije ḿbyí Músis ne byiraa ḿbyí bamkpábé ḿbé badasét byiraa-Osówo ba/sáng kyísí byi/mû ne busa tete kyi-ba-ribi ké nkéré mú Jǒn mú Nkye banet osoo mú Osówo o/kpet bǎmkpóngé emen echi. Kyi-fím ké nkéré ámu ba-kú ba-sét ng Bǎmpém ḿbé Banong kyi-kim ne Butu ḿbú Osówo. Nang yeě nang yeě mu o-nwa ng o/fu, nyǐ o-nung ng ké Butu ḿbú Osówo. 17Ńkyí bubóng ne esí byidaman, kii*sóng jangjang ne ńkyí kaǎcê-kyije nang ka-sîi nǎ kadawaa kyísí*.
18Nang onyinchéng orá nké o/man dyibé ne onyi emen, o-bé onyi okíri, onyinchéng ámu mu o-chi i kyinam. Onyinchéng to mú mu o-bé ng onyinyi mú oo/man dyibé ne onyinchéng okíri, mu o-chi i to kyinam.
Nfang-Onyinchéng Obónge ne Lázáros
19Nfang-onyinchéng obónge o/mû nkéré obónge, mú o/mû o-bwá ng byídí ḿbyí byidajang eshwane kasî. O/mû o-ryí i to byiryíng ḿbyí byinong kángkáng dyicí, o-kó ng ajî. 20Onyinchéng mú o/mû onet-kyikpu o/mû to obónge, mú o/mû o-bángê e Lázáros. O/mû ne byibáp ké byiko byimúmú. Banet ba/mû ba-yip ng ǎ o-da ng ekyú ké ocím-dyifyi mú nfang-onyinchéng ámu 21ne okabe mú ba/chi ba-kye ǎ ekén-byiryíng nyí nyi e-fím m ké ókpákpúrúk-byiryíng mú onyinchéng ámu e-róng ng kyísí. Bubyî bu/mû mbu bu-bâ ng ebwom to ányi bu-rû ng byibáp ḿbyí Lázáros. 22Onet-kyikpu ámu o-kpú, barím ḿbé banong ba-yip ǎ o-da-kyú kyikit kyibónge ne Ébarahâm ké dyijî ńdyí kyíbóng. Nfang-onet ámu to o-kpú, ba-yip ǎ ba-ryii. 23O-nung ké kiǐtí-busông eri, ké oshê-bakúsí. Ne o-bírî achi kyíbóng o-ri Ébarahâm áku tíbítíbí ne Lázáros ké oo/kyú ányi kyikit kyibónge ne nyǐ. 24Ne o-kó kâng Ébarahâm o/fu, kyítá, ri mě bafip a-twóm Lázáros o-da-lip dyishí-kafwa ké omu o-róngê mě ké kabyíbabang, eringe nyí kada mě echee, ké nǎ, me mu ké kiǐtí-busông kanong kanong, ké kafâ-okwâ mún. 25Nké Ébarahâm o/sét ǎ o/fu, zîim, ǎ wǎn ejí, a/fu, ké nkéré wo a/mû ké ejíí, wo a/mû ne kángkáng byěm ḿbyí byinong, Lázáros o/mû ne kángkáng byibî-byěm. Nké kántîk Lázáros o/firi nyín ké bunyîn-dyityém, wo a/firi ké busông eri. 26*Chí nang éné nké nke* kiǐríbíríbí-dyibíng nkyi bě ké otyém ne otyém mú kyikit ńkyí wo amu ne ńkyí be byimu, ńkyí â banet mbe ba-ryuu ng ba/fu, mbé ba-nyáng ng ba-bâ ké kyikit ńkyí wo amu, baa*man enyáng*. Nang onet to oo*man enyáng ké kyikit ńkyí wo amu o-bâ ké ńkyí be byimu*. 27Nfang-onet ámu o-raa o/fu, n/tîm ǒ arông, ǎ kyítá, twóm Lázáros o-ca ké kyise-bonchí ejí, 28o-da-kuri bwǎn-bané ejí ḿbé banyinchéng ashí atánge ekó, eringe nyí mbé baa*ba/chi ba-bâ ké kyikit ńkyín ńkyí busông eri*. 29Ébarahâm o-sét ǎ o/fu, bwǎn-bané eyên mbe ne Músis ne bamkpábé ḿbé badasét byiraa-Osówo, ḿbé badakuri kámbé ekó. Bajwo ńkyí mbe ba-sét ng kámbé. 30Mú nfang-onet ámu o-faa ǎ o/fu, baa*ba/chi ba-jwo kámbé* ǎ Ébarahâm mú bonchí ejí*. Nké â onet o/jwóbê ké bukyû o-da-sét kámbé, byiko byi/chi byi-kpú kámbé ba-mîng byibî echi. 31Nké Ébarahâm o/sét ǎ o/fu, â ba*da/jwo ńkyí Músis ne bamkpábé ḿbé badasét byiraa-Osówo mbe ba-sét ng kámbé* nang onet o-bwa o-jwóbê ké bukyû, baa*ba/chi ba-jwo ǎ*.
Избрани в момента:
Lûk 16: BKY
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the Bible Society of Nigeria @ 1985