YOHANES 8
8
1Yesus nat, e sikon juwas Saitun ajisosef. 2Ajofay tamnakap masirin, aramat ipic e Allah cem aojisosef. Ow takasan fumi aamwiciromfes. Aramat ipic masirin, aneypwikapef, wunam atakam e ow amememtamef. 3E Allah Jirmec mamememtam owam, e Parisi owam, cowoc cowok atowomiwfes. Ar e cowoc kawey cemen aanef aporfesen. Bare, ar e cowoc e ow bipu memem jirmec ajirimfes. 4Ar, masirin atakam Yesus aotawfes. “Guru. Ow, a cowoc, kawey cemen aanor, manmok arma atiweresen. 5Bare, Musa, Allah Jirmec, surat aeapomef. Daram e Jirmec ajamkawimom. E Jirmec atakam, ‘Car, ek, kawey cemen aanor cowoc dampu bajimirokopomey.’ E Jirmec inim aema. O nat, ucim atakam atawmem?” Inim aefes. 6E ow, Yesus salah bwem, akat aemfes. Inimas ar inim jonow e aramat ipic atowporfes. Ar e Yesus salah atakam botaw epen baporen.
E Yesus nat, jimas ajirapef, wunam banek asuk wow e capinmi aemapomef. 7E ow nat, e aramat ipic jonow atowpora aefes. Yesus inimas aporef, wunam jimas aosuef. Aram atakam aotawef. “E caramaman dosa opok ipicnew, aram ek e cowoc dampu bap a takam bajiwicow.” Inim aeef. 8Aramat ipicam jimas aojirapef, wunam asuk wow e capinmi aoemapomef. 9E ow inim atakam jen ajifes, aram jipic cowok aramtakayosa aramtakayosa, inim aefes. E akmat inim ow bap a takam jisosfes. E ay ow masirin, asep ajisosfes. Inimas Yesusam, e cowocam, e wun ow arke bipu arop aememfes. 10Yesus masirin, asitef. Aram atakam e cowoc aotawef. “E ow wace? E osalah atakam botaw ow opok cowok aranew?” Inim aeef. 11E cowoc masirin, “Bare. E dosalah atakam botaw ow opok cowok araman.” Inim aeef. E Yesus masirin, “Doram e osalah atakam botaw opok ara. Oram, cey. Oram dosa boem arapok.” Yesus inim aeef.]
Yesus awames capinmi sereas anakat ara
12Bare. Yesus atakam e ow aootawef. “Dor ow atakam amememtamcimin. Inimas dor awames capinmi sereas anakat awapey ara. Dor sereas e dor ajamkawimenes ow atetamamin. Inimas e ow jiwic aman bojar opok aemcemes. Doram jiwnenak e ow atetamamin.” Inim aeef.
13E Parisi owam atakam e aramat ipic aotawfes. “Oram or atakam atawmem. Inimas e atakam, atakamnak opok ara.” Inim aefes.
14E Yesus masirin, “Dor e ewenawof asan nomsom. Doram e ajisoscey asan nomsom. Inimas doram dor atakam atawcey, e atakamam atakamnak ara. E nat, car e ewenawof asan camson opok. Caram e ajisoscey asan camson opok. 15E kawey ow dosa atakam asakamtiwmokomas, bare asmat bi binip cowok ara. Do nat, ow dosa atakam basakamtiw opok ara. 16Doram dorop opok. Doricipic atewenamfan. Aramat ipicam dodam sotop awamec. Inimas dor ow adosa atakam asakamtiwceynew, e atakam asakamtiwceyas, bare atakamnak ara. 17E caragama Jirmec Surat inim atakam ara: ‘Ow jamnuk atakam awcawor aotawces, aratakam atakamnak ara.’ E surat inim aema. 18Bare, doram dor atakam atawmin. Doricipic dor atewenamfan. Aram dor atakam atawma.” Inim aeef.
19E ow masirin, “E oricipic onakaram?” inim aefes. E Yesusam, “Car dor camsom opok. Caram doricipic camsom opok. Car dor camsom ayaw, e doricipicam camsom.” Inim aeef. 20Yesus a atakam takas e Allah cem aman atawef. Ar e derma uang batewapom asanpu aememef. Ow aramat ipic ban bakimom jofay bwenaw opok. Inimas ow e aramat ipic ban bwemkimom asan opok.
Car e ajisoscey asan bwemjisos asan opok
21Yesus atakam e ow aootawef. “Dor ajisoscimin. Caram dor apowporcemenokom. E nat, car e cadosa epcom damir aafcomokom. Caram e ajisoscey asan bwemjisos asan opok.” Inim aeef. 22E Yahudi ow masirin, “E aramat ipic atakam, ‘Caram e ajisoscey asan bwemjisos asan opok,’ ucimaram? Aram sanaw arma bweames arapenow.” Inim aefes. 23Yesusam, “Car awames capinmi ow ara. Dor masirin, e onam op ipic ara. Caram awames capinmias ara. Do nat, awames capinmias opok. 24Doram atakam car aotawey, ‘Car e cadosa epcom damir aafcomokom,’ inim aeey. Dor e Allah Aeremtewef Ipic awamcey ara. Ca nat, inim atakam basicim opok aemcokom, caram e cadosa epcom damir aafcomokom.” Inim aeef.
25E ow masirin, “O nat, ca ipicam?” Inim aefes. E Yesusam, “Bare, dor eras atakam tareynakut car aotawawirin. 26Doram e aemamokomas, wun atakam arke awompey. Dor e dosa arke aemamokomas, atakam basakamtiw. E nat, e atewenamfan ipic, bare atakamnak ipic ara. Dor e aramat ipic atakam atawefas jen ajiof. Dor masirin, e atakam cowok, awames capinmi ow aotawmin.” Inim aeef. 27Bare, Yesus e aricipic atakam atawef. E nat, e ow e atakam amsom opok. 28E Yesusam, “Car e Asmat Anakat Ajaworemef Ipic e salib os op atewtopomcokom, caram dor e Allah Aeremtewef Ipic ara, inim aporcomonokom. Caram e atakam atawminas dorop atakam opok aporcomokom. E nat, dor e doricipic amememtamfan atakam cowok atawmin. Caram inimas aporcomokom. 29Doram e atewenamfan ipic akat apormaras jipu cowok acowomamin. Inimas e aramat ipic dodam sotop awamec. Aram dor bakan bajiem opok ara.” Inim aeef. 30E aramat ipic inim atakam atawef, ow arkenakut e aramat ipic asicimfes.
Allah atiperesam, Iblis atiperesam, atakam
31Bare, e wun Yahudi ow e Yesus asicimfes. Aramat ipicam atakam e ow aotawef. “Car e doratakam ji aatameawarcokom, bare car domamkawi ow anakat aememcomokom. 32Caram e atakamnak jen ajikurumcomokom. E atakamnak jen ajikurumcokom, kawey ow car bwemoomom asan opok.” Yesus inim aeef. 33E ow masirin, “Dar Abraham urpis araman. Kawey owam dar momom opok cowok araman. Inimas e atakam atawmemas, ‘Kawey ow car bwemoomom asan opok,’ ucim inimaram?” Inim aefes. 34E Yesusam, “Atakamnak ara, ow dosa aemawarces, e dosaas e ow aomomama. 35Kawey ipic, wun ow aomomcow, e ow, e kawey ipic atiperes inim batamemapawar opok aemcemes. E nat, e ipic atiwnak, e aricipic atiw, inim aatamemapawarcema. 36E nat, Allah atiw car asurumtamcannew, bare wunas car bwemomom asan opok cowok. 37Car Abraham urpis araman. Dor inimas nomsom. E nat, car e doratakam ji bwe opok. Inimas car do bacatiw aememamokom ara. 38Dor e doricipic aporomtamfanas, atakam car aotawmin. Ca nat, e caricipic atakam jen ajifokomas jipu acowoymokom.” Yesus inim aeef.
39E ow masirin, “Abraham darafasut araman.” Inim aefes. E Yesus masirin, “Car Abraham urpis anakat aememamokom ayaw, car Abraham aemawirias jipu acowoymokom. (E nat, car inimas opok.) 40E Allah atakam aotawfanas, bare atakamnak ara. Doram e atakam car aotawmin. E nat, car dor bacatiw aememamokom ara. Bare, Abraham inimas bwem opokut. 41Car e caricipic aemamaras jipu acowoymokom ara.” Inim aeef.
E owam, “Darisorow arke opok. Allah cowok daricipic araman.” Inim aefes.
42E Yesus masirin, “Allah caricipic aememamar ayaw, car dor damos jiemamenokom. Bare, dor arasan dorma bwemney asan opok. Allah dor atewenamfan. 43Caram e atawmin atakam jen baji pwicak aemamokom. Inimas car a atakam camsom opok ara. 44Caricipic, bare e Iblis ara. Caram e caricipic akatas jipu, inimas acowoymokom. Ametnak ar ow sanaw bwetiw ipic aememawiri. Wow ajiwaram, sanaw bwetiw ipic aememama. Aram atakamnak botaw amsom opok. Inimas ar e atakamnak bifan afayomama. Aram e suw atakam ipic anakatnakut ara. Inimas ar suw atakam atawma. Eras e ajak aman jipuas ara. 45Do nat, atakamnak aotawmin. Inimas car doratakam basicim opok ara. 46Caram, ‘E Yesus dosa ipic ara,’ inim atakam bwemotaw asan opok. Bare, dor atakamnak aotawmin. Ca nat, e doratakam basicim opok ucim inimaram? 47E Allah arow, e Allah atakam jen ajimes. E nat, car Allah arow opok ara. Inimas car Allah atakam jen baji opok ara.” Yesus inim aeef.
Yesusam, Abrahamam, atakam
48E Yahudi ow masirin, “E atawmom atakam, atakamnak ara. Or Samaria samat ipic araman. E ojak aman, bare dat awap.” Inim aefes. 49E Yesusam, “E dojak aman dat opok. Dor doricipic asicimamin. Ca nat, bifan dor afayomamenokom. 50Dor ow do basicim janim manim opok. E nat, jipic cowok ow do basicim janim aanimama. E ipicam, ow adosa atakam basakamtiw ipic ara. 51Atakamnak ara, ow doratakam ji aeces, aram darim baf opok aemcemes.” Yesus inim aeef.
52E Yahudi ow masirin, “Bare, e ojak aman dat araman. E Abraham damir aafef. E Allah atakam botaw owam damir aaffes. E nat, oratakam, ‘Ow doratakam ji aeces, aram damir baf opok aemcemes,’ inim aemem. 53Bare, e Allah atakam botaw ow damir aaffes. E Abrahamam damir aafef. E nat, e Abraham, ow kanim arawe? Or masirin, ow awut arawe? O nat, ca ipicutam?” Inim aefes.
54E Yesus masirin, “Dor dorma asicimceynew, inimas pwicak ara. E nat, e doricipic dor asicimaman. Ar e atakam atawmokom ipic ara. ‘Aramat ipic darAllah ara.’ Inim aemokom. 55Car aramat ipic camsom opokut. Do nat, aramat ipic nomsom. Doram atakam atawceynew, ‘Dor e aramat ipic nomsom opok,’ inim aeceynew, bare dor suw ipic car cimin aememcimin. E nat, dor aramat ipic nomsom. Doram aratakamji aemin. 56E carafasut juwas Abraham, dor a cenes capinmi baneyap, atakam jen ajief. Inimas jak akat aemapef. Ar e atakam atakamnak aporef, wunam jak akat aemapef.” Yesus inim aeef.
57E Yahudi ow masirin, “E orumur, tahun lima puluh ajiwar opok. E nat, or Abraham bi aporfem arawe?” Inim aefes. 58E Yesus masirin, “Atakamnak ara, e Abraham bajisames opok aemef, dor aememof.” Inim aeef. 59Bare, e ow ek arke atawfes. Aram e ek e Yesus dampu bajimir aememfes. E nat, e aramat ipic acukemef. Wunam ar e Allah cem afisef.
Избрани в момента:
YOHANES 8: LAICNS
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
LAI 1985