Jua 14
14
1Jaskan ku̱a̱cha kumá, ku̱i̱cha kitsúre̱ ja xi kjibakuyare Kjesuu:
—Ngují najmi nganikjojnu. Tisꞌejínjnu Namiña Diuu̱ ku tekuácha án. 2Niꞌyaꞌe Namiꞌna sakúre ngande ngieje xu̱ta̱. Tsa kju̱a̱ndesu, janda kuají kixínjnu nga kꞌi̱a̱ kjueꞌán nga kjuekꞌendájnu ngu ngande. 3Nga je kuma kui najmi, faꞌiñaꞌan nga faꞌikjaꞌajnu. Ku kjia mijña ngutjinña. 4Jún je yajnu jmá nga̱tjen kju̱a̱iꞌan, ku yájnu mí ndiya xi chjabejnu.
5Ta̱nga ku̱a̱cha kitsúre̱ Toma̱:
—Ndia̱ꞌna, ta̱nga yajíjni jmá ngatje̱n kꞌuain, kúcha yájni mí ndiya chjabejni.
6Ku̱i̱cha skengire Kjesuu:
—Án xi ndiya, xi kju̱a̱xikjain ku xi tsjuá kju̱a̱mijñachún. Tsa nga̱tꞌaꞌnajin, najmí xi fichutꞌáre̱ Namiña Diuu̱ xi Nami. 7Tsa án xi yajíjnuꞌan, tekuácha yajíjnu Namiꞌna. Ku janda kjatꞌei yajíjnu, nga̱tꞌa je tichaséjnu.
8Ku jaskan ku̱i̱cha kitsú Lipe:
—Ndia̱ꞌna, titjuejni ngánde nga chaséjni kúcha tjin Nami. Kuitse najmi xi kjimachjénjni.
9Ku̱i̱cha skengi Kjesuu:
—Lipe, je tse ni̱tjin nga tejñajínjnuꞌan, a tuku kje yajíjnuꞌan. Xi je kubéna án, tekuácha je kube Nami. Mí xá ku̱i̱cha bixína “Takijni kúcha tjin Nami.” 10A sꞌejinjínri nga án ku Nami ngútse majni.
Ku ku̱i̱cha kitsúre̱ ja xi kjibakuyare:
—Én xi je kixiyajnu, mítsa án suba xi ku̱a̱cha kixin. Tu̱ najmi xi mejénre Nami kui xi tsiꞌinꞌan. Kui xi tsú subá najmi xi mejénre tsiꞌin ku tu̱ tsichjentsena. 11Tisꞌejínjnu nga kuaxínjnu nga Namiꞌna ku án ngútse xu̱ta̱ majni̱. Ku tsa sꞌejinjínjnu, ndatsa nga̱tꞌaꞌna tisꞌejínjnu nga̱tꞌa tjichasejnu najmi xi tetsinꞌinꞌan. 12Kju̱a̱xikjáinni nga xi sꞌejínre nga̱tꞌaꞌna tekuácha tsiꞌín xuku án. Nga̱tꞌa án je kjueꞌan jma tjián Namiꞌna, ku jun ꞌñu tse najmi ñaꞌánjnu ngisa tukꞌuajíre najmi xi kitsiꞌinꞌan. 13Tsiꞌinꞌan ngieje najmi xi chjinengijnu. Tu xi ngatubé xu̱ta̱, nga án kitsingiyaju̱na, ngaꞌñu xi tjínre Namiña Diuu̱ xi Namiña. 14Án tsiꞌinꞌan ngieje najmi xi chjinengijnu.
Kitsjua enꞌen Kjesuu nga tsingiya Asen Tsjeꞌe Namiña Diuu̱
15»Tsa nikitjusunjnu kju̱a̱kixiꞌna, xi mejénre tsú nga tjójnu an. 16Ku minengina Namiña Diuu̱ xi Nami nga ngatsingiyájnu Asen Tsjeꞌe, tuxi basejúnjnu nga tutsjai tutsjai nga basejúnjnu. 17Kui xi kuakuyájnu najmi xi kju̱a̱xikjain.
