MARIKO 5
5
1MAGĨKINYA mũrĩmo ũrĩa wa iria, bũrũri wa Agerasi. 2Na aarĩkia kuuma marikabu-inĩ, ihinda o rĩu agĩtũngwo nĩ mũndũ woimĩte mbĩrĩra-inĩ wĩ na ngoma thũku, 3watũire kũu mbĩrĩra-inĩ: na gũtirĩ mũndũ ũngĩhota gũcoka kũmuoha na kĩndũ, o na mũnyororo; 4nĩ gũkorũo aanohwo kaingĩ na bĩngũ cia magũrũ na mĩnyororo, nayo mĩnyororo ĩkagathũranio nĩwe, na bĩngũ igatuangwo tũcunjĩ: na gũtirĩ mũndũ warĩ na hinya wa kũmũhoreria. 5Na hingo ciothe, ũtukũ na mũthenya, kũu mbĩrĩra-inĩ o na irĩma-inĩ, aatũire akayaga na agetemengaga na mahiga. 6Nake ona Jesu e haraya, akĩhanyũka, akĩmũinamĩrĩra; 7akĩanĩrĩra na mũgambo mũnene, akiuga atĩrĩ, Twĩ na ũhoro ũrĩkũ ithuĩ nawe, Jesu, Mũrũ wa Ngai ũrĩa wĩ Igũrũ mũno? Ndagũthaitha na Ngai, ndũka’nyarire. 8Tondũ we nĩaamwĩrire atĩrĩ, Ngoma ĩno thũku, nduume thĩinĩ wa mũndũ ũyũ. 9Agĩcoka akĩmũũria, Wĩtagwo atĩa? Nake akĩmwĩra, Njĩtagwo Legioni#5.9 Legioni: nĩ kiugo kĩa Aroma gĩa kũgweta mbũtũ ya athigari. Rora v.15; tondũ tũrĩ aingĩ. 10Akĩmũthaitha mũno ndagaciingate ciume bũrũri ũcio. 11Na rĩrĩ, kũu kĩrĩma-inĩ kwarĩ rũũru rũnene rũa ngũrũe rũarĩaga. 12Nacio ngoma ikĩmũthaitha, ikiuga, Tũtũme thĩinĩ wa ngũrũe iria, tũitonye cio. 13Nake agĩciĩtĩkĩria. Nacio ngoma iria thũku ikiuma, igĩtonya ngũrũe: rũũru ruothe rũgĩkĩharũrũka kĩgaragaro na ihenya, rũgĩtonya o iria thĩinĩ, ngũrũe ciigana ta ngiri igĩrĩ; igĩitwo maĩ-inĩ.
14Nao arĩithi makĩũra, makĩheana ũhoro ũcio itũũra-inĩ o na mĩgũnda-inĩ. Andũ magĩgĩũka kuona ũndũ ũcio wĩkĩtwo, ũrĩa ũtariĩ. 15Magĩkinya harĩ Jesu, makĩona ũrĩa wagwatĩtwo nĩ ndaimono aikaire thĩ, ehumbĩte nguo na agacoka kũũhĩga wega, o ũcio warĩ na ngoma icio mbũtũ: magĩkĩigua guoya. 16Arĩa nao meoneire ũndũ ũcio ũgĩĩkwo makĩmera ũrĩa mũndũ ũcio warĩ na ndaimono ekirũo, o na makĩmahe ũhoro wa ngũrũe. 17Nao makĩrika kũmũthaitha oime bũrũri ũcio wao 18Na agĩthiĩ gũtonya marikabu-rĩ, mũndũ ũcio wagwatĩtwo nĩ ndaimono akĩmũthaitha areke matwarane nake. 19Nake ndaigana kũmwĩtĩkĩria; no kũmwĩra aamwĩrire atĩrĩ, Inũka kwanyu kwĩ andũ anyu, ũmere maũndũ macio manene Mwathani agwĩkĩte, na ũmere ũguo akũiguĩrĩire tha. 20Nake agĩĩthiĩra, agĩitĩka kũheana ũhoro kũu Dekapoli wa maũndũ macio manene Jesu aamwĩkĩte: andũ othe magĩkĩgega.
21Nake Jesu aarĩkia kũringa rĩngĩ na marikabu, aakinya mũrĩmo ũrĩa ũngĩ, kĩrĩndĩ kĩingĩ gĩkĩũngana harĩ we: nake aarĩ hau hũgũrũrũ-inĩ cia iria. 22Na gũgĩũka mũnene ũmwe wa thunagogi, wetagwo Jairũ; na aamuona, akĩmũgũĩra thĩ magũrũ-inĩ, 23akĩmũthaitha mũno akĩmwĩra atĩrĩ, Kairĩtu gakwa nĩgakiriĩ gũkua: ndagũthaitha ũũke ũgakaigĩrĩre moko maku, nĩguo kahonio gatũũre muoyo. 24Magĩgĩthiĩ nake; na kĩrĩndĩ kĩingĩ gĩkĩmuuma thutha, na gĩkamũhatĩkaga.
25Na mũtumia watũire oiraga thakame mĩaka ikũmi na ĩĩrĩ, 26akanyamario na maũndũ maingĩ nĩ athondekani aingĩ, na akanina indo ciake ciothe, na ndahone, no kwĩhĩrũo akehĩrũo makĩria, 27ũcio-rĩ, tondũ nĩaaiguĩte ũhoro wa Jesu, agĩũka na thutha wake thĩinĩ wa kĩrĩndĩ, akĩmũhutia nguo. 28Tondũ nĩoigire atĩrĩ, Ingĩhutia o nguo ciake ciiki, ndahona. 29Na kahinda o kau riurĩro rĩa thakame yake rĩgĩtuma, akĩigua mwĩrĩ ta aahonio mũrimũ wake. 30Nake Jesu, tondũ nĩaamenyire na ngoro yake atĩ hinya ũrĩa woimaga kũrĩ we ũrĩ kuuma, akĩĩhũgũra o rĩmwe e thĩinĩ wa kĩrĩndĩ, akĩũria, Nũ wa’hutia nguo? 31Nao arutwo ake makĩmwĩra atĩrĩ, Woria, Nũ wa’hutia, ũkĩonaga kĩrĩndĩ gĩgĩkũhatĩka? 32Nake akĩroranga one ũrĩa wĩkĩte ũguo. 33Nake mũtumia agĩũka o agĩĩtigagĩra na akĩinainaga, nĩ kũmenya ũrĩa ekĩtwo, akĩmũgũĩra thĩ, akĩmũhe ũhoro wothe na ma. 34Nake akĩmwĩra atĩrĩrĩ, Mwarĩ ũyũ, gwĩtĩkia gwaku nĩkuo gwatũma ũhone; thiĩ na ũhoro, ũikare wĩ mũhonu mũrimũ waku.
35O hĩndĩ ĩo akĩaragia-rĩ, andũ magĩũka moimĩte kwa mũnene ũrĩa wa thunagogi, makiuga, Mwarĩguo nĩaakua: ũgũcoka gũtanga Mũrutani nĩkĩ? 36Nake Jesu, atekũũria ũrĩa kweranwo, akĩĩra mũnene wa thunagogi atĩrĩ, Ndũkamake, no gwĩtĩkia wĩtĩkie. 37Na ndarĩ mũndũ etĩkiririe matwarane nake, tiga Petero na Jakubu, na Johana ũrĩa mũrũ wa nyina na Jakubu. 38Magĩkinya nyũmba ya mũnene ũcio wa thunagogi; nakuo akĩona ironjo, na andũ aingĩ mekũrĩra na magakaya mũno. 39Na aarĩkia gũtonya akĩmoria atĩrĩ, Mũraronja nĩkĩ, na mũkarĩra? Mwana ti mũkuũ, no toro arĩ. 40Nao makĩmũthekerera. Nake aarĩkia kũmoimia nja othe, agĩtwara ithe wa mwana na nyina na arĩa mookĩte nake, agĩtonya kũu mwana aarĩ. 41Akĩnyita mwana guoko, akĩmwĩra atĩrĩ, Talitha kumi!--naguo wataũrũo, nĩ ta kuuga, Kairĩtu gaka, ndakwĩra atĩrĩ, Ũkĩra! 42Nako kairĩtu gagĩũkĩra o rĩmwe, gagĩĩtwara; nĩ gũkorũo nĩkaahingĩtie mĩaka ikũmi na ĩĩrĩ. Magĩkĩgega kĩgeganio kĩnene mũno. 43Nake akĩmakaania mũno matikamenyithie mũndũ ũhoro ũcio: agĩcoka akĩmaatha atĩ kairĩtu kaheo gĩa kũrĩa.
Избрани в момента:
MARIKO 5: OGKBIBLE
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
©Bible Society of Kenya, 2019