Matye 2
2
Bangë bungelë bëyimonë Yeesu
1Yeesu wubutulu ku livulë li Betëlëyeemë#2.1 1 Sa 16.1, Betëlëyeemë livulë li Daviidë. , ku si Zudee, ntaangu Eloodë kubeelë n'tinu. Bangë bungelë bëfuminë ku lweeku lu mëselukulu më ntaangu, bisë ke tuukë ku Yelusaleemë. 2Bisë kufulë : « Kuni kuke mwaanë wo wabutu, n'tinu wu Sizwiifë? Cyelikë beeso twamonë mbotaandi ku mëselukulu më ntaangu i twakwiisë mu kun'kuundë. » 3Bunë n'tinu Eloodë kwayuwu mpolu be yooyi, wusë kuba nzenzëbë i mboongu yooso yi Yelusaleemë. 4Naandi wusë kucikë mëkakëtë mooso më singangë-Nzaambi i miloonji n'kaakë i wusë bëyufulë kuni kwabutulu Kliistu. 5Baawu bisë n'vutulilë : « Ku Betëlëyeemë li Zudee, bwaawu licyelikë lisonikë m'bici :
6“Njeeyi, Betëlëyeemë ku si Zudee,
njeeyi mwiinji bucyeeci mu n'taandë mëvulë më Zudee,
cibilë mu njeeyi mwaawu mba mu m'basikilë fumu
yinë mba yin'likilë mboongwaami Islayeelë#2.6 Mis 5.1.” »
7Mu lyaawu, Eloodë wusë vekilë ku mësweeci, bangë bungelë bwiinji bën'sulikilë ntaangu yo yim'basikilë mbotë. 8Naandi wusë bëfilë ku Betëlëyeemë, i wusë bëkaambë : « Yendaanu, lwe zaabyaanu cyelikë cyooso mu mwaanë, i bunë beeno luke n'zakënë, n'dubulyaanu, bwiinji yivaamë yeendë mu ke n'kuundi. »
9Baawu bunë bayuwu n'tinu, bisë ke yendaangë. Baawu bisë monë mbotë yiselukë ku mëselukulë më ntaangu, tee yi fanë yisikiminë mbiinji yabë mwaanë. 10Baawu bisë ba mu liyaanji linenë mu kuyimonë. 11Bakoti ku n'zo, bisë monë mwaanë yimunë mamaandi Maali. Bisë fukumë i bisë n'kuundë. Bisë kutulë businë bwaawu, bisë n'kwindulilë mëkabu : woolë, n'liinji wu mpeembi i yaafë yi miilë. 12Balubulu mu ndoosi, mu kuleembu kuvutukë ke Eloodë, mu kuvutukë ku bwalë bwaawu baawu bisë mboongë nzilë yin'ka.
Lutinunu ku Zipiitë
13Bangë bungelë bayendi, yaanzi yi Fumu yisë kumonikinë Zozeefë mu ndoosi i yisë n'kaambë : « Manë n'telë, boongë mwaanë i mamaandi, tiinë ku Zipiitë. Kalilë kuunë tee yi fanë yikulubulilë, cibilë Eloodë mba wun'toombë kuvoondë mwaanë. » 14Munë bwiilu beenë, Zozeefë wutelëmë, kuboongë mwaanë i mamaandi, i wusë kweendë ku Zipiitë. 15Naandi wusë kalilë kuunë tee lufwa lu Eloodë, mu kudedikini manë mëtubilë Fumu mu m'bici : « Yatelë mwanaami mu kubasikë ku Zipiitë#2.15 Oze 11.1.. »
Luvondulu lu baanë
16Bunë Eloodë kwamoni ti bangë bungelë bëm'puutë, likaanzi lisë n'kotilë. Naandi wusë tumisi më kuvoondë ku Betëlëyeemë i mu mikabë yimesë, baanë booso bëbakëlë bë mivu wali i bo bëbunu kuyiduci, bunë ntaangu yitoonë yo bangë bungelë bëyin'zimuninë saangu. 17Mu bwaawu lisë vangëninë lyo Yelemi m'bici kutendulë :
18« Mbeembu yisë kuwukunu ku Lama,
n'luunji i lwaambu lunenë.
Mati Laceelë wulë mu kulilë baanë baandi,
wumaangë kuboondu, cibilë baawu bafwa#2.18 Yel 31.15.. »
Luvutukulu ku Zipiitë
19Fë mbusë lufwa lu Eloodë, yaanzi Fumu kumonikinë Zozeefë ku ndoosi kunë Zipiitë. 20Naandi wusë n'kaambë : « Manë n'telë, boongë mwaanë i mamaandi, i vutukënë ku Islayeelë, banë bësakaangë mbingu mu luziingu lu mwaanë bafwa. » 21Zozeefë wusë manë n'telë, kuboongë mwaanë i mamaandi i wusë vutukë ku Islayeelë. 22Kasi bunë kwayuwu ti Alëkeluusë#2.22 Alëkeluusë : mwaanë i cibyalilë ci n'kuluutu Eloodë. wulëtumi li Zudee fë ciikë ci tataandi Eloodë, boomë busë n'siimbë mu kube vutukë kwaawu. Na wusë ke kalë ku libweeti li Ngalilee, bunë Nzaambi kun'lubulilë mu ndoosi. 23Naandi wusë ke kalë ku livulë bën'teelë Nazaleetë. Bwa boobo bwa buvanginë manë mëbikë mibici : « Naandi wun'teelu musë Nazaleetë#2.23 Musë Nazaleetë : muutu wun'zingilaangë ku livulë li Nazaleetë (Mat 21.11). Mëv 24.5. . »
Избрани в момента:
Matye 2: NTVIL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2019, Wycliffe Bible Translators, Inc. and © Alliance Biblique du Congo. All rights reserved.