»Xi sꞌejinjínre Namiña Diuu̱ ku tu̱ najmi xi tjíntse nga̱sunde inchamandusinre̱, sakujíre Asen Tsjeꞌe Namiña Diuu̱, nga̱tꞌa bejí kúcha tjin ku ngují kju̱a̱kitakun tjínre nga̱tꞌaꞌe. Ta̱nga jún yájnu ꞌyáni kuí, nga̱tꞌa kꞌi̱a̱ kitjianjunjnu, ku ngieje ni̱tjin kꞌi̱a̱ sianjinjnu.
18»Ngují ni̱tjin ꞌbendu subájnu; ꞌbutjiñaꞌan ku mijñatkuniña. 19Ngi chubatse ni̱tjin chaja ngisa, ku ngite skuejína xu̱ta̱ nga̱sunde. Ta̱nga jún tuku yájnu an nga̱tꞌa, nga̱tꞌa ndatsa ꞌmé an, fueyánina, ku tekuácha tsiꞌinꞌan nga te̱ fueyánijnu jún. 20Nga ꞌbutjiñaꞌan jma tijñanjnu, kjia chajnu nga Nami ku án ngútse xu̱ta̱ májni; jun ku án tekuácha ngutsa maña. 21»Xi tsiꞌinna xki̱ ku tsiꞌin najmi xi xiꞌan, baku yajo̱ꞌe nga kjain nga tjore̱ an. Xi ku̱a̱cha tsitjóna, tekuácha tsitjo Namiꞌna, ku an tekuácha tsitjoꞌa̱n ku bakúna yajo̱ꞌna kúcha tjin an xi kju̱a̱xikjain.
22Jaskan Juda̱ xi ngingu, kuijí Juda̱ Iskariote̱, tsinengiyáre̱ Kjesuu:
—Ndia̱ꞌna, mí xa nga tu jintse bakijni yajori, ku kjují ja xi ngisa.
23Ku̱i̱cha skengi Kjesuu:
—Tsa tjin xi tjóreꞌan, tekuácha tsikitjusun énꞌna. Namiña Diuu̱ xi Namiꞌna tsitjo kui xu̱ta̱, ku ꞌbutjíjni nga jña ꞌbemajunjni. 24Xi tjojíre̱ an, tsiꞌinjínna xki̱. Ta̱nga tu kuitse én xi kitsuna Namiꞌna texiyajnu, mítsa én xi tetsindá subaꞌan.
25»Texiyájnu kui én teꞌáni nga tuku kꞌui tejñajúnjnu ngisa. 26Kju̱a̱ꞌi Ngaya Asen Tsjeꞌe Namiña Diuu̱ ku kui xi basenju̱njnu, nga̱tꞌa Nami tsingiya ku kui xi ngajoꞌna kuma. Ngaya Asen Tsjeꞌe Namiña Diuu̱ bakuyajnu ngieje kju̱a̱kitakun, ku tsikjaitsjénjnu ngiejejnu kju̱a̱kitakun xi ikújnu.
27»Tsjuájnu kju̱a̱chꞌán, ku kju̱a̱chꞌán xi tjínna, xi xukují kju̱a̱chꞌán xi tjin kui nga̱sunde. Nga tu̱ nindusinjínjnu yajo̱jnu ku tu̱ tkujínjnu najmi xi je tiña ndiba. 28Kinuꞌyájnu jún nga je fueꞌan kixinjnu, ta̱nga ꞌbutjiñaꞌan ngatꞌajnu. Tsa kjáin nga tjójnuꞌan, majínra̱ tsjua tjiꞌbejñajnu anima̱jnu, nga̱tꞌa je kjueña jma kjitjián Namiꞌna, xi tse ngaꞌñu tjínre ngisa.
29»Xiyájnu ngieje kui najmi kjatꞌei, tuxi nga ku̱a̱cha kuma, tisꞌejínjnu nga̱tꞌaꞌna. 30Ngite majín xiyajnu kjaꞌi najmi ngisa, nga̱tꞌa je tiña ndiba xindajin, xi tjitsiꞌin manda kui nga̱sunde. Najmíre̱ ngaꞌñu xindajin ku majin xi tsiꞌinna, 31ta̱nga án tsubáre tsiꞌinna xki̱ Namiꞌna, tuxi ngatubé ngieje xu̱ta̱ nga tjóna.
Ku nga kitsikjetꞌa, Kjesuu ku̱i̱cha kitsúre̱:
— Tisitjenjnu; titjúña kꞌui.
Избрани в момента:
Jua 14: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO