Amós 5
5
Llalwille'e le ake' nench'na wazeren ake' Diozen
1Lewzenay xtilla ki be'nn Israelitas,
lewzenay kan llul yiacha ke ren.
2Ba bial nor weo nbaraz ke Israelen,
ba biale'e, na bill gak wayase'e.
Ba dule'e raw yu,
na nutno llra' walis le'e.
3Kan lle Xanllon be'nn Israelitas ka':
Cha to yell xhen llsel ake' to mir be'nn raw wdilen,
to gayoa akze wagan konen yelnban,
na cha to yell xhen llsel ake' to gayoa ake',
chi akze wabi.
4Kan lle Xanllo be'nn Israelitas ka',
lewayirj nada' nench'na gat yelnban ke re'.
5Bi chejre gan nzi Betelen,
na bi chejre gan nzi Guilgal
na bi te re' gan nzi Beerseban,
le be'nn ka' sjalla Guilgalen wachach ake' le ake' yellen,
na Betelen wayinjen.
6Lewabi raw Xanllon nench'na gat yelnban ke re',
cha bi gunle ka', le'e wsele'e yi' llalnin gan llnebia Israelen,
na nutno llra' Betelen nu' wasur len.
7Niachraz ke re' llchukre yel korchisen,
na bi llapre baran dan nak da lixhejen.
8-9Le Xanllon benee berj ka' nzi berj rsir, na berj xche',
le'en llayone tllelen llayaken tella,
na llan llayaken xchulbaw,
le'en llaxhe'e nisen de lo nista'on
na llwasjen raw yell-li'on,
le'en llchinje'e na dlleyie'e ze war ka',
na llchochje'e yoyte dan llkoej le aken.
Xanllo, kan nzi le'en.
10Niachraz ke re' llwiere be'nnen llkoej dan zajze lixhejen,
na be'nnen llacheb dan nak dalixhejen.
11Na llrajchekw re' be'nn yia'chen,
na llchixhjre le ake' trigon llarap aken,
kelen'na bisire banez yo' de yaj chao ka' ba benchawren,
na nike yajzre zu ke uva ka' ba gusren.
12Nada' nezra daxhinj ka' llunlen,
to bi llayullkse daxhinj ke re' ka'.
Na llsakzire be'nn wen dalixhejen, na zire mell de ngachze dan llchab aken,
na gan llak yel korchisen, llunle nench'na llnit be'nn yia'chen.
13Kelen'na be'nn sin'na lliteze zoe'e,
le nesre'e ke lla ka' zoe'en, bi naken wen.
14Lewayirj da wen'na, na bi gunle da maren, na gat yelnban ke re',
na konen ka' wroen ke di'll lixhejen ba bnere.
Na Xanllo Diozen nap doxhente yelwaken serene re'.
15Lewiere dan nak da maren, na le lliere dan nak dawen'na.
Lewia nench'na gak da lixhejen gan llak yel korchisen.
Narachk chet ka', konen ka' Xanllon nap doxhente yelwaken
wayachralle'e xhi'nn xhasoa Israelen ba baganen.
16Kin ne Xanllon Diozen nap doxhente yelwaken.
Yoyte lawya ga lladup llallay ake' koell yia'ch ake',
na tnez ka', gusia ake' dan llebraz lljel akren.
Na be'nn ka' llasllan yu lixen koell ake',
le llajxi be'nn de naxhj ka', be'nn ka' sjachell gan llak yelguten.
17Yoyte gan nas ake' yay uvas ka' koell ake',
keten yeda wsakzia le aken.
Kan ba bnee Xanllon.
18Niachraz ke be'nn ka' llbexh keten llin lla yed Xanllon.
¿Neze re' bi gak kere ke lla'na cha?
Ke lla'na gaken to lla da gak xchul, na bi gat beni.
19Ke lla'na, gaken ke to ga llxhonjre to bell yix,
na lldile'e to ban nzi oso,
o cha ket llayodoe'e lo yo' rillen
na llchiche'e le zen,
na llbaw to bel snia le'e.
20Awa, llan yed Xanllon aken xchulwi, na bi gat beni,
to kweze da xchul, na bitbi gat da wseni.
21Llwiera lni' ka' llunlen,
na bi llawera keten lladupre lloeraw re' nadan.
22Bi llenla bayix ka' llutren keten llweraore nadan,
nigaze nbas ka' llazarallren,
na bi wzenina bell dao llarall ka'
llutren, nench'na yezixhena ke re'.
23Lechaj le lljel gayubre
bi llenla yenla ya wakoell ka' llsillren.
24Yewellra chenak re' gunle wen konen be'nn loelljre ka',
na dan gapre baranen gaken kakse yeo ga deteze de nis.
25Be'nn Israel ake', ¿bzey re' bayix, na nbas nench'na beraw re' nada' raw doxhente choa izen bdare latj dach yu billen cha? 26Axha re' llunzre nllare, na nxoare xhichj re' loe lsaken nzi Sicut, na berjen nzi Quiiún, loe lsak ka' ba benle nench'na sjanaken dios kere. 27Kelen'na guna nench'na wachach ake' re' yellen, tetellre gan nzi Damasco, kan ba bnee Xanllon, Diozen nap doxhente yelwaken.
Избрани в момента:
Amós 5: ZPUPAT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте