Matias 14
14
Yohanes tukanga baptis 'o sengene
(Mrk. 6:14-29; Luk. 9:7-9)
1Toma 'orasa gena-ge, 'Olana Herodes#14:1 Oḏi'i “Herodes Antipas” toma kamus. ga'a 'o pareta toma daeraha Galilea, unanga 'a 'isene habari mangale Yesus. 2Herodes 'o kanau tai ngowa'a la-lamo'o, “Yesus gena-ge 'a Yohanes tukanga baptis, unanga gena-ge ro dadunu 'ahu moju. Ma sababu gena-ge, unanga nga'unu 'o 'a'a ga'a hera-heranga.”
3-4Herodes 'o kanau so'o gena, sababu 'au nga'ene wakutu Yohanes 'o sengene nyangu, 'a Herodes 'o molo'ara ngo Herodias ga'a 'a Filipus 'ai were'a, wakutu 'a Filipus 'o 'ahu moju. Sidogo ḏi'i, 'a Herodes re 'a Filipus, ananga nga muḏiḏi gia nongoḏu. Dadi Yohanes 'o ḇangata tau-taunu 'a Herodes, “Ngana na mete'e ua Musa 'ai hukumu, sababu ngana na molo'ara 'ani dau'u madutu, ngo Herodias.” Sababu gena-ge, Herodes ro soma'a sordado 'aḏi cako'o 'a Yohanes, re 'u piri'u re 'u singosama unanga toma bui.#Mrk. 6:17-18; Luk. 3:19-20#Im. 18:16, 20:21 5Herodes mau 'o sisengene 'a Yohanes, mada'a unanga ḏi'i 'o mojongo ngowa'a kawasa, sababu ananga 'aḏi ngaku 'a Yohanes gena-ge nabi.
6Wakutu Herodes 'ai musungu tero, ngo Herodias 'ami ngowa'a were'a matengo mo roje rousu masala tai ioronongoḏu singadolo Herodes 'ai 'akala re sinyingara 'i sanangi masala. 7Dadi unanga 'o sijaji rema sasi mangale 'oru ḇato na'o munanga mo golo'o, unanga 'a pula'a.
8Munanga mo sangoro, “Pula'a ra ngoi Yohanes tukanga baptis 'ai sae'e sigae toma baki.” Munanga mo golo'o gena-ge sababu 'ami ngina mi sido-doto'o munanga di'a golo'o so'o gena-ge.
9Wakutu Herodes 'a 'isene 'ami go-golo'o so'o gena, unanga 'ai 'akala re sinyingara 'i kangela masala. Mada'a sababu unanga ro sijaji rema sasi tai ioronongoḏu manga biono, unanga 'o soma'a 'ami go-golo'o balasu si'a'a so'o gena. 10Dadi Herodes 'o soma'a sordado 'aḏi tola'a 'a Yohanes 'ai camala. 11Gena ḏua, 'a Yohanes 'ai sae'e ya sigae toma baki re ya gasa ino, sipula'a toma mosolese gena-ge kara munanga mo gasa tami ngina. 12Togumu i'a, 'a Yohanes 'ai me-mete'e 'aḏi sapolo di'a 'oro re 'aḏi palihara unanga 'ai mayeti, kara siajele ra Yesus.
Yesus 'o pula'a oromo ngowa'a nga cala romotoa
(Mrk. 6:30-44; Luk. 9:10-17; Yoh. 6:1-14)
13Wakutu Yesus 'a 'isene habari gena-ge, Unanga masiretene 'o mabalene toma oti di'a sisoi'i tala re 'o tagi disa ngi'i ga-garura. Mada'a wakutu ngowa'a kawasa ya 'isene Yesus ro tagi, ananga ya sisoi'i tala manga limau re 'aḏi siduu'u Unanga sitola'a ma ji'o mete'e tana'a dudungu. 14Wakutu Yesus 'o 'uci toma oti ino re 'O oḏi'i ngowa'a repe, Tai 'akala re sinyingara 'i baolo dadalara ra ananga. Dadi Unanga 'o si-la ngowa-ngowa'a siḏi toma ngowa'a repe manga sigolona.
15Ma 'orasa wangere so'o ne'o ḏua, Yesus 'ai me-mete'e 'aḏi sapolo ra Unanga re 'aḏi kanau, “Sa'i ri lobi'i re ngi'i ne 'i tiwongo i'a. Jobilaha Jou no soma'a ngowa'a repe nena-ne 'aḏi maḏibo, la 'aḏi tibo manga ngo-ngoromo toma gamu ga'a co-cori ngi'i nena-ne.”
16Yesus 'o sangoro, “Ngini nena-ne balasu pula'a ngo-ngoromo ra ananga. Awa simaha ananga 'aḏi maḏibo remanga sawini.”
17Yesus 'ai me-mete'e 'aḏi kanau, “Ngomi minga dodahe pa'i roti ngai romotoa re nyao'o ngai ḏiḏi!”
18Yesus 'o kanau, “Gasa gena-ge ino!” 19Gena ḏua, Yesus 'o soma'a ngowa'a repe gena-ge 'aḏi tegoro toma rurubu ma re'u. Re Unanga 'o 'oro roti ngai romotoa re ma nyao'o ngai ḏiḏi 'O talaḏi ie da'u diwanga re 'O sibere ie murasa ma la ra Ma Jou'ongu Madutu. Togumu gena, Unanga 'A poti-poti roti re 'A sipula'a Tai me-mete'e, kara ananga ya sibalangu toma ngowa'a repe gena-ge. 20Ananga mo-moini 'aḏi oromo singadolo 'aḏi wunusu. Togumu i'a, Yesus 'ai me-mete'e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga. 21Toma 'orasa gena-ge, ngowa'a repe ga'a 'aḏi oromo na-nau'u ḇato ḏa nga cala romotoa, gena-ge siroimi ua we-were'a re ngowa 'olo.
Yesus 'o tagi toma ḇanyo ma re'u
(Mrk. 6:45-52; Yoh. 6:16-21)
22Togumu i'a, Yesus 'o soma'a 'Ai me-mete'e 'aḏi mabalene toma oti re 'aḏi sidete siḏa i'a da'a talaga kaci moi. Re Unanga 'o soma'a ngowa'a kawasa 'aḏi maḏibo. 23Wakutu ngowa'a kawasa raḏi maḏibo, Unanga masiretene 'o pere ie toma sau di'a 'O manyiata. Wakutu lobi'i 'i ngadolo ḏua, 'age Yesus pa'i 'o matengo moju. 24Mada'a toma 'orasa gena-ge ḏua, Yesus 'ai me-mete'e ananga raḏi amono lai kiḏanga re raḏi ngadolo toma talaga ma golona. Momoku ya wa'ala manga oti, sababu ananga 'aḏi tomo karawiana.
25Wakutu cori wangere i'a, Yesus 'o sapolo ra ananga tagi mete'e ḇanyo ma re'u. 26Mada'a wakutu Yesus 'ai me-mete'e 'aḏi oḏi'i Unanga tagi mete'e toma ḇanyo ma re'u, ananga 'aḏi sawana masala re mojongo 'aḏi poa'a, “ 'O ca'ata!”
27Mada'a Yesus jau-jau 'o kanau ra ananga, “Masiogoro! Ngoi ne Yesus. Dadi mojongo awa!”
28Ḏua 'a Petrus 'o kanau, “Ma Jou, na'o so'o gena, No soma'a ḇato ngoi to sapolo i'a to tagi mete'e ḇanyo ma re'u.”
29Unanga 'a sangoro, “Sapolo ino!” Ḏua 'a Petrus 'o 'uci toma oti re 'o tagi mete'e toma ḇanyo ma re'u jau i'a Yesus. 30Mada'a wakutu Petrus 'a basono karawiana siḏi woḏi, unanga ro mojongo re ro mulaingi 'o jala. Dadi unanga 'o poa'a, “Ma Jou, No salamata ngoi!”
31Yesus jau-jau 'a toa'a 'ai giama re 'u cako'o 'a Petrus, re 'O kanau, “Petrus, ngana 'ani ngo-ngaku pa'i ceka'a ua ḇato ra Ngoi. I'a sa'olo 'ani 'akala re sinyingara 'i taka-taka?”
32Ḏua ananga nga muḏiḏi 'aḏi palene toma oti. Toma 'orasa gena-ge ḏua karawiana re momoku ḏi'i mai ri togumu. 33Yesus 'ai me-mete'e ananga mo-moini 'aḏi silamo'o re siḏubuso Unanga. Ananga gena-ge 'aḏi kanau, “Mode-mode'e, Jou Ma Jou'ongu Madutu 'ai Ngowa'a Nau'u!”
Yesus 'o si-la ngowa-ngowa'a siḏi toma daeraha Genesaret
(Mrk. 6:53-56)
34Wakutu Yesus rai me-mete'e raḏi ngadolo toma talaga kaci moi, ananga 'aḏi 'uci toma daeraha Genesaret. 35Re wakutu ngowa-ngowa'a 'age 'aḏi oḏi'i Yesus ro sapolo, ananga ya sihabari toma daeraha mo-moini. Dadi ananga matai gasa ino ngowa-ngowa'a siḏi mo-moini ra Yesus. 36Ananga 'aḏi golo'o ra Yesus mangale na'o nyengara garia ngowa-ngowa'a siḏi gena-ge taragolo'o ya cigi 'ai juba ma dere ḇato. Ḏua ananga mo-moini ga'a ya cigi Unanga 'ai juba gena-ge raḏi la.
Избрани в момента:
Matias 14: SNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
2015 © Indonesian Bible Society