Lûk 1
1
Byiraa ḿbyí Kiimkpet Kyikû
1Tyiyófólos mú onet-kyijé ejí, banet chwóó ba/chi kanong ńké ba/sáng ejá kyísí kyi-kim ne byěm ḿbyí bii/chi ké burwám eten. 2Mbé ba/sáng byěm ḿbyí ba/mû baa/sét bě, ḿbyí banet ḿbé ba/ri byěm ḿbyín ké achi ebe kyi-fím ké kiimkpet kyikû, ne ba-sét kámbyí kyíjí. 3Nké ké butu eyên, ké nǎ, me nn/kwâa byěm ḿbyín kanong kanong kyi-fím ké kiimkpet kyikû, ne n/kabe n/fu, nkyi kanong ńkyí ndasáng byěm ḿbyín kerededet n-kye ǒ. 4Me mu n-chi i ńkyín, eringe nyí wo a/chi a-nyît kángkáng ntûntû kyi-kim ne kángkáng byěm ḿbyí ba/mû ba/tángê ǒ.
Ba/sét kyi-kim ne Ofwon mú Jǒn mú o/mû o-kyâ Banet Osoo mú Osówo
5Ké nkéré mú Otu Hérot o/mû otu mú Ézerel, nchi kyifen-Osówo obónge o/mû ányi mú o/mû o-bángê e Zákaryâ, mú o/fím ké kyikû ńkyí nchi kyifen-Osówo obónge mú odabángê Abyíja. Onyi emen o/mû o-bángê e Elízábet. Nyǐ to o/mû o/fím ké kyikû ńkyí banchi kyifen-Osówo. 6Mbé ashí amúmú ba/mû ba-kyú u akpen nyí anong ké bushú ḿbú Osówo. Ne ba/mû ba-tî ng to kángkáng byije ḿbyí Otu Kyítá kerededet. 7Mbé ba/mû ba*fí ne bwǎn* ké nǎ, Elízábet o/mû bukwom. Nyǐ ne Zákaryâ ba/mû baa/kâa!
8Dyicí dyibónge, Zákaryâ o/mû mu o-chi i bǎmkpóngé emen wǎ nchi kyifen-Osówo o-kyâ Osówo. Kyi/mû nkéré mú emen ké bǎmkpóngé ḿbé mbe ba-chi i kángkáng dyicí. 9Ké édúú nyí banchi kyifen-Osówo ba/mû ba-chi i, ba/mû ba/fîm ǎ ké dyímám ńdyí ba/twóp, ne dyi-cá ǎ ba/fu, oda-mee burwan o-tî ké kyikit ńkyí badamee kámbú ba-tî. Ne nyǐ o-da-nung ké kiǐtí-kyise-kyifen-Otu Kyítá echi. 10Bujê-banet ḿbé kwán ba/waa kwán kyíjí mbe ba-fâ nshwam ké ochíchí-nkéré ámu mú nyǐ mu o-mee ng burwan ámbu. 11Orím mú onong mú Otu Kyítá o-byí o-kâm ǎ, o-bwom ké kyicê-bubwô-etyebéng ḿbú kyikit ńkyí mbe ba-mee ng burwan ba-tî. 12Ké nkéré Zákaryâ o/ri ǎ, kyi/chi ǎ yógeyóge, bushî bu-róng ǎ. 13Nké orím mú onong ámu o/raa ne nyǐ o/fu, *dachi a-shî* ǎ Zákaryâ*. Osówo oo/jwo nshwam eyên. Onyi eyên Elízábet o/chi o-fwon ǒ wǎn-onyinchéng. A/chi a-fé ǎ dyizîn ńdyí dyidabángê Jǒn. 14Wo a/chi a-jêe, a-firi ké bunyîn-dyityém. Bujê-banet bakíri to ba/chi ba-kyú ké bunyîn-dyityém ké nkéré mú ba/chi ba-fwon ǎ. 15Nyǐ o/chi o-kyú kiǐtí-onet ké bushú ḿbú Otu Kyítá. Oo*man o-jwáp bato nang bará nang bará* aciringaciring ḿbé badabwóm. Kyi-fím ké nkéré mú ba/chi ba-fwon ǎ, nyǐ o/chi o-kyú ne busa ḿbú Busun-Osówo. 16Nyǐ o/chi o-kpî bujê-banet ḿbé Ézerel, o-bwa ne mbé esim o-kye Osówo Óburúkpâbí. 17Nyǐ o/chi o-bwóp ǎ kashú ne busa ne Busun-Osówo wǎ mkpábé mú odasét byiraa-Osówo, mú o/mû o-bángê e Elája. Nyǐ o/chi o-chi banchí ne bwǎn ebe ba-chîcibi kyikit kyibónge. O/chi o-chi banet ḿbé mbe ba-né ng byěm-Osówo echi ba-firi ké kiǐfáng ńkyí okabe mú banet ḿbé mbe kanong. O/chi o-chi banet ḿbé Otu Kyítá ba-kpá byiko, ba-kyú ba-kû ǎ ebám.
18Zákaryâ o-raa ne orím mú onong ámu o/fu, me n-cen n nǎ ne n-nyît, â ńkyín nkyi ntûntû. Me n-chi i okâa-onet, ne onyi ejí to oo/kâa.
19Orím mú onong ámu o-sét ǎ o/fu, me m-bángê e Géberel. Me mu m-bwom m ké bushú ḿbú Osówo mú o/twóm mě o/fu, me mba-sét ǒ bǎmpém ḿbén ḿbé banong. 20Nké wo a*da/bángê kyitwóm ejí ńkyí me n/sét ǒ* ńkyí kyi/chi kyi-kyú ntûntû ké ochíchí-nkéré emen*. Ké bubwô ḿbú wo a*da/bángê ńkyí me n/sét ǒ*, wo aa*ba/chi a-chîman eraa kyiraa*. Wo a/chi a-waa kiǐmyímé tete dyicí ńdyí kyi/chi kyi-chi ntûntû wǎ eringe nyí me n/ryí ǒ ocím.
21Ké kyikim-nkéré ánkyi, banet ba/mû mbe ba-bwom m Zákaryâ, ba-kabe ng kyi-kim ne ńkyí kyi/chi ne mú mǔ mu o-jang ng ebwon éné ké kafâ-kiǐtí-kyise-kyifen-Osówo echi. 22Ké nkéré mú nyǐ o/byí kâng, o*fí to o-chî ng eman epem ne mbé* ne ba-waa ányi ba-nyît ba/fu, mú mǔ oo/ri orím ké kafâ-kiǐtí-kyise-kyifen-Osówo echi. Ké eringe nyí o*fí to o-man n eraa* nyǐ o/tông kámbé ekap ké abwô ábwo.
23Ké nkéré mú kyikim-nkéré ńkyí emen ńkyí odachi bǎmkpóngé ké kiǐtí-kyise-kyifen-Osówo echi kyi/man, Zákaryâ o/bwa esim o-jâ ké kyise emen. 24Ka*da/chîrí* onyi emen Elízábet o-koo dyifít. O*da/tigi o-byí kyíjí* ké etukáku jangjang etánge*. 25Elízábet o-raa o/fu, kántîk, ké nkuli kyikû, Otu Kyítá oo/chwáp mě ké bukwóp ḿbún. Oo/fîm mě éshwân ké bushú-banet.
Ba/sét kyi-kim ne Ofwon mú Jisos
26Ké nkéré mú dyifít ńdyí Elízábet dii/rí etukáku nyâchât, Osówo o-twóm orím mú onong mú odabángê Géberel o-ca Názáret ké Gályílyi. 27O/mû ne kyitwóm ńkyí odasét wǎsíng-onyinyi mú ba/mû ba-ryí i búkyî ne onyinchéng mú o/mû o-bángê e Josêf, mú o/mû o/fím ké kyikû-banet ńkyí Otu Dívit. Mú wǎsíng-onyinyi ámu o/mû o-bángê e Méryi. 28Orím mú onong ámu o/bê o-kâm ǎ, ne o-raa ne nyǐ o/fu, bunyîn-dyityém bukyú ne wo. Otu Kyítá mu ne wo. Ne o/jware ǒ kanong kanong.
29Ejá nyí orím mú onong ámu o/raa éné e/yógê Méryi ké dyityém kanong kanong. Ne o-kpet ekabe kyi-kim ne eringe nyí kyikû-byiraa ámbyi byi/byí. 30Orím mú onong ámu o-raa ne nyǐ o/fu, Méryi, *dachi a-shî* ké nǎ, Osówo oo/tông ǒ kanong emen. 31Wo a/chi a-koo dyifít a-fwon wǎn-onyinchéng, ne a/chi a-fé ǎ dyizîn ńdyí dyidabángê Jisos. 32Nyǐ o/chi o-kyú kiǐtí-onet, ne ba/chi ba-kû ǎ ekó Wǎn-Osówo, Osówo mú mu kyíbóng kyíbóng. Osówo Óburúkpâbí o/chi o-kúng ǎ butu, wǎ eringe nyí bonchí emen mú kpákpá mú odabángê Otu Dívit. 33Nyǐ o/chi o-kyú Otu mú ne banyá ké kyikû-banet ńkyí Jekôp. Butu emen boo*ba/chi bu-man ne banyá*.
34Méryi o-sét orím mú onong ámu o/fu, me n*da/nyît ne onyinchéng*. Aa ńkyín kyi-cen n nǎ ne kyi-chi.
35Orím mú onong ámu o-faa ǎ o/fu, busa ḿbú Busun-Osówo bu/chi bu-ba-nung ǒ ké byiko. Ké bukwóp ḿbún, wǎn mún mú onong ba/chi ba-kû ǎ ekó Wǎn-Osówo. 36Zîim wǎn-boné eyên mú odabángê Elízábet. Banet mbe ba-sét ng ba/fu, mú mǔ oo*fwon*. Nké nyǐ kántîk, etukáku e/firi nyâchât nyí o/koo dyifít, nang ké oo/kâa éné. 37Ké nǎ, chwǒm kyi*fí nang kyibónge ńkyí Osówo oo*man echi*.
38Méryi o-raa o/fu, me n-chi i ḿgbán mú Otu Kyítá, kyi/bát kyichi mě wǎ eringe nyí wo a/sét. Ne orím mú onong ámu o-dim o-mîng ǎ.
Méryi o/dari Elízábet
39Ka*da/chîrí* Méryi o-kpá byiko o-dim ochéé óchee ké oshê mú eku éku. O-da-ribi ké oshê obónge mú mu ké Judyâ. 40O-da-nung ké kyise ńkyí Zákaryâ, o-ta Elízábet kyiraa. 41Ké nkéré mú Elízábet o/jwo kyiraa ńkyí Méryi o/ta ǎ éné, wǎn o-dim ǎ ké dyifít. Busa ḿbú Busun-Osówo bu-sú Elízábet ké byiko, 42ne o-raa ne ejá kyíbóng kyíbóng o/fu, wo nké Osówo oo/jware ǒ o-shwôm kángkáng barî-banyinyi, ne ojware okyú to ne wǎn mú wo a/chi a-fwon. 43Ebóng kyi/chi ne kiǐtí-chwǒm ńkyín kyi-chi mě, ńkyí boné-Otu Kyítá ejí o/bê mě ebari. 44Ké ebóng, ké nkéré mú n-jwo ng kyiraa eyên ńkyí a/ta mě m-bâ, wǎn mú mu mě ké dyifít o/nyíp ne bunyîn-dyityém. 45Bunyîn-dyityém mbu ne wo kanong kanong ké eringe nyí wo a/bángê a/fu, kyitwóm ńkyí Otu Kyítá o/twóm ba-ba-sét ǒ kyi/chi kyi-chi ntûntû.
Okwan-Akpee mú Méryi
46Méryi o-raa o/fu,
dyityém ejí ndyi dyi-kpee ng Otu Kyítá,
47busun ejí mbu bu-jêe ng ké bubwô ḿbú Osówo
mú mu Onet-Onyii ejí.
48Ké nǎ, nyǐ oo/zîim mě me mú mu ḿgbán emen, mú kyísí kyísí.
Kyi-fím kántîk kyi-ca kashú,
kángkáng banet ba/chi ba-kûraa kyi-kim ne bunyîn-dyityém ejí,
49ké bubwô ḿbú biǐtí-byěm ḿbyí Osówo mú o/rêe o-shwôm oo/chi mě.
Dyizîn emen ndyi kanong.
50Nyǐ o-ri ng banet ḿbé mbe ba-shî ng ǎ bafip,
kyi-fím ké kyitông-banet kyibónge
tete kyi-ribi ké kyikíri.
51Nyǐ o/tan bubwô emen ḿbú mbu ne busa,
o-byiryi bantông byiko ne kángkáng ekabe ebe.
52Nyǐ o/shû biǐtí-batu ké bukyúng-batu ebe,
o-yip banet ḿbé kyísí kyísí o-tî kyíbóng.
53Nyǐ o/kye banrwôm esong byěm ḿbyí byinong,
o-ró banet-esang ba-dim abwô ábwo.
54Nyǐ o/tî ocím mú nyǐ o/mû o/ryí ne banchí eten ḿbé kpákpá.
O-bâ ebachwáp oshê eten Ézerel mú mu ḿgbán emen.
55Nyǐ o/zîim o-ri Ébarahâm bafip
ne kángkáng bwǎn ḿbé ba/fím ké kyikû emen,
ne banyá ne banyá.
56Méryi o/rí chwǒm wǎ etukáku echât ne Elízábet, ne o-bwa esim dyijê ké oshê emen.
Ofwon mú Jǒn mú o/mû o-kyâ Banet Osoo mú Osówo
57Nkéré o-ba-fyi mú Elízábet odafwon, ne o-fwon wǎn-onyinchéng. 58Barî-banet emen ne bwǎn-bané emen ba-jwo kiǐtí-kanong ńké Otu Kyítá o/chi ǎ éné, ne mbé ashí kángkáng ba-jêe ne nyǐ.
59Ké nkéré wǎn oo/rí kyipyán kyibónge, banet ba/bê ba/fu, mbé ba-bâ dyicên ńdyí ba/chi ba-cên ǎ. Ba/mû ba/chi ba-fé ǎ dyizîn ńdyí bonchí emen Zákaryâ. 60Nké boné emen o/sét kámbé o/fu, aa*wááng* dyizîn ńdyí ben ba/chi ba-fé ǎ dyi-bángê e Jǒn.
61Mbé ba-sét ǎ ba/fu, onet o*fí ké kyikû eyên mú mu o-bángê e dyizîn ándyi*. 62Ne ba-raa ne bonchí ké abwô, ba-bí ǎ dyizîn ńdyí nyǐ mu o-ryuu ng o/fu, bafé wǎn emen.
63Zákaryâ o/fu, bakye ǎ kiǐbáá-nwet. Ne o-sáng ányi o/fu, dyizîn emen dyi-bángê e Jǒn. Kángkáng banet kyi/chi kámbé wǎ chwǒm-akat. 64Ké abe ányi, Zákaryâ o-chîkpet eman eraa kyiraa, ne o-kpet ekye Osówo akpee. 65Barî-banet emen ḿbé ba/mû ányi ba-firi ne bushî. Ne bǎmpém ḿbé byěm ḿbyí byi/chi něen ba-káng ké kángkáng eshê nyí nyi eku éku, nyí nyi ké Judyâ. 66Nang yeě nang yeě mú o/jwo kánkyí o/kabe kyi-kim ne nkyí, o-bí o/fu, wǎn mún o/chi o-kyú ebóng dyizong-onet. Kyi/mû kyi/tông wááng kyi/fu, busa ḿbú Otu Kyítá bu/mû ne nyǐ.
Byiraa-Ekpábé ḿbyí Zákaryâ o/raa
67Busa ḿbú Busun-Osówo bu-nung Zákaryâ mú bonchí-Jǒn ké byiko, ne o-raa wǎ mkpábé mú odasét byiraa-Osówo o/fu,
68bâ n̂g byi-kye Osówo Óburúkpâbí mú banet ḿbé Ézerel akpee.
Ké nǎ, nyǐ o/bê echwáp banet emen
ne o-chi kámbé ba-firi ké byiko ebe.
69Nyǐ o/twóm bě kiǐtí-Onet-Onyii
mú o/fím ké kyikû ńkyí ḿgbán emen mú odabángê Otu Dívit.
70Ké kyikim-nkéré ńkyí kyi/shwôm ké esim,
ké ocím mú bamkpábé ḿbé badasét byiraa emen ḿbé banong,
Osówo o/sét chwǒm ńkyín.
71Nyǐ o/ryí ocím o/fu,
nyǐ o/chi o-nyii bě ké abwô nyí banet-bushwôn eten,
ne ké abwô nyí busa ḿbú kángkáng banet
ḿbé be byimu byi-sa ng kámbé kafâ.
72Nyǐ o/sét o/fu, nyǐ o/chi o-ri banchí eten ḿbé kpákpá bafip,
ne o-zîim to ocím emen mú nyǐ o/ryí ne o-sem byiko emen.
73Nyǐ o/ryí Ébarahâm mú o/mû bonchí eten mú kpákpá ocím mú shwaneshwane.
74Ne o-sem o/fu, nyǐ o/chi o-nyii bě
ké abwô nyí banet-bushwôn eten,
ne o-mîng bě byi-kû ǎ efé
ké bukwóp ḿbú be bii*kyú to ne bushî*.
75Eringe nyí be byi/chi byi-kyú ké kanong
ne ké bukwóp ḿbú banet ḿbé ba/kwárê ké bushú emen,
kángkáng ací, ké dyikpen eten.
76Wo wǎn ejí, ba/chi ba-kû ǒ ekó mkpábé mú odasét byiraa-Osówo,
mú Osówo mú mu kyíbóng kyíbóng.
Wo a/chi a-bwóp Otu Kyítá kashú,
a-da-bwât bukwóp emen a-tî ǎ.
77A-da-sét banet emen a/fu,
o/chi o-nyii kámbé ké byibî ebe epwoo.
78Ké nǎ, Osówo eten o/cángê dyityém,
o-ri ng to banet bafip.
Nyǐ o/chi o-chi esû nyí onyii eten nyí ragerage
e-san bě ké byiko,
79ne e-kye kiinwángé ńkyí kyi/fím kyíbóng
kyi-ta kángkáng banet
ḿbé mbe ba-kyú u ké kiǐríribí ńkyí bukyû.
Eringe nyí nyǐ o/chi o-tông bě kyiká-bucen
ńkyí kyidaribi ké kiǐfáng ńkyí bunyîn-dyityém.
80Ne wǎn ámu o-kán, o-rêe ké enyam-byiko ne dyityém. Nyǐ o/mû o-kyú u ké kyikim-dyikán tete dyicí ńdyí nyǐ o/chi o-byí wááng o-kâm banet ḿbé Ézerel.
Избрани в момента:
Lûk 1: BKY
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the Bible Society of Nigeria @ 1985