Jua 1
1
Én xi tsiꞌasenña ku tsjuáña kju̱a̱mijñachun
1Nga kjia ngují najmi baꞌangire̱ nga̱sunde,
je tukua kjitjián xi ꞌmí Én.
Namiña Diuu̱ je tukua kjitjiánre Én,
ku Namiña Diuu̱ xi ꞌmí Én.
2Nga kitsindá Namiña Diuu̱ ngieje najmi xi tjin nga̱sunde,
kꞌi̱a̱ kjitjián Én.
3Én xi kitsindá ngieje najmi,
ku ngují najmi kundá tsa najmí Én.
4Én xi kitsin nga̱tꞌaꞌe kju̱a̱mijñachun,
ku Én xi kju̱a̱mijñachun,
tekuácha ndiꞌi xi tsiꞌasénña.
5Ku ndiꞌi xi tsitsején jma nga ni̱tje̱n,
¡ku ngují najmí xi ma tsikjixundu!
6Namiña Diuu̱ kitsingiya ngu xta̱ xi ꞌmí Jua, 7tuxi kuichjajo xu̱ta̱ ku ngasꞌejínre nga̱tꞌaꞌe ndiꞌi xi tsiꞌasen. 8Juají xi asen; jiꞌi nga kju̱a̱ꞌitsuyare xu̱ta̱ ꞌyá xi ndiꞌi asen. 9Ku kui asen je kju̱a̱xikjaen je xati kju̱a̱ꞌi nga̱sunde.
10Je tukua kitjián Én nga̱sunde.
Namiña Diuu̱ xi kitsindá nga̱sunde
Ku xi én kichjichjen,
ta̱nga kitsiꞌinjínre xki̱ yajo̱ꞌe xu̱ta̱.
11Ku nga̱sunde jiꞌíkꞌejñajínña Én,
ta̱nga kitsijaꞌojí na̱xi̱nandaꞌe.
12Ta̱nga xu̱ta̱ xi kitsijaꞌo Én
ku kisꞌejínre nga̱tꞌaꞌe,
kjindiꞌe Namiña Diuu̱ tsꞌuya.
13Kjindiꞌe Namiña Diuu̱
nga̱ta kuí kitsjua kju̱a̱ndá janda ndiu̱jmi,
mítsa ngaꞌñuꞌen xu̱ta̱ nga̱sunde.
14Kuí xi Én kiꞌmí
kꞌui kisꞌejñajínña
ku xuku xu̱ta̱ nga̱sunde kisꞌebixi.
Kuyájni mí ngaꞌñu xi tjínre
xuku Kjindi ngututuꞌe Namiña Diuu̱,
nga̱tꞌa je ikújni
nga tjitsitjojni ku nga kuí xi kju̱a̱xikjain.
15Jua tsichja nga̱tꞌaꞌe xi ꞌmí Én, ku ku̱a̱cha kitsú: «Je kua kixinjnu nga kui je makjaꞌi. Kui xi ꞌñu kꞌa xáꞌe nga an, nga̱tꞌa je tukua tsé kjitjián nga kjia najmíꞌan.»
16-18Moise kitsichjén Namiña Diuu̱ nga kitsuyáña kju̱a̱kixiꞌe, ta̱nga Kjesukristo̱ kitsichjén nga kitsuyáña nga tjitsitjoña ku nga kui xi kju̱a̱xikjain. Najmí xi je kube Namiña Diuu̱; ta̱nga Kjindi ngututuꞌe, xi tiña kitjiánre Namiña Diuu̱, xi tekuácha Namiña Diuu̱, ikúña kúcha tjin kju̱a̱kitakunꞌen. Nga̱tꞌa ꞌñu tse nga titsitjoña Kjindiꞌe Namiña Diuu̱, kui kju̱a̱ nga tse kju̱a̱ndá tjisakúña.
Jua xi Batenda tsuya nga̱tꞌaꞌe Kjesuu
(Mt 3.11-12; Mr 1.4-8; Lk 3.15-17)
19-20Jáxa tetjunꞌen xu̱ta̱ judio̱ xi tsuba̱ Jerusalen kitsingiya yakaꞌa chanaꞌmi kju̱ xu̱ta̱ xi baseju̱n xá xi tjin niꞌya ni̱ngu̱xi̱, ngatjai kinengiyare̱ Jua ꞌyáni kuí. Ku ku̱a̱cha skengire Jua:
—Án xi jajínna Namiña Diuu̱ xi kju̱a̱ꞌikꞌatsjengijnu.
21Ku te̱ tsinengiyáni kui ja:
—A jí xi ꞌmíri Elia̱
Ku̱a̱cha skengi Jua:
—Júnjín; án jín xi ꞌmína Elia̱.
Ta̱nga ja chanaꞌmi kju̱ xu̱ta̱ xi jña tjima ꞌñu mejénre nga bé:
—A jí xi bixuye Enꞌen Namiña Diuu̱, xi tjiꞌmire nga faꞌi.
—Jún jín —kitsú Jua.
22Ku nga jetꞌa, kiꞌmíre̱:
—Ta̱nga kju̱a̱ꞌñu tjínre nga chꞌájni én xu̱ta̱ xi kitsingiyájni. Tixuyéjni, ꞌyáni jí.
23Ku kitsikjaitsjénre Jua:
—Án xi te̱kjindiaꞌan nangi kixí: “Tꞌendájnu ndiya Ndi̱a̱ꞌña”.
24-25Ja xi yaꞌa enꞌen xu̱ta̱ fariseo̱ ku̱a̱cha kitsúre Jua:
—Tsa jijí xi jajínri Namiña Diuu̱ nga kju̱a̱ꞌiꞌnatsjengíjni, ku jijí xi ꞌmíri Elia̱ ku te jijí kichꞌae Enꞌen Namiña Diuu̱, míxa xu̱ta̱ tjibatendai.
26Ku̱a̱cha skengi Jua:
—Ndijua te̱batendaꞌan xu̱ta̱. Ta̱nga tsuꞌbajínjnu ngu xi janda yajíjnu ꞌyá. 27Nditsa án tjun jiꞌíꞌan, ta̱nga kuí xi ꞌñu kꞌa xáꞌe nga án, ku janda najmína kju̱a̱kixi nga musuꞌe kumaꞌa̱n.
28Ngande jmá ꞌmí Betania̱ kumá ngieje kui najmi, ngundatiu ndana xi ꞌmí Jordan, ngande jmá Batenda xu̱ta̱ Jua.
Kjesuu, chu̱tsa̱ngaꞌe Namiña Diuu̱
29Ni̱tjin xima nganchajun, kube Jua nga ndiba tiña Kjesuu. Ku kꞌi̱a̱ ku̱a̱cha kitsúre̱ xu̱ta̱ xi sindutku:
«¡Kꞌui ndiba chu̱tsa̱ngaꞌe Namiña Diuu̱ xi tsitsje kju̱a̱xaba xi tjínre xu̱ta̱ nga̱sunde! Tukuitsa nga̱tꞌaꞌe nga tsichatꞌájnu Namiña Diuu̱ ngieje jee xi tjínjnu. 30Kjesuu xi texinꞌan nga ku̱a̱cha kixínjnu: “Ngatunꞌan ndiba ngu xi ꞌñu kꞌa xáꞌe ngisa nga án, nga̱tꞌa kui je tukua tsé je kjitjián nga kjia tukjajinꞌan.” 31Bejíꞌa̱n ꞌyáni kui, ta̱nga Namiña Diuu̱ kitsingiyana nga batendáꞌan ku nga̱tubejín ngieje xu̱ta̱.
32»Kubéꞌan nga xuku tuju jaje̱n Asenꞌen Namiña Diuu̱ ku nga̱tsjatku Kjesuu kisasénsun. 33Án bejíꞌa̱n ꞌyáni kui, ta̱nga ku̱i̱cha kitsúna Namiña Diuu̱: “Nga̱tuyi kúcha tjin xi batenda Ngayaꞌasen Tsjeꞌe Namiña Diuu̱, ku nga fajén Ngayaꞌasenꞌna ku ngatsjatku basensún.” 34Je kubeꞌan kjatꞌei kúcha tjin, kju̱a̱xikjain nga kui xi Kjindiꞌe Namiña Diuu̱.»
Já xi tjun ikuyáre̱ Kjesuu
35Ku xima nganchajúnni, tuku kui ngande kjitjián Jua kju̱ jó ja xi kjibakuyáre̱. 36Nga kube nga kꞌi̱a̱ kju̱a̱ꞌa Kjesuu, ku̱a̱cha kitsúre̱: «¡Chaséjnu, kꞌui ndiba chu̱tsa̱ngaꞌe Namiña Diuu̱!» 37Ku nga tsitꞌe kui én, kitjéngire ngiajó ja xi kjibakuyáre̱.
38Ku nga tsase ngatun Kjesuu, kube nga tjin xi tjimatjéngire, ku tsinengiyare mí xi mejénre. Ku ngiajó kui ja tsinengiyáre̱ Kjesuu:
—Jmá tijni, jí kua Chji̱ne.
39—Ndibájnu ku chase̱jnu
—ku̱a̱cha skengi Kjesuu.
Kitjengire̱ kui ja ku kube jmá kjitjián Kjesuu; ta̱nga je ndiuma kju̱a̱ne ñujún ngixún, kui nga kꞌi̱a̱ kisꞌendujú kui ja janda nga kujñú.
40Ngu xi ꞌmí Jandre̱, tsꞌe̱ Ximo̱ Pe. 41Najmi xi tjun kitsiꞌin Jandre̱ tsangitsjai tsꞌe xi ꞌmí Ximo̱. Ku nga sakúre, ku̱a̱cha kitsúre̱: «¡Je sakújni, xi jajín Namiña Diuu̱ nga ꞌbatsjengiña, xi mejénre̱ tsu, Kristo̱!»
42Ku jaskan Jandre̱ kiju̱ Ximo jmá kjitjián Kjesuu. Ku nga kube Kjesuu nga kjuichu Ximo̱, ku̱a̱cha kitsúre̱: «Jí xi ꞌmíri Ximo̱, kjindiꞌe Jua, ta̱nga Sefa̱ ꞌmíri kjátꞌei, xi mejénre tsú Pe».
Kjesuu tsichjáre̱ Lipe̱ kju̱ Natanae̱
43-44Ku xima nganchajun, nangi Ngalilea̱ kijí Kjesuu. Kꞌi̱a̱ tsenkja xi ꞌmí Lipe̱, xi chja̱ ngande xi ꞌmí Betsaida̱, ngande jma nga tsuba̱ nditsa Jandre̱ kju̱ Pe. Ku Kjesuu ku̱a̱cha kitsúre̱ Lipe̱ «Ndibitengina».
45Ku Lipe̱ kikangitsjai Natánae̱, ku ku̱a̱cha kitsúre̱:
—Je sakújni kui xi kitsuya Moise ngaya Xu̱ju̱n Enꞌen Namiña Diuu̱, kju̱ xi tsuya Enꞌen Namiña Diuu̱. Kui xi ꞌmí Kjesuu xi chja̱ Nasare, xi kjindiꞌe Kuse.
46Ku tsinengiya Natanae̱:
—A tjin xu̱ta̱ xi ku̱a̱cha ndá xi Nasare bitjujín.
—Ndibi ku ngatuyi —kitsú Lipe̱.
47Nga kube Kjesuu nga ndibatiña Natanae̱, ku̱a̱cha kitsú:
—Kꞌui ndiba ngu israelita̱ xi kju̱a̱xikjain, ngu xta̱ xi tsjé anima̱ꞌen.
48Ku tsinengiyáre̱ Natanae̱:
—Kúcha yijínna.
Ku ku̱a̱cha skengire Kjesuu:
—Kubere janda nga tijningi ya igera, nga kjia chjajíri Lipe̱.
49Jaskan ku̱a̱cha skengi Natanae̱:
—Jí kua Chji̱ne, ¡jí xi Kjindiꞌe Namiña Diuu̱jí ku xtaxá tetjunꞌen Israe!
50Ku̱a̱cha kitsúre̱ Kjesuu:
—A tjínisꞌejínji kui najmi nga̱tꞌa kixiyáre ku kube̱re janda nga tijni nginde ya igera. Ku sꞌeitsa ndiba najmi tkun xi sꞌei yi ngisa.
51Ku jaskan ku̱a̱cha kitsúre̱ ngieje kui ja: «Kju̱a̱xikjain nga jún sꞌeitsa yájnu nga tjuxꞌajín ndiu̱jmi, ku yájnu nga mijin ku fajén xi inchatsixatꞌare Namiña Diuu̱ jma nga tase̱nꞌan, nga̱tꞌa án xi Kjindiꞌe xu̱ta̱ nga̱sunde.»
Избрани в момента:
Jua 1: MZI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
México © Sociedad Bíblica de México, A.C. AÑO