Sofonías 1
1
Llan gaklla Xanllon
1Di'll nin bzene Diozen Sofoníazen, lla ka' bnebia Josíazen, xhi'nn Amón, bnebie'e gan nzi Judá. Sofonías guke xhi'nn Cusí, na be'nn ni guke xhi'nn Guedalías, be'nn ni guke xhi'nn Amarías na be'nn ni guke xhi'nn Ezequías.
2Kin ba bnee Xanllon:
Wachochj walana dukenaken
yoyte da sjade raw yell-li'on.
3Wlleyia be'nn nach, na rente bayix ka', wlleyia ba ka' zajzu xhire, na rente ba ka' zajlla lo nis,
guna ke wxinj be'nn wednay ka',
na walana be'nn nach ka' raw yell-li'on.
Kan ba bdixjwe Xanllon:
4Konen taka ki wlleyia'a yell ke Judán,
na rente yoyte be'nn ka' sjalla Jerusalén.
Walana latj'ni yoyte dan nao ake' llwerao aken,
loe lsaken nzi Baal,
na rente yoyte bxus ke ake' kaꞌ.
5Wlleyia'a be'nn ka' llep yichjo
na lloeraw ake' berj ka' sjallia le yeban,
na llayull'na llchekwte xhib ake'
llwerao ake' nada',
na lloeraw akte loe lsaken nzi Milcom.
6Leskakse wlleyia'a be'nn ka' llsanlall nadan,
be'nn ka' bi llayirj nada' na nike lled akze wnab akre nada' cha de dazed ke ake'.
7Lliteze lese raw Xanllon,
le lla ke Xanllon ba zen gawchochze.
Le Xanllon ba benchawe'e to latj ga wsakzie'e,
na ba bayune'e xhirall be'nn ka' ba benee yexhen.
8Ke llan gak yel korchisen
wsakzia be'nn braw ka', kan ba bnee Xanllon,
na yoyte xhi'nn be'nn wnebian,
na yoyte be'nn ka' naw llun da mar, na be'nn ka' bi nxenlall nada'.
9Lezkakse ke lla'na wsakzia
be'nn wan ka' xhit kullre reij yo' ka',
na konen da ka' ba jalan aken, na ren da ka' ba jaxiye aken,
ba bazlla ake' lo yo' ke xan aken.
10Kin bnee Xanllon:
Lla'na yenere gusia ake' na wnab ake' gukre,
surawzen gan zu reij ke belya ka',
na gusia be'nn ka' sajlla raw wllope reijen,
na gak llakia kwis, to sill keten yinj le ya' ka'.
11Le koell yiach, re' lla're barr gan nzi Mortero,
le yeololte be'nn ka' lla'w, na llot kweyi ake',
na yeololte be'nn ka' llcha ake' mell, kweyi ake'.
12Ke lla'na nada' wia'a yichj raxhdao
be'nn Jerusalén ka'.
Wsakzia be'nn ka'
zajzu nbaraz
ke to zu ke uva da ba guk scha llicha'o,
na toraz akteze lle kwin ake':
Xanllon bitbi gune, ni dawen ni da mar.
13Kelen'na, yoyte da sjade ke ake' kwan aken,
na yo' ke ake' ka' wayinjen,
gunchaw ake' yo' rill ake', axha bi su aken,
wayaz ake' yay uvas, na bi yaj ake' zu ke uvan.
14Gawchochze baze lla xhen ke Xanllon.
Baze'e gawchoch, bazadoe'e rres.
To llichnieraz gak lla ke Xanllon:
Xte rente be'nn war ka' koell ake', na gusia ake'.
15Gaken to lla da llruk,
to lla da walleyraw, na da wzoayiach,
to lla da watach walan,
to lla kwe da xchul gasj wi kwis,
to lla kwe bej gasj xchulwi,
16gak to lla ket koell trompet ka', na gusia ake'
konen yell ka' nechj ze war ka',
na wdup tonn xhen ka' sjallia chkwia.
17Ne Xanllon:
Wzoa be'nn ki dazed,
ta'a ake' kaꞌ be'nn lchul,
le ben ake' daxhinj konen nada'.
Na xchen aken llirjen ke yu bichte,
na xper aken soyan, ka' zuya' xche bayixe.
18Katen llin llan wluken Xanllon,
ni ya cha'on nzi oro ni yan nzi plat ke ake' ka' bi gak wazran le ake',
le kone yel llaklla ke Xanllon,
wzeye'e doxhente latj yell-li'on.
Yoyte be'nn ka' lla'a yell-li'on
kweyi ake' to sete.
Избрани в момента:
Sofonías 1: ZPUPAT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте