Matias 6
6
Do-doto'o mangale bu-bula'a
1“Ma'istiari: Awa ngini ni siḏagi ninga 'agama ma 'atoranga toma mandan, la ngowa'a ya oḏi'i. Na'o ngini ninga de'oso re ḏegoro so'o gena-ge, ḏuanga i'a ngini ni sanga ua enanga ma ngogele ra ngini ninga Ḇaḇa da'u toma soroga.#Mat. 23:5
2Sababu gena-ge na'o ngini ni pula'a ninga bu-bula'a toma ngowa'a ma dinga'unu ua, awa na si ie tala-ie tala toma ngowa'a lelegu ma tero sa'olo ngowa'a munafiki. Ananga 'aḏi nyanyaḏi ya si'a'a toma wala puji ma dara re toma ngo'omo lamo'o, la ngowa'a ya'u sihie-hie. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua! 3Mada'a na'o ngini ni pula'a ninga bu-bula'a toma ngowa'a ma dinga'unu ua, pula'a siogo-ogoro, la matengo i'a mai ua ya waro. 4Ḏua ngowa'a ya waro ua mangale ninga bu-bula'a pa'i ninga Ḇaḇa da'u toma soroga 'a oḏi'i. Dadi Unanga ḏuanga i'a 'o pula'a ngogele ra ngini.
Do-doto'o mangale manyiata
(Luk. 11:2-4)
5Re wakutu ngini ni manyiata, awa ni dadi sa'olo ngowa'a munafiki! Wakutu ananga gena-ge 'aḏi manyiata 'aḏi nyanyaḏi made-de'oso toma wala-wala puji re toma ngo'omo ma sola, la ngowa'a ya'u oḏi'i kara ya'u puji re silamo'o ananga. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua!#Luk. 18:10-14 6Mada'a wakutu ngini ni manyiata, osama toma kamara re kuci ngalana, kara ni manyiata ra ninga Ḇaḇa ga'a wa oḏi'i ua. Ḏua Unanga ḏuanga i'a 'o pula'a ngogele ra ngini sababu pa'i ninga Ḇaḇa ḇato 'a oḏi'i ngini ni manyiata.
7Wakutu ngini ni manyiata, awa na sida-dadunu ma tero sa'olo ngowa'a ga'a 'aḏi nana'o Ma Jou'ongu Madutu ua. Ananga gena-ge 'aḏi ta'ajiri Ma Jou'ongu Madutu 'a 'isene sababu manga go-golo'o lai kiḏanga. 8Awa ma tero sa'olo ananga. Ninga Ḇaḇa 'a waro ḏua 'oru ga'a ni paralu, wakutu ni kanau ninga go-golo'o nyangu. 9Dadi ni manyiata so'o ne:
‘Minga Baba da'u toma soroga,
'Ani lomanga ngowa'a ya silamo'o re siḏubuso,
10'Ani pareta 'i sapolo ino,
'Ani 'akala ma mau 'i dadi toma dungia nena-ne,
ma tero toma soroga.
11Minga ngo-ngoromo toma wangere nange-ne, Na pula'a ino ga'a ngomi mi paralu.
12Re No singi-ngiranga minga sala,
ma tero ngomi ḏi'i remi si'apongo ngowa'a ga'a 'aḏi 'a'a sala ḏua ra ngomi.
13Re awa No sieanga i'a ngomi mi sanga bo-baja,
mada'a Na siwoi'i ngomi toma jira.#6:13 bolo “toma 'Iblisi ma kuasa.”
[Sababu Baba 'ani Pareta, Kuasa re Mulia kasingado-ngadolo i'a. 'Amin]’
14Na'o ngini na si'apongo ngowa'a ga'a 'aḏi 'a'a sala ra ngini, ninga Ḇaḇa toma soroga ḏuanga i'a 'a singi-ngiranga ḏi'i ngini ninga sala. 15Mada'a na'o ngini na si'apongo ua ngowa'a ga'a 'aḏi 'a'a sala ra ngini, ninga Baba toma soroga 'a singi-ngiranga ua ḏi'i ngini ninga sala.”#Mrk. 11:25-26
Do-doto'o mangale puasa
16“Wakutu ngini ni puasa, awa ninga biono ḇuta, ma tero sa'olo ngowa'a munafiki! Ananga gena-ge ya tuhu manga biono wa'alo, la ngowa'a ya waro ananga 'aḏi puasa kara ya'u puji re silamo'o ananga. Ni ngaku mode-mode'e 'Ari demo-demo nena-ne: Ananga gena-ge manga ngogele rema enanga ḏua! Tantu ḏua Ma Jou'ongu Madutu nu puji re silamo'o ua! 17Mada'a wakutu ngini ni puasa na loca'a ninga biono re na kuḇa ninga utu, 18la ngowa'a ya waro ua mangale ngini ni puasa, pa'i ninga Ḇaḇa ḇato, ga'a wu oḏi'i ua, Unanga ra waro. Ḏua Unanga ḏuanga i'a 'o pula'a ngogele ra ngini sababu pa'i ninga Ḇaḇa ḇato 'a oḏi'i; ngowa'a matengo i'a mai ua 'a oḏi'i!”
Harata toma soroga
(Luk. 12:33-34)
19“Awa ni lomu harata toma dungia di'a ninga diri. Sababu enanga gena-ge nyengara 'i keho re nyanyao'o ya sijira re ngowa'a to-tori'i sapolo ya tori'i.#Yak. 5:2-3 20Siḏibo ḏi'i ni lomu harata toma soroga. Sababu enanga gena-ge 'i keho ua re nyanyao'o ya sijira yoḏu'u re ngowa'a to-tori'i ya tori'i yoḏu'u. 21Sababu ninga harata na gare gena ngi'a, 'akala re sinyingara mai gena ngi'a ḏi'i!”
Tarangi di'a lese
(Luk. 11:34-36)
22“La'o gena-ge 'i dadi sa'olo lese ma lapuru. Na'o ninga la'o 'i la-la, ninga lese rimoi mo-moini 'i tarangi. 23Mada'a na'o ninga la'o 'i siḏi re karasa, ninga lese rimoi mo-moini 'i dadi hafu. Dadi na'o lapuru taninga lese 'i hafu, marai ḏua ninga lese 'i hafu masala!”
Ma Jou'ongu Madutu re harata
(Luk. 16:13, 12:22-31)
24“Sanga ua, matengo 'o de-de'oso ti-tiai tuanga nga muḏiḏi! Sababu unanga 'ai 'akala re sinyingara 'i kucela: Unanga 'o lebe dadalara tuanga matengo reo tuanga ma lelegu. Bolo unanga 'o mete'e lebe cufala tai tuanga matengo reo tuanga ma lelegu. So'o gena ḏi'i, sanga ua ngini ni lomu harata toma dungia nena-ne simete'e ni de-de'oso ti-tiai Ma Jou'ongu Madutu!
25Sababu gena-ge, Ngoi to siajele ra ngini nena-ne: Awa ni dodato mangale ninga 'ahu: bae 'oru ga'a ni oromo bae 'oru ga'a ni ka'e. Re ḏi'i, awa ni madodato mangale ninga lese: 'Oru ga'a ni pake. Sababu tantu ḏua, ninga 'ahu lebe la-lamo'o i'a reo ngo-ngoromo re lese lebe la-lamo'o i'a reo pakeanga! 26Oḏi'i ḇato namo diwanga, enanga 'i so'ana mai ua, 'i 'utu'u mai ua, re 'i lomu mai ua guḏa ma hasili toma titila. Kalaha so'o gena, ninga Ḇaḇa toma soroga 'a pula'a enanga ma ngo-ngoromo. Tantu ḏua ngini reni waro, ngini lebe la-lamo'o i'a reo namo diwanga! 27Re ḏi'i, kalaha pa'i jam rimoi ḇato tai 'umuru ma giḏanga 'a guna ra ngini ninga sigolona nga'unu 'a dogo sababu 'o madodato?!
28I'a sa'olo ngini ni madodato mangale pakeanga? Tai'i ni tailako la-la ino 'o saya-saya 'i konyo toma goroa. Saya-saya gena-ge kama munara ua re kama 'a'a ma pakeanga ua. 29Mada'a, Ngoi to siajele ra ngini nena-ne: Kalaha 'Olana Salomo ngowa'a rema-enanga madutu, 'ai pakeanga ma rousu ma tero ua sa'olo saya-saya gena-ge.#1'Oln. 10:4-7; 2Taw. 9:3-6 30Saya-saya toma goroa 'i konyo wangere nange-ne, re da-daini ngowa'a ya tau'u. Kalaha so'o gena-ge, Ma Jou'ongu Madutu 'a diai saya-saya gena-ge lai rousu masala. Dadi ma la-lamo'o i'a ḏi'i Unanga 'o diai ngini! Dadi i'a sa'olo ninga ngo-ngaku pa'i ceka'a ua ra Ma Jou'ongu Madutu?! 31Sababu gena-ge, awa ni madodato re ni kanau, ‘Ngene ḏuanga i'a wo oromo 'oru?’ bolo, ‘Ngene ḏuanga i'a wo ka'e 'oru?’ bolo, ‘Ngene ḏuanga i'a wo pake 'oru?’ 32Mo-moini gena-ge ngowa-ngowa'a ga'a nana'o Ma Jou'ongu Madutu ua ananga ya disa. Mada'a ninga Ḇaḇa da'u toma soroga 'a waro ninga paralu mo-moini. 33Mada'a siḏibo ḏi'i, siḏa-siḏa ngini ni makutale dadi ngowa'a loasa re banari re ninga 'ahu mete'e Ma Jou'ongu Madutu sa'olo ninga 'Olana. Ḏua Unanga 'o pula'a 'ori i'a mo-moini ga'a ngini ni paralu. 34Sababu gena-ge, awa ni dodato mangale wangere da-daini, sababu enanga rema susa re sangisara masiretene. Wangere nange-ne enanga ma susa re sangisara ngadolo nena-ne ḇato, awa na dogo moju sababu ni dodato mangale wangere da-daini!”
Избрани в момента:
Matias 6: SNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
2015 © Indonesian Bible Society