Lûk 14
14
Jisos o/chi Onyinchéng Obónge mú mu o-rwôm m o-nyange
1Ké dyicí-ékwâbashi dyibónge, Jisos o/ce byiryíng edaryí ké kyise ńkyí kiǐtí-onet kyibónge ńkyí nkyi ké ncibi mú badakó Fárasyî. Banet ba/mû ányi ba-kpúrî ng Jisos dííng. 2Onyinchéng obónge mú o/mut byiká ne abwô o-byí o-ba-kâm Jisos. 3Ne Jisos o-raa ne bantánge Byije-Músis ne banet-Fárasyî ḿbé ba/mû ányi, o-bí kámbé o/fu, kyije eten kyi/bángê kyi/fu, bachi onet-kyirwóm o-nyange ké dyicí-ékwâbashi aa, aa kyi*da/bángê*.
4Nké mbé ba*da ǎ efaa nang ojá*. Jisos o-níbî onyinchéng ámu o-chi ǎ o-nyange, o-sét ǎ o/fu, ca dyijê. 5Ne o-raa kâng ne banet ámbe o/fu, â onet nang obónge ké burwám enen mu ne wǎn-onyinchéng nang mpong. Nké â o/róng ké dyibíng-omu ké dyicí-ékwâbashi, onet ámu oo*ba/chi o-fîm ǎ babap o-tî kyíjí ké dyicí-ékwâbashi dí*.
6Nké mbé ba*da ǎ eman efaa ojá kyi-kim ne kyiraa ńkyín*.
Ofê ne Dyízígí
7Jisos o/ri eringe nyí kyicê-banet bakíri ḿbé ba/kó kámbé ké dyijî ándyi mbe ba-cá ng bukyúng ḿbú bunong bunong ba-kyú u. Ne o-tím kámbé dyitím-ekan ńdyín ashí ebe amúmú 8o/fu, â onet o/kó ǒ ké dyijî-dyibé, *dachi a-shwôm a-da-kyú ké kakyúng ńké kiǐtí*. Ké ebóng, kyi-man n ekyú onet okíri mu áku mú o/rêe o-shwôm ǒ, mú ba/kó ǎ to ké dyijî ándyi. 9Kyi-fím ányi oyén-dyijî mú o/kó běn éné ashí amúmú o/chi o-bâ o-kâm ǒ, o-sét ǒ o/fu, mîng onet mún o-kyú nyín. Kyi-fím ányi éshwân e/chi e-wuri ǒ, a-bwa esim a-da-kyú ké kakyúng ńké kyísí kyísí. 10Nké â onet o/kó ǒ ké dyijî, shwôm a-da-kyú ké kakyúng ńké kyísí kyísí, eringe nyí oyén-dyijî oda ǒ ebasét o/fu, ocín ejí, dim a-ba-kyú kwán ké kakyúng ńké kiǐtí. Ńkyín kyi/chi kyi-kye ǒ ofê ké bushú ḿbú kángkáng banet ḿbé mbe ányi. 11Ké ebóng, nang yeě nké o/kúng byiko emen kyíbóng kyíbóng, Osówo o/chi o-bwa ne nyǐ kyísí. Nang yeě to nké o/bwa ne byiko emen kyísí kyísí, Osówo o/chi o-bêem ǎ o-jâ kyíbóng.
12Jisos o-raa kâng ne mú onyinchéng mú o/kó ǎ byiryíng éné o/fu, â a/chi dyijî ńdyí esû nang ńdyí dyikurúku, *dachi a-kó bacín eyên* nang bwǎn-bané eyên* nang kyikû-banet eyên* nang barî-banet eyên ḿbé mbe ne akpuga*. Ké ebóng, mbé ba/chi ba-kó ǒ to ké dyijî ebe, ne ké bukwóp ḿbún kâng ba/chi ba-só ǒ byěm eyên ḿbyí a/mû a/kye kámbé. 13Nké â a/kó dyijî, kó banet-byikpu ne bambyíryi bakwón ne bankwa ne bansêe achi, 14ne Osówo o/chi o-jware ǒ. Ké ebóng, mbé baa*ba/chi ba-man ǒ esó byěm eyên*. Osówo nké o/chi o-só ǒ byěm eyên ké nkéré Osówo o/chi o-jwóbê banet ḿbé banong ké bukyû.
Dyitím-Ekan kyi-kim ne Kiǐtí-Dyijî
(Mátyuu 22:1-10)
15Onyinchéng obónge mú o/mû o-ryí i to byiryíng ányi o/jwo ńkyín, ne o-raa ne Jisos o/fu, bunyîn-dyityém mbu ne banet ḿbé ba/chi ba-kyú ké dyijî ńdyí Butu ḿbú Osówo.
16Jisos o-sét onyinchéng ámu o/fu, nkéré obónge, onyinchéng obónge o/kó kiǐtí-dyijî ńdyí o/sét banet chwóó o/fu, babâ. 17Ké nkéré mú nkéré o/fyi mú odakpet dyijî ándyi echi, o-twóm ḿgbán emen o/fu, oda-sét banet ámbe ḿbé nyǐ o/kó kámbé dyijê o/fu, bâ ng, baa/rám byiryíng ba-tî. 18Nké banet ḿbé onyinchéng ámu o/mû o/kó kámbé dyijî éné ba/kpet esét ké onet ké onet ba/fu, byěm byi/fárâng kámbé. Mbwôp kashú o/sét ḿgbán ámu o/fu, me n/ré dyikán-kyifát, nké m-man n-da-ri kándyí. Kamgbe, *dachi a-sa kafâ. 19Nnyinyěng-onet o-sét ǎ o/fu, me n/ré bampong diǐkpú, nké kántîk me n-kú n-dim m n-da-kan kámbé n-ri. Kamgbe, *dachi a-sa kafâ*. 20Mú obónge to o-chî ǎ esét o/fu, abeabe nké me m/bé onyi, ké bubwô ámbu me mm*man ebê*. 21Ḿgbán ámu o-bwa esim o-da-sét bonchí emen ámu byěm ámbyi kángkáng. Dyityém dyi-sa bonchí emen ámu. Ne o-sét ḿgbán emen o/fu, ca babap áku ké étíbingé ne ké byiká-oshê a-da-kpî banet-byikpu ne bambyíryi bakwón ne bansêe achi ne bankwa ba-bâ. 22Ka*da/bwon* ḿgbán emen ámu o-bwa esim o-ba-sét bonchí emen ámu o/fu, kyítá, nn/chi eringe nyí a/sét mě, nké mpât o/tôong mú banet bakíri badachîbê. 23Ne bonchí emen ámu o-chîraa kâng ne ḿgbán ámu o/fu, dim a-ca ké bandûm-bukwóp ne ké biǐfáng ḿbyí banet-byirwóm mbe ba-kyú u ba-rém m byěm a-da-kó banet ba-bâ, eringe nyí kyise ejí kyidasú. 24Ne bonchí emen ámu o-sét kámbé o/fu, me mu n-sét ng běn n/fu, nang onet obónge ké burwám-banet ámbe ḿbé m/mû n/kó kámbé dyijî ńdyín o*fí to mú o/chi o-chîfwôo byiryíng ejí*.
Ńkyí Onet odachi ne o-firi Ḿgbán mú Jisos
(Mátyuu 10:37-38)
25Bujê-banet chwóó ba/mû mbe ba-câ ne Jisos ké kyikû. Jisos o-pín achi o-raa ne mbé o/fu, 26nang yeě nké o/bê o-kâm mě, oo*man ekyú ḿgbán ejí* tete o-né bonchí emen ne boné emen ne onyi emen ne bwǎn emen ne bwǎn-bané emen ne byiko ḿbyí emen nyǐ oyén to. 27Nang yeě nké o*da/tû kyikwap emen ńkyí bada ǎ eshwân* o-bâ ne me ké kyikû* oo*man ekyú ḿgbán ejí*.
28Â onet obónge ké burwám enen mu o-kabe ng o/fu, nyǐ o-bi ng enyóng, o-kyú u kpá me o-kabe kyi-kim ne akpuga nyí enyóng ányi e/chi e-ryí ǎ, eringe nyí o/chi o-nyît â nyǐ o/chi o-já akpuga nyí odabi kányí e-man. 29Â o*da/chi éné* oo*ba/chi o-man eman kányí* ké nkéré oo/kpet kyikû* ne kángkáng banet ḿbé ba/ri kányí ba/chi ba-kû ǎ ejwó ba/fu, 30onyinchéng mún o/kpet enyóng ebi, nké o*fí to o-man n eman kányí*.
31Â otu obónge mú mu ne bajam-égot-banet batánge o/dim byití edanwa ne otu okíri mú mu ne bajam-égot-banet diǐkpú, otu ámu o-kyú u kpá me o-kabe â nyǐ o/chi o-man enwa ne otu mú áku. 32Â o/nyît o/fu, nyǐ oo*ba/chi o-man enwa* o-twóm m banet-kyitwóm ba-kâm otu mú áku ké nkéré mú otu ámu o/tôong tíbítíbí o/fu, bachi kyikwáré.
33Jisos o-raa ké nkuli kyikû o/fu, ké bukwóp ámbu bubónge, onet o*fí mú odaman ekyú ḿgbán ejí* tete o-pwó kángkáng byěm ḿbyí nyǐ mu ne mbyí.
Bano ḿbé ba*fí to ne Bunyîn*
(Mátyuu 5:13; Mâk 9:50)
34Bano mbe kiǐtí-chwǒm. Nké â bano ba*fí to ne bunyîn ké byiko* bukwóp bu*fí ḿbú adachîman echi kámbé ba-firi ne bunyîn*. 35Baa*nwa to ḿbé adafé ké esí, byiryíng byi-kûnwa* nang ḿbé adayip a-cibi ne ecing-kiǐbyímbíng nyí badafé ké byíkwôn byi-nwa*. Ba-yip ng bano ámbe ba-pwó. Fwôo n̂g atông kâng ba-jwo, â bamu ne atông nyí badajwo.
Избрани в момента:
Lûk 14: BKY
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the Bible Society of Nigeria @ 1985