Pomulanya 7
7
Sarita Mangkonong Samal Ue
1Wali masae kojomo i Nuh mapalaong mangika bangka etu panewa room. Wali tempo bangka etu roomo raika, tempo etu i Pue Yawe manganto’oka i Nuh, “Boros tau to tuwu ri tempo si’i, pei ane ri pangkitangKu jamo korom semo to mangika lengko to singkonong pei Aku. Wali keni samparia tau to maroo ri raya banuamu pei pasua ri raya bangka bae etu. 2-3Pasi keni seja sangaya samboko yako songonya ngaya nu binatang see tiroowa re’e toronya danapobija muni ri lino. Pei samparia ngaya ntonsi pasi binatang-binatang to masipato rapampueka resi Aku, ane to etu pitu mboko sangaya to danukeni ri raya bangka. Pei ane binatang-binatang to taa masipato rapampueka, gana ane ojo samboko sangaya. 4Wali ika palaong to etu apa ri rayanya pitu mbengi Aku damantudumaka uja ri lino. Uja etu datudu opo mpuyu mbengi pei opo mpuyu eo kasaenya. Naka pei Aku damangantudumaka uja etu see samparia to inikangKu to re’e nosanya ri wawo ntana darakaja’aka yau.” Etu semo to nato’oka i mPue Yawe i Nuh.
5Wali i Nuh mangika samparia to nato’oka i mPue Yawe ia etu. 6-9Roo see, ia masua ri bangka bae etu sangkani-ngkani pei indo nu ananya pasi ngananya pasi manianya. Pasi ma’i seja binatang-binatang pasi samparia ngayanya anu to tuwu to mandonggo pasi to manjoyo ri wawo ntana, pasi samparia tonsi nempo to masipato rapampueka resi i Pue Allah, pasiwa to taa. Sira ma’i sakangguyu-sakangguyu samboko pei samboko pei masua ri raya bangka etu mangampago i Nuh, sewaju ewa panto’o i mPue Allah resi i Nuh. Wali i Nuh sira wayu pasi samparia anu to tuwu etu re’emo ri raya nu bangka bae etu see taa kono samal. Wali i Nuh ia ono atumo to’unya tempo pangansamal lino.
10Wali yako etu, ojo kagananya pitu eo, ratamo samal etu ri wawo lino. 11-12Ri wuya dua ri eo kasampuyu pitu, tempo etu semo samparia mata nu ue ri raya ntasi maputumo see naka bae kojo ue mowo to masuwu, pasi tiloka rao to mangompo ue see tudu samparia ue to ri wawo nu rao etu. Wali tudumo uja ntombo opo mpuyu mbengi pei opo mpuyu eo kasaenya. Etu semo to mawali ri tempo i Nuh ono atumo to’unya.
13Pei re’e katawanya rata uja etu, eo etu semo i Nuh sira sana owo room masua ri raya bangka bae. Wali i Nuh sangkani pei ananya, i Sem, i Yapet pasi i Ham pasi indo nu ana nsira opo, sira samparia paka re’emo ri raya bangka bae etu. 14Pasi sindara-ndara pei sira etu, re’e samparia ngaya nu binatang, to maila, pasi to yole. Pasi re’e seja samparia ngayanya anu to tuwu to mandonggo pasi to manjoyo ri wawo ntana. Pasi re’e seja samparia ngaya ntonsi pasi anu to yusa to re’e paninya. 15-16Wali samparia to etu roomo seja nasakangguyu-sakangguyu mampago i Nuh ri raya bangka bae etu. Binatang to masua etu samboko pei samboko singkonong ewa to roomo nato’oka i mPue Allah i Nuh. Wali ojo karoonya samparia etu masuamo ri raya bangka bae, i Pue Yawe semo to mangaba’a wombo nu bangka etu.
17Wali opo mpuyu eo kasaenya samal etu ojo tiduga-dugang ri lino. Ue etu kanjo’u-njo’u kampone-mpone mangokotaka bangka bae etu see naka malanganimo yako ri wawo ntana. 18Ue etu tiduga-dugang kabaenya see naka bangka bae etu jamo kabangka-bangka ri wawonya. 19Wali bae kojomo katidugangi nu ue etu mangalodomaka yau lino pasi mangalodomaka yau samparia tongku to re’e ri ara nu yangi. 20Wali ue etu pitu meter kayombunya pamponenya wo’u yako ri rapa ntongku to malangan kojo. 21Wali samparia anu to tuwu ri lino paka namate yau. Etumo, samparia tonsi, samparia binatang to yole pasi to maila, samparia anu to tuwu to mandonggo pasi to manjoyo ri wawo ntana, pasi samparia tau. 22Samparia anu to manosa to re’e ri wawo ntana paka rapakaja’aka yau tempo etu. 23Wali ewa wetu naika i mPue Allah mampakaja’aka yau samparia anu to tuwu ri lino, etu semo tau pasi binatang pasi anu to tuwu to mandonggo pasi to manjoyo ri wawo ntana, pasi tonsi, samparia paka rapakaja’aka yaumo. Jamo i Nuh pasi yununya pasi binatang-binatang to re’e resi ia ri raya bangka bae to taa mate yau. 24Wali yako ri pamulanya samal ue etu, satu pei lima mpuyu mbengi kasaenya ue etu mangalodomaka yau samparia to re’e ri lino.
Избрани в момента:
Pomulanya 7: WNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2018 New Tribes Mission, Sanford, FL 32771-1487, USA.
Printed in the United States of America