KEJADIAN 12
12
Allahn Abram wol tibag ane
1 #
Kis 7:2-3; Ibr 11:8 Weregman Ninikni Allahn Abram fam ele uruk lit, ”Hibam men hori men hangginang men embeselug kinang Anden hiyag huruhuk ambeg lahun,” ibareg, 2”Haren ondohowonen endebuhubon arimano anggolo atuk lit ununggul unuk suwon welamag ulug hineyap habuhukmu hat hunuk palimu weregma hat feneyen ap anggolo fano amuhup.
3 #
Gal 3:8
Aben An nunuk fam hi haptuk lamuhubon Anden nindi enesug laruhuk.
Hat huluwap haptuk lamuhubon Anden huluwap eneptuk laruhuk.
Ap ununggul unuk obog toho hat fahet inindi hasug lamuhubon arimano
mondabi fano roho welamuhup,” ibag.
4-5Abram indag tibag sali mo ilig am wirig am turukmu teng hinahan 75 atfagma Ninikni Allahn hiyag itfag ane hikit toho Kanaan kinangma lul ulug o Haran embeselug laruk lit uhe Sarai men ot amloho Lot men amingmingangge men anggengge o Haran inowen inggikmu atfag angge men hilalug libag.
Kanaan kinangma libareg 6walinggoho laruk lit o pumbuk Sikhem horogma usa ahen unuk More wereg ambeg libag. Libag li itano Kanaan inap weregma libag. 7#Kis 7:5; Gal 3:16Libagma Ninikni Allah ino Abram olohotma inam atfareg, ”Kinang aru haren ondohowonen endebuhubon Anden og isahuk,” ulug hiyag itfag. Hiyag itfagma Abram inowen Ninikni Allah an nolohotma ebenam ahayon fahet hubu lahapmin ulug helep sengget watfag. 8Ware fibareg ik ambut fil lamin ulug o Betel yali fil punu werehon fene libareg o Ai hubula fil o sabo witfareg welatfag. O ino wereg lit Nikni Allah fam sembahyang imin ulug hubu lahaptuk ambeg eke witfag. 9Welatfareg nin wilip atug laruk lit o eke witil eke halog til ik ambut fil wirig atfag.
Abram o Mesir libag ane
10Abram o Kanaan weregma suburu obok humon eke lahibagma suburu elehen o Mesir lamin ulug wirig atfag. 11O Mesir horogma libareg uhe Sarai hiyag utuk lit, ”Hat tuhum anggolo reg lahenma 12Mesir inaben yet hiyahupteg hiyap aru Abram uhe wereg ulug wenggel hahupteg hat humbaharuk lit an nuwabuhup. 13#Kej 20:2, 26:7Ari fahet haren an Abram ot welahi uhunmu an nubahet hiyap tu owe wereg ulug nuwabuk fug angge fano ane nubam turuk lamuhup,” ulug hiyag itfag. 14Hiyag itfareg o Mesir libagma Mesir inaben yet harukmen Sarai ino tuhum anggolo regma yet hibag. 15Mesir inap onowe amingmingangge arimanowen oho Sarai yet hibareg hiyap tuhum fanowon waha ulug inikni hiyag irik libagma ap suwonen Sarai ino ibam hondoko kila fat tibag. 16Kila fat tibareg ap suwon inowen Abram fahet Sarai owe wereg ulug fano ane ubam turuk lit amingmingangge men wam domba, kambing, sapi, keledai, unta men og itfag.
17Hun inowen Abram uhe Sarai hilibag ane fahet Ninikni Allahn ap suwon ino uhesi malik men unubam ouk alem suwon monde fibag. 18Monde fibagma ap suwon inowen Abram wol tibareg kapal haruk lit, ”Haren nungge fahet Sarai an nuhe uk fug angge hele si ane hiyag nitikin? 19Nungge fahet not ulug hele si ane irikinmu anden hilarikik? Huhe tu werehen hilalug lamihin,” ibag. 20Ibareg Abram uhe men anggengge obog toho hilalug o aruwen wilip amusan hondog eneplug lalihip ulug amingmingangge hiyag isibag.
Избрани в момента:
KEJADIAN 12: YLI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
@ LAI 2018