Mwamulizo 9
9
I cilagane co Mulungu na Noha
1U Mulungu yakawalugutiza Noha ne wanagwe, yakawatya, “Ale, mwilele mwinjipe muno muno, no kuyimemya yinze. 2Ne vilimu vyose, ne zindeje zose zono zikwanga mucanyha, ne viwumbwa vyose vyono vitambalaga hasi, hamonga ne zisomba zose, vivyo vyose vyowa vina woga vikumogopenyi nyenye. Hambi vyose vivyo nha mwapegwa, navyo vili mu miwoko yenyu. 3Ne vilimu vyose i vyumi, avyo vyowa yo ndigwa yenyu, nha vyono namupelenyi vilimwa yiwe yo ndigwa yenyu. 4Langa mulecele lukulu kulya nyama yono yina ne sakami yayo, vyono wumi wuli mumo mu sakami. 5U munhu wo wose mono kowulaga munhu muyagwe, yuyo nayo kolipicizwa. Kanyhi nowulipiciza ko wuwulagwe, u mutugo wo wose wono wowulaga munhu.
6“Hambi u munhu nha yawumbwa ku futa yo Mulungu.
Holeka munhu wo wose mono komuwulaga munhu,
u munhu yuyo nayo kowulagwa na munhu muyagwe.”
7“Holeka anye mwilele mwinjipe,
mwilele ko winji sunga muyimemye yinze.”
8Kanyhi Mulungu yakawalonjela Noha ne wanagwe yakatya, 9“Aluno nghunoza cilagane cangu na nyenye hamonga no lulelo lwenyu lwa hanyuma yenyu, 10kanyhi na kuli viwumbwa vyose vyumi, ne zindeje, ne zi mitugo, ne vilimu vyose vya mu mbago, vyose vyono vilawiye mu Safina, hamonga nanye. 11Ane nghucikangaza i cilagane cangu na nyenye, nha vyono si nolokongomezeza lukulu kanyhi kwe lihwazi lye malenga i viwumbwa vyumi, hamba lihwazi lye malenga si lilejelela lukulu kanyhi ho lyongomeze yinze. 12Na acino co citanjilo ce cilagane cono nghuciwika muli'ne na nyenye, hamonga ne viwumbwa vyumi vyose vyono vili hamonga na nyenye, sunga ku zindelo zono zikuza hanyuma. 13Ane nghuwika licilalyambwa lyangu mwi'vunde, nalyo lyowa co citanjilo ce cilagane cangu ca kuli'ne ne yinze. 14Na mu mapango go gose, lono noyigubiciziza yinze ne mavunde, nalyo licilalyambwa kolo likwijela mu mavunde, 15ale baho nane nocikumbucila i cilagane cangu ca kuli'ne na nyenye, hamonga ne viwumbwa vyose vyumi. 16Nalyo lilyo licilalyambwa, kolo lyejela du mu mavunde, nane noliwona, no kukumbucila kamonga i cilagane cico ce cibitilila cono cili kuli'ne ne viwumbwa vyose vyumi. 17Na cico co citanjilo ce cilagane cono nakondya kuciwika kuli'ne ne viwumbwa vyose vyumi vyono vili mono'nze.”
Noha ne wanagwe
18I wana wa Noha wono walawila mu Safina, wali wa Semu na Hamu na Yafeti. Hamu yakawa yo sogwe wa Kanani. 19Na wawo wo wana wa Noha, wono ku wulawilila muli wene, i wanhu wakatandala mu yinze yose. 20Nayo Noha, yali mulima migunda mono, nayo yali yo munhu mulongozi wo kulima no mugunda we mizabibu. 21Na lono yali yaying'wa divayi no kugala, hodu yakawa kugona mwi'hema lyakwe yali cipwi. 22Nayo Hamu u sogwe wa Kanani, yakaciwona i cipwi co sogwe, hanyuma yakawa kubita kunze, yakawa kuwalonjela wawalya i wanduguze wejete wa Semu na Yafeti. 23Nawo wa Semu na Yafeti, wakawa kusola mwenda, wakawutandakula wakawa kuwutandaza mu mawega gawo. Wakawa kubita cinya mugongo, no kumufunika u sogo yawo. Hamba si wenda no kumulanga u sogo yawo, hamba ne cipwi co sogo yawo, si waciwona yaye. 24Nayo u sogo yawo yali yeza kwenzeluka mu wugale wakwe, no kumanya vyono yamutendeye u mwanagwe mudodo, 25hobaho yakawa kutya,
“Kanani yalijitwe!
Nayo kowa muwanda kuli wanduguze.”
26Kanyhi yakatya,
“Nayo Semu, u Mulungu wangu yamulugutize
Nayo Kanani yaweze muwanda wa Semu.
27U Mulungu yamonjeleze Yafeti
Nayo yekale mu mahema ga Semu.
Nayo Kanani yaweze muwanda wa Yafeti.”
28Ne lihwazi lye malenga lyali lyeza kupuluta, Noha yakekala myaka magana madatu na makumi mahano, 29Nayo yakafwa yena myaka magana yicenda na makumi mahano, ga mu wikale wakwe wa mono'nze.
Избрани в момента:
Mwamulizo 9: LLKWW
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Cigogo Bible © Bible Society of Tanzania, 2002.