Jua 5
5
Kjesuu kitsindaya ngu xu̱ta̱ xi majín basen
1Nga je jaꞌa ni̱tjin, Kjesuu te̱ tsꞌutjíni na̱xi̱nanda Jerusalen nga kifue ngu sꞌui xi inchatsiꞌin xu̱ta̱ Judio̱. 2Kꞌi̱a̱ Jerusalen, tiñare jmá bitjasꞌen xi ꞌmí «Kjindetjuaꞌe chu̱tsa̱nga̱», kꞌi̱a̱ kitjian ngu tiku̱ ndijua xi tjínre ón kjinde̱tju̱a̱, ku nga én ebreo̱ Betsata̱ ꞌmí. 3-4Kꞌi̱a̱ kui ngande, kjín xu̱ta̱ xi tsuba̱ fetꞌa nangi xi chiꞌin tjínre: tjín xi tka, tjin xi tikué ku tjin xi kjitaja yajo̱ꞌe. 5Ku ngajín kui ja tsuꞌbajin ngu xi je kantjiaꞌónján nu tjínre nga chiꞌínre. 6Ku nga kube Kjesuu nga kꞌi̱a̱ kjiꞌí kui xta̱, ku tsisꞌejínre kó nu tsuꞌbajo chiꞌínꞌen, ku tsinengiyáre:
—A mejénri nga Namiña Diuu̱ tsindayari.
7Ku̱i̱cha skengi xta̱ xi ónre:
—Ndia̱ꞌna, najmína xu̱ta̱ xi basejúnna nga basꞌenjín ngindana ngaya tiku nga faniya ndijua. Tutsjai nga mejénna basꞌenjín ngindaꞌan, kjaꞌi xi tjun ku̱a̱cha tsiꞌin.
8Ku̱a̱cha kitsúre̱ Kjesuu:
—Tisitjen, chjabi nachanri ku tjabixi.
9Tekui chu̱ba̱ kundaya kui xta̱, skabe nachanꞌen ku kuma kijí.
Ni̱tjin xubato nga ku̱a̱cha kumá, ni̱tjin tkun nga tsikjaya xu̱ta̱ judio̱. 10Kui kju̱a̱, xu̱ta̱xá judio̱ ku̱i̱cha kitsúre̱ xta̱ xi kundaya:
—Ni̱tjin xubato kjatꞌei, ku tsjuandejí kju̱a̱kixi nga chakꞌai nachanri.
11Ta̱nga ku̱a̱cha skengi xta̱ xi kundaya:
—Kui xta̱ xi kitsindayana ku̱i̱cha kitsúna: “Tisitjen, chjabi nachanri ku je ma tjabixini.”
12Ku tsinengiya kui ja:
—Ku ꞌya xi ku̱a̱cha kitsúri nga bisitjen ku nga je fatjabixijí.
13Ta̱nga bejí kui xta̱ ꞌya xi kitsindaya, nga̱tꞌa Kjesuu ngutjutsa kichajin ngajín xu̱ta̱ kjín.
14Nga je kjimangixun, ngaya niꞌya ni̱ngu̱xi̱ tsenkja Kjesuu kui xta̱, ku ku̱a̱cha kitsúre̱: «Kjatꞌei nga je kundaye, ngite minchitsjaijíri jee yajo̱ri, nga̱tꞌa kumá tsa tusá ꞌñu chiꞌin xi kꞌuentꞌari.»
15Ku kikasere̱ jaxá judio̱ kui xta̱, ku ku̱a̱cha kitsúre̱ nga Kjesuu kitsindaya chiꞌin xi tjínre. 16Ku kisꞌematjéngire Kjesuu nga̱tꞌa tjitsindaya xu̱ta̱ nga ni̱tjin xubato najmi xi yají kúcha ñaꞌan bixuya.
17Ta̱nga ku̱i̱cha kitsú Kjesuu nga tsichjá: «Ngují ni̱tjin tsa titsixáji Namiꞌna, ku tekuácha án.»
18Nga tsitꞌe kui én jaxá judio̱ ꞌñu kitsiti ku mejénre tsikꞌen Kjesuu. Makutꞌají Kjesuu kui ja, nga̱tꞌa ni̱tjin xubato tsixá nga tsindaya xu̱ta̱, ku ku̱a̱tsu nga Nami mare̱ Namiña Diuu̱, kui kju̱a̱ nga teku̱a̱cha tsú nga Namiña Diuu̱.
Ngaꞌñu xi tjínre Kjindiꞌe Namiña Diuu̱
19Ku̱a̱cha kitsúre̱ Kjesuu:
«Kju̱a̱xikjain najmi xi texinjnu, Kjindiꞌe Namiña Diuu̱ꞌan, ngují najmi tsiꞌinꞌan tsatu̱ an subátse. Tukuitsa najmi xi baséna xi tsiꞌin Namiña Diuu̱, xi Namiꞌna. 20Kui mejénre án ku bakúna ngieje najmi xi tsiꞌin. Ku sꞌei bakúna najmi xi ꞌñu tkun ngisa, ku tukuatsa kumajnu najmi xi chajnu jún. 21Nga̱tꞌa xukúcha tsiꞌin Namiꞌna nga tsikjaiyáre̱ xu̱ta̱ xi je tsé jesun, tekuácha mana tsjuána kju̱a̱mijñachun tsa ku̱a̱cha mejenna. 22Ku ngují xu̱ta̱ xi tsijere Namiꞌna. Án xi Kjindiꞌereꞌan, xi kitsjuána kui ngaꞌñu, 23tuxi ngieje xu̱ta̱ nga̱tubetkunna xukúcha betkun Namiꞌna. Tsa tjin xi betkunjínna, tekuácha betkunjin Namiꞌna, xi kitsingiyana.
24»Tsa tjin xi baseñajúnre én xi texiyaꞌan, ku sꞌejínre Namiña Diuu̱, nga kui xi kitsingiyana, sakúre kju̱a̱mijñachun nguxikaꞌa. Nditsa xin kitsꞌijun Namiña Diuu̱ nga̱se, je ngite sakujíre jee, nga̱tꞌa sakure kju̱a̱mijñachun nguxikaꞌa. 25Ngu najmi xi kju̱a̱xikjain xi te̱xinjnu: ku kjatꞌei kuitꞌeꞌna xi kjin kitsꞌijún Enꞌen Namiña Diuu̱, xi Kjindiꞌere̱ án, tsa tꞌéna én, sakúre kju̱a̱mijñachun nguxikaꞌa. 26Nga̱tꞌa Namiña Diuu̱, xi Namiꞌna, kui xi tjínre ngaꞌñu nga tsjua kju̱a̱mijñachun, ku án kitsjuána kui ngaꞌñu. 27Tekuácha kitsjuána ngaꞌñu nga tsitsjeꞌan kju̱a̱, nga̱tꞌa án xi Kjindiꞌe xu̱ta̱ nga̱sunde.
28»Ngatu kuaji ngatumajnu najmi xi texinjnu, nga̱tꞌa kuichu ni̱tjin nga kuitꞌere Énꞌna ngieje xi je jesun, 29ku kuitjúni tixa jmá tsuba̱ñajín. Ku kjiaku̱a̱, xi ndá najmi kitsiꞌin te̱ kꞌuemáni, ku Namiña Diuu̱ ꞌbenduju nguxikaꞌa; ku xi ndájin kitsiꞌin fueyánire̱, tuxi nga majénire̱.
Ku̱i̱cha kitsuya Kjesuu najmi xi baku xá
30»Ngují najmi xi ma tsiꞌinꞌan tsatuꞌan suba. Namiꞌna kitsingiyana, ku kui kitsuyána kúcha tsitsjeꞌan kju̱a̱ xi tjínre xu̱ta̱. Kui kju̱a̱ nga ndá tsitsjeꞌan kju̱a̱, nga̱tꞌa tuchuba tsiꞌinjínꞌan najmi mejenna, tukuitsa xi titsu Namiꞌna tetsiꞌinꞌan.
31»Tsa teꞌánni xi ndá techja̱ꞌan nga̱tꞌaꞌna, kuixujnu nga kju̱a̱ndesu xi texiꞌan. 32Ta̱nga bejinꞌan ngu xu̱ta̱ xi kuitsuya ꞌyáni án, kui xi kuitsuya nga kjain najmi xi texinꞌan. 33Nga kiningiya kúnjnu xu̱ta̱ Jua xi fajo ku ndibaju én, kju̱a̱xikjain én xi kitsújnu. 34-35Kju̱a̱kitakun xi ikúya Jua xukútsa ngu kandi xi tsitsejénña jmanga jñu, ku chubatse ni̱tjin tsjua kumájnu jún nga kinuꞌyájnu.
»Ta̱nga ngují xu̱ta̱ machjenna xi ndá ku̱i̱chja nga̱tꞌaꞌna. Tsa Jua kitsikꞌaxkijnuꞌan, tuxi nga sꞌejínjnu ku nga̱tꞌatsjengijnu Namiña Diuu̱. 36Án, ma bakujnu nga kju̱a̱xikjain nga Namiꞌna kitsingiyana. Ku̱a̱cha tsuya ngieje najmi xi te̱tsiꞌinꞌan, ku janda machjenjínre tsa Jua kuma te̱stigo. Nga̱tꞌa tetsiꞌiꞌan najmi xi kitsúna Namiꞌna nga kitsingiyana.
37»Namiꞌna kitsingiyana, ku kui tekuácha ndá chja̱ nga̱tꞌaꞌna. Najmi xi mani nga kjia ngují ndiya kinuꞌyájnu jún, ku kjia yajíjnu kuchatjin xi kju̱a̱xikjain. 38Nga̱tꞌa mejínjnu jún nijaꞌojnu enꞌen, nga̱tꞌa kjia sꞌejinjínjnu nga̱tꞌana, nga kui xi kitsingiyana.
39»Jún tuxi chan chutꞌayájnu Xu̱ju̱n Enꞌen Namiña Diuu̱, nga̱tꞌa nikjójnu nga sakujnu kju̱a̱mijñachun nguxikaꞌa. Ngingu najmi, nditsa ndá chja̱ nga̱tꞌaꞌna Xu̱ju̱n Enꞌen Namiña Diuu̱, 40mejínjnu jún nga nisꞌejínjnu nga̱tꞌana tuxi ma sakujnu kju̱a̱mijñachun nguxikjaꞌa.
41»Ngují najmi nduxinna án tsa ndá kuichja xu̱ta̱ nga̱tꞌaꞌna. 42Ta̱nga án tuxi ndá bejínjnu jún, ku béꞌan nga tjojíjnu Namiña Diuu̱. 43Kuí xi Namiꞌna, kui xi kitsingiyana, ta̱nga jún kje nijaꞌójíjnu. Ta̱nga ngingu najmi, xi tsuꞌba subá, tusa kuí xi ndá ñaꞌánjnu xki̱. 44¡Kúcha mejenjnu sꞌejínjnu nga̱tꞌaꞌna, nga tu kuitsa xi tsjuájnu nga ndá chja̱ xu̱ta̱ ngatꞌajnu, mítsa Namiña Diuu̱ xi ngútsema!
45»Ngatu bixujíjnu tsa án bateje taꞌínjnu ngixku̱n Namiꞌna. Je kisꞌengujnu jún én xi kiski Moise, ku Moise xi tsubáre bateje taꞌínjnu. 46Tsa sꞌejínjnu nga̱tꞌaꞌe Moise, tekuácha tsubáre nga nisꞌejínjnu nga̱tꞌaꞌna, nga̱tꞌa tekuácha kiski én xi nga̱tꞌa tsaꞌan. 47Ta̱nga tsa sꞌejinjínjnu én xi kiski̱ Moise, kúcha mejénjnu nga sꞌejínjnu én xi texiyájnu»
Избрани в момента:
Jua 5: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO