Marko̱ 8
8
Kjín xu̱ta̱ kitsikjien Jesuu̱
(Mt 15.32-39)
1Ngu ni̱tjin, kjín xu̱ta̱ kutkune jmá kjitjián Jesuu̱, ta̱nga najmíre najmi xi kjien, tsichjare Jesuu̱ ja xi kjibakuyáre̱ ku kuaxu kitsúre̱:
2—ꞌÑu on kutꞌaꞌan ngieje kui xu̱ta̱. Je tjínre ján ni̱tjin nga tjimatjingina ku najmíre xi kjien. 3Tjín xi ꞌñu kjín jíndiba; tsa niꞌyaꞌe tsingiyaꞌan nga kjia kjienjín, kumáre tsa ndiya ꞌméya.
4Ku̱a̱xu kitsú ja xi kjibakuyáre̱:
—Ta̱nga najmi xu̱ta̱ ji kui ngande. Jmá minchitsjaijni ni̱ñu̱ tjeꞌñu kjínma ngieje kui xu̱ta̱
5Ku tsinengiyare̱ Jesuu̱:
—Kó ni̱pan kjitjiánjnu
—Yatu—kitsuxu ja xi kjibakuyáre̱.
6Kitsiꞌin manda Jesuu̱ nga ꞌbendute nangi xu̱ta̱. Ku skabe xi yatu ni̱pan ku kꞌuechji kitsjuáre̱ Namiña Diuu̱. Kitsibasenya ni̱pan ku kitsjuáre̱ ja xi kjibakuyáre̱, tse̱ꞌe xi tsikabi ngajín ngieje xu̱ta̱. Najmi xi kitsú Jesuu̱ kitsiꞌin xki̱ ja xi tjibakuyare̱.
7Te̱ Kuaxúcha tjimajun jó jan tjio̱ xixi, kitsjua kꞌuechji Jesuu̱ ku kitsiꞌin manda nga nikabi.
8Tuxi ndá tsakjien ngieje xi kꞌi̱a̱ tsuba̱, ku tjio̱ xi tsꞌangi yatu nisin kitse. 9Mare̱ ñujún mi xu̱ta̱ xi tsakjien.
Je ma mangijnu kitsú Jesuu̱, 10tsijín tsutsu je ku kiju̱ ja xi kjibakuyáre̱ ngande Ndalmanuta̱.
Najmi xi mare̱ tsindayaña
(Mt 16.1-4; Lk 12.54-56)
11kꞌiaxu jichú xu̱ta̱ fariseo̱ jmá kjitjián Jesuu̱ ku kinukju̱a̱sijuxu kui. Nguxu en ndesu tjiꞌbendayare, kichjínengire nga ngataku ngu najmi xi mare̱ tsindayaña tsa kjain nga nga̱tꞌaꞌe Namiña Diuu̱ kju̱a̱ꞌi.
12ꞌÑu kitsiti Jesuu̱ nga̱tꞌaꞌe kui najmi, ku kua kitsú: «Mí xá ngieje ni̱tjin chji̱nengijnu najmi xi mare̱ tsindayaña Kju̱a̱xikjain nga ngují najmi sakujnu.»
13Ku kꞌi̱a̱ ꞌyendu Jesuu̱, ku te̱ tsijínni tsutsu je, ku ngunda chincha tsé kijí.
Kju̱a̱kitakun xi kumáre xu̱ta̱ fariseo̱
(Mt 16.5-12)
14Kichayare tsaꞌa ni̱ñu̱ ja xi kjibakuyáre̱, ngutsa ni̱pan yaꞌa ngaya tsutsu je. 15ꞌÑuxu tsichjaju Jesuu̱:
—Ku minengijnu nga chunjnu xine nipanꞌen fariseo̱ kju̱ xine nipanꞌen Erode̱ Antipa̱.
16Ku isenijmi kjín ja xi kjibakuyáre̱ Jesuu̱ ku kuaxu kitsú:
—Kuire nga najmi ni̱pan kichꞌajiña nga kuatsu.
17Kisꞌejínre Jesuu̱ najmi xi incha basenijmi ku kuaxu tsure:
—Mí xá nga̱tꞌaꞌe ni̱pan kinukju̱a̱jnu. A tuku makjínjínjnu A tjichja kju̱a̱kitakunjnu. 18Nga tjínjnu xkujun, mí xá nga yajíjnu. Nga incha ꞌñujun, mí xá nuꞌyajíjnu. A fuetsjenjínjnu, 19nga̱tꞌa kui ni̱tjin, nga kitsikabiꞌan xi on ni̱pan ngajín xu̱ta̱ xi on ꞌmí Kó nisin kitsejnu ngieje xi tsꞌangi
Ku̱a̱xu kitsú ja xi kjibakuyáre̱:
—Te̱ jó nisin.
20Tsinengiyaxure Jesuu̱:
—Ku nga kitsikabiꞌan yatu ni̱pan ngajín xi ñujún ꞌmí xu̱ta̱, kó nisin kitsejnu
—Yatu —tsuxu ja xi kjibakuyáre̱.
21Ku̱a̱xu kitsúre̱ Jesuu̱:
—A tuku kjia makjínjínjnu.
Jesuu̱ kitsindaya ngu xu̱ta̱ tkꞌa ngande Betsaida̱
22Nga jichú ngande Betsaida̱, kjínxuma ja xi kiju̱ xu̱ta̱ tkꞌa janda jmá kjitjián Jesuu̱ ku kichjínengire kju̱a̱ndá nga kjíngajun.
23Jesuu̱ skabe tsja xu̱ta̱ tkꞌa ku itsjé ngaya na̱xi̱nanda. Jaskanxu ndate kitsikꞌanchi xkun, ku tsja yasunre̱ ngatsjatku, ku tsinengiyare̱ tsa tsejenre̱. 24Ku̱a̱xu kitsú xu̱ta̱ tkꞌa:
—Je tebeꞌan xu̱ta̱, ta̱nga xuku ya xi incha fue nga kjimana.
25Nginguxu ndiya ꞌyetꞌani tsja Jesuu̱ ngasun xkun. Ku te̱ tsaseni ngingu ndiya kui xta̱, ku ndá xu kutsejenre̱, nga̱tꞌa jexu kundaya.
26Kitsiꞌin manda Jesuu̱ nga ngatꞌutjíni niꞌyaꞌe, ku kuaxu kitsúre̱:
—Ngatu ꞌmaijín nangiri.
ꞌYá xu̱ta̱ xi ꞌmí Jesuu̱
(Mt 16.13-20; Lk 9.18-21)
27Nga je kuma kui najmi, Jesuu̱ ku ja kjibakuyáre̱ kijí jmá kjima kju̱a̱bixantsja tiña ngande Sesarea̱ Filipo̱. Nga je tjima ndiya, Jesuu̱ tsinengiyaxure:
—Mí xi basenijmi xu̱ta̱ nga̱tꞌaꞌna.
28Ku̱a̱xu tsu ja xi kjibakuyáre̱:
—Tjín xi kuatsu nga jíxu xi ꞌmíri Jua xi batenda, kjaꞌi xi tsu nga jíxu xi ꞌmíri Elía̱. Tjín xi kuatsu nga jíxu xi kichꞌe Enꞌen Namiña Diuu̱.
29Jaskanxu tsinengiyare̱ Jesuu̱:
—Ku jun, mí xi tjinikjójnu. Ku ꞌyáni án.
Ku kuaxu tsu Pe:
—Jí xi kju̱a̱ꞌi ꞌnatsjengi na̱xi̱nanda.
30Kitsiꞌinxu manda Jesuu̱ nga ngují xu̱ta̱ ꞌmiyare nga kui xi kju̱a̱ꞌikꞌatsjengi na̱xi̱nanda.
Tsuyaxu Jesuu̱ nga nikꞌen
(Mt 16.21-28; Lk 9.22-27)
31Jesuu̱ kitsuyaxure ja xi kjibakuyáre̱ najmi xi kumataꞌin:
«Án, kjindiꞌe xu̱ta̱ nga̱sunde, ꞌñu kju̱a̱niꞌin kju̱a̱ꞌá án. Ku tsichꞌona xu̱ta̱ xi ꞌñu tsuba̱ na̱xi̱nanda, ku ja chanaꞌmi xi kꞌa xáꞌe kju̱ Jí kua Chji̱ne xi yaꞌa Kju̱a̱kixiꞌe ni̱ngu̱xi̱. Kui xi tsikꞌienna, ta̱nga xima ján ni̱tjin faꞌakunñaꞌan.»
32Ta̱nga ꞌñu xu ndá kitsuya Jesuu̱ nga ꞌmé, Pe tꞌaxin xu kiju̱ Jesuu̱ ku kitsitiju nga ku̱i̱cha tjichja. 33Ta̱nga tsꞌutjíni Jesuu̱, ku ngixkun ngieje ja xi kjibakuyáre̱ kitsitiju Pe: «¡Pe, xuku xindajin tjibixiji! ¡Tisubaꞌe tꞌena jí, makjijínri najmi xi kjiꞌbendaya Namiña Diuu̱! Xuku xu̱ta̱ xi tutsu tuma niꞌin.»
34Jaskan, tsichjáre̱ ja xi kjibakuyáre̱ kju̱ ngieje xu̱ta̱, ku kuaxu kitsúre̱:
«Tsa mejénjnu nga án bakuyajnu, kju̱a̱ꞌñu tjínre nga ꞌbejñajnu najmi xi bixujnu. Kju̱a̱ꞌñu tjínre nga baꞌejnu yajo̱jnu nga fesuntꞌajnu kru ku ñaꞌánjnu najmi xi xinjnuꞌan. 35Nga̱tꞌa tu kuitse xi kjimandusinjnu nga ꞌbangijnu, kui xi mare̱ tsichajajnu. Ta̱nga tsa tjingujnu nga baꞌíjnu yajo̱jnu nga̱tꞌaꞌna kju̱ nga ꞌmiya sunjnu én tjatse, ku kjiátse ꞌbangijnu. 36Tsamí xi chjiꞌe tsa ngu xu̱ta̱ sakure ngieje najmi xi tjin nga̱sunde, tekui xi mare̱ ꞌmé. 37Ku ngují najmi ma tsjua ngu xu̱ta̱ tsa mejénre ꞌbatsjengi yajo̱ꞌe.
38»Ngakjáin ngieje kui xu̱ta̱ xaba xi chꞌore Namiña Diuu̱, ngatu̱ nisabajíjnu nga̱tꞌaꞌna kju̱ nga̱tꞌaꞌe énꞌna. Tsa ku̱i̱cha ñaꞌánjnu, án, kjindiꞌe xu̱ta̱ nga̱sunde, ꞌñu saba kumána ngatꞌajnu nga ndibajuꞌan ngaꞌñuꞌen Namiꞌna kju̱ ngieje xi tsixatꞌare Namiña Diuu̱ ngakꞌa ndiu̱jmi.»
Избрани в момента:
Marko̱ 8: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO