Jua 20
20
1Ndumingu tꞌajñu, nga tukú jñu ngisa, Maria̱ Lena̱ kikase tixa ndia̱jo jma kjikjaya yajo kꞌenꞌe̱n Kjesuu. Nga je tiña jichú, kukjinre nga kichjubaꞌa ndia̱jo xi kikꞌechjajo jma kjiya yajo̱ꞌe Kjesuu. 2Ku tsanga nga kijí jma tsuba Ximo Pe kju̱ xta̱ xi ꞌñu kumejénre Kjesuu, ku ku̱i̱cha kitsúre̱: «¡Tjín xi itsjé yajo̱ꞌe Ndia̱ña jmá kjikjaya tixa, ku yajíña jma kikaja!»
3-4Pe kju̱ xta̱ xingu, tsanga nga kijí jma kjiya tixa ndia̱jo yajo kꞌenꞌe̱n Kjesuu. ꞌÑu tsanga ngisa xta̱ xingu nga Pe, ku kui tjun jichú. 5Ku tsasengi tixa ndia̱jo, ku kube najñu xi kjinikjatjijun Kjesuu, ta̱nga tsasꞌejín ngaya tixa. 6Ku kjia jichú Ximo Pe, ku tsasꞌen ngaya tixaꞌe mikꞌen. Tekuácha kube najñu xi kinikjatjijun, 7ku kꞌi̱a̱ kube nga najmí najñu xi kinikjatjijun tku Kjesuu, kikꞌetku ku tꞌaxín kikꞌejña kui najñu. 8Jaskan tsasꞌen xta̱ xingu ngaya tixa ndia̱joꞌe mikꞌen. Nga kube najmi xi kuma, kjiatse kisꞌejínre. 9Nga kje ku̱a̱jícha ma, ja xi kikakuyáre makjinjínre én xi tichja̱ Xu̱ju̱n Enꞌen Namiña Diuu̱, nga te fueyanire̱ Kjesuu. 10Pe kju̱ xta̱ xingu xi ikuyáre Kjesuu tsꞌutjíni niꞌyaꞌe̱.
Kjesuu ikúre yajo̱ꞌe Maria Lena
(Mr 16.9-11)
11Kjindetsín tixa ndia̱jo mikꞌen kisꞌejña Maria ku skindá. Ku nga tjikjinda, yejen tku̱ nga tsase ngaya tixa ndia̱joꞌe mikꞌen, 12ku kꞌi̱a̱ kube jó xi incha tsixatꞌare Namiña Diuu̱ xi yajá najñu tiaba. Ngu xi kitjián jma kisꞌe tku̱ Kjesuu ku xingu jma kisꞌe tsjai. 13Ku kui xi inchatsixatꞌare Namiña Diuu̱ tsinengiya:
—Jí kua chjun, mí xa tichjikjindai.
Ku̱i̱cha skengi kui chjun:
—Nga̱tꞌa tjin xi kiju yajo̱ꞌe Ndia̱ꞌna, ku bejí an jmá nga̱tjen tsangiju.
14Sꞌetsa ku̱i̱cha kitsú, yenkꞌa ngakjain ku kꞌi̱a̱ kube Kjesuu, tanga bejí tsa kui. 15Ku̱i̱cha kitsúre̱ Kjesuu:
—Jí kua chjun, mí xá tichikjindai. ꞌYá xu̱ta̱ xi tjiminchitsjai ji.
Kitsikjo Maria nga kui xta̱ xi tjichjajo kui xi kunda ngandeꞌe̱ naxu jmanga kjisián tixa̱ ndia̱jo. Kui kju̱a̱ ku̱i̱cha kitsúre̱:
—Ji kua, tsa jí xi kꞌajin yajo̱ꞌe Kjesuu xi kjiꞌi ngaya tixa, tixuyéna jmá kikjani ku án fuekangitsjai.
16Ku̱i̱cha kitsú Kjesuu:
—Maria.
Tsꞌutjiya ku ku̱i̱cha kitsúre̱:
—¡Chji̱ne!
17Ku̱i̱cha kitsúre̱ Kjesuu:
—Ngatu nikasejínjnuꞌan, nga̱tꞌa kjie fichutꞌajína Namiꞌna. Tꞌutjini ku kua tꞌinri ja xi ikuyána nga Namiꞌna fuekasena, nga̱tꞌa tekuácha Nami májnu jún. Kui xi Namiña Diuuꞌna, ku tekuacha Namiña Diuujnu.
18Maria Lena kijí ku kitsuyáre ja xi ikuyáre Kjesuu nga je kube Ndia̱ña, ku kitsuyáre̱ ngieje én xi kitsúre̱ Kjesuu.
Kjesuu jichutꞌare ja xi ikuyáre̱
19Kuima ni̱tjin ndumingu jñu, ja xi ikuyáre Kjesuu kuñajan kjín ngu niꞌya. Tuxi ndá tsuba̱chjare kjindetjuaꞌe niꞌya, nga̱tꞌa ja xi ikuyáre Kjesuu tsakjúnre jaxá tetjunꞌen judio̱. Tsasꞌen Kjesuu, ku kisasenjín basénre ja xi ikuyáre, kitsikunda ku ku̱a̱cha kitsúre̱: «¡Nga̱tsichakunnejnu Namiña Diuu̱ ku ngatsjuájnu ngu kju̱a̱chꞌán!»
20Jaskan ikú jma onre tsja ku ndanisi̱nꞌe̱n, ku tuxi tsjua kumáre xu̱ta̱ꞌe nga kube Ndia̱ꞌe̱. 21Kjesuu te̱ kitsikundani xukúcha tsiꞌin tsjai, ku ku̱i̱cha kitsúre̱: «Xukúcha án kitsingiyana Namiꞌna, ku tekuácha jún án tsingiyájnu.»
22Ku skendujmajun ngieje kui ja, ku ku̱a̱cha kitsúre̱: «Chjabéjnu Asen Tsjeꞌe Namiña Diuu̱. 23Tsa jún nichatꞌajnu jee xi tjínre ngu xu̱ta̱, tekuácha Namiña Diuu̱ tsichatꞌajnu. Kutsa jún nichatꞌajíjnu, tekuácha Namiña Diuu̱ tsichatꞌajíjnu.»
Kjesuu kju̱ xta̱ xi ꞌmí Toma
24Toma, ngu xta̱ xi tejó ja xi ikuyáre Kjesuu, kui xi Kjindiꞌñu kiꞌmí nga tu̱ kuachá jín, kꞌi̱a̱jí kjitjiajínre ja xi ngisa nga ikúre̱ Kjesuu yajoꞌe. 25Nga jichú Toma̱, ja xi ikuyáre Kjesuu ku̱i̱cha kitsúre̱:
—¡Je kuyájni Ndia̱ña!
Ta̱nga ku̱i̱cha skengi Toma̱:
—Sꞌejinjínna najmi xi bixujnuꞌan, janda nga beꞌan chu̱ba̱ꞌe̱ kalabo̱ xi yaꞌa tsja ku tsingisꞌenꞌa̱n kjindi ndsaꞌan, ku batꞌamana ndsaꞌan ndanisinꞌen jma onre.
26Xima jin ni̱tjin, te kuñajánni ja xi ikuyáre Kjesuu. Kꞌi̱a̱ kitjianjínre Toma̱. Tuxi ndá tsuba̱chja kjinde̱tju̱a̱ꞌe niꞌya, tanga tekuixi tsasꞌen Kjesuu, kꞌi̱a̱ kisasenjin basénre, kitsikunda ku ku̱a̱cha kitsúre̱: «¡Nga tsichakunenjnu Namiña Diuu̱ ku ngatsjuájnu kju̱a̱chꞌán!»
27Jaskan ku̱i̱cha kitsúre̱ Toma̱:
—Chaséri ndsaꞌan ku ndanisinꞌna, tingisꞌen ndsaji jmá ónna. Ngandeꞌe nga sꞌejinjínri, tsubáre nga sꞌejínri.
28Ku̱i̱cha skengi Toma:
—¡Jí xi Ndia̱ꞌna ku Namiña Diuuꞌna jí!
29Ku̱i̱cha kitsúre̱ Kjesuu:
—A kisꞌejínri kjatꞌe nga̱tꞌa kuyi̱na. ¡Tutsjai nga tsjua kꞌuendure xu̱ta̱ xi sꞌejínre nga̱tꞌaꞌna nditsa kubejína!
Mí kju̱a̱ nga kundá kui xu̱ju̱n
30Kjín najmi kitsiꞌin ngisa Kjesuu ngixku̱n ja xi ikuyáre̱, xi kjitꞌají kui xu̱ju̱n. 31Ta̱nga én xi kꞌui tinukjua, kichji tuxi ngasꞌejínjnu nga Kjesuu xi jajin Namiña Diuu̱ nga ꞌBatsjengiña, kui xi Kjindiꞌe Namiña Diuu̱, ku tuxi ngaꞌñu xi tjínre tsjuájnu kju̱a̱mijñachun nguxikaꞌa.
Избрани в момента:
Jua 20: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO