YOHANES 6
6
Yesus, amos pok, ow lima ribu ajiwar atatamef
(Mat. 14:13-21; Mrk. 6:30-44; Luk. 9:10-17)
1Bare, Yesus e bwi juwas Galilea aokorsakayjiref. E bwiam wun juwas Tiberias ara. 2Owam e aramat ipic e dam ow ajaworomtawa aeef aporfes. Inimas ow arke e aramat ipic fa asoromomatfes. 3Yesusam sikon op aaptometef, wunam erasan ar e mamkawi ow akac aemapfes. 4E jofayam e Yahudi ow pokbwi juwas Bakamsow Pokbwi sotop asisienawef. 5Yesusam manmok apepemef. Ar ow arkenakut awarimenawfes aporef. Inimas ar jonow Filipus atowef. “Dar awamces ow arkenakut amos pok ocenak asan jittamcom?” Inim aeef. 6Bare, Yesus e Filipus bwempor aemef. Inimas ar eras jonow atowef. E nat, Yesus e amos pok aemcowas, atakam bap emcasakamtiwef.
7E Filipus atep ajitef, “Jipic cowok kerja bar dua ratus ajiwar aemamarnew, e tewetmar gaji takas, awamces ow amos pok aporsipor kanimnakas bajittam, bare cukup opok.” Inim aeef. 8E wun Yesus mamkawi ipic juwas Andreas, Simon Petrus arewec ara. Aram atakam aotawef. 9“Jipic jiwi cowok arasan awamec. Ar amos bokor lima ajiwaram, enam jamnukam, awomec. E pok nat, kanimnakap ara. Arasanam ow arkenakut awamces.” Inim aeef.
10E Yesus masirin, “E ow baneypwikaptotorces.” Inim aeef. Bare, erasan fumin ajukapef. Inimas e ow takas e fumin ton aneypwikaptotorfes. E owerow lima ribunew ajiwar ara. (Cepesam, jiwiam, bajicucumir opok.) 11E Yesusam e amos atewef, wunam terima kasih atakam Allah aotawef. Ar masirin, e amos e aneypwikapfes ow aseyetamef. E enamam inim aemtamef. Bare, e ow takas jak anapitaptotorfes. 12E ow jak anapitaptotorfes ara, Yesus atakam e mamkawi ow aotawef. “E anatiwmes amos pok baramsimey. Ow e amos pok biwosomasin.” Inim aeef. 13Bare, e ow e anatiwfes amos pok aaramsimfes. Aram ese dua belas ajiwar aowapomfes. Er e ow amos bokor ban cowok takas ajiwar anatiwfes amos ara.
14E owam e Yesus aemef junum bweas aporfes ara, aram atakam atawfes. “Dar Allah atakam botaw ipicut awames capinmi bwenaw, manmok afeawirum. Atakamnak ara. Awamec ipic, bare e ipic ara.” Inim aefes. 15E owam e Yesus araja ipic memem atakam fak akekemtawfes. Aramat ipicam inimas aporef. Ar masirin, e sikon capinmi arawun aojisosef.
Yesus bwi ton ajaref
(Mat. 14:22-33; Mrk. 6:45-52)
16Porow, jo atief ara, e mamkawi ow e jopir aapneyfes. 17Aram ci anajuwfes, wunam e kota Kapernaum bajir bin ajisefes. Iram, Yesusam e owpu bapen opok. 18Fo awutam aemef. Waam awut aemseef. 19E ow, kilometer empat ajiwarnew, lima ajiwarnew, po jicowoc inim ajirsefes. Ar masirin, e Yesus bwi ton ajarenawef aporfes. Yesus e emsefes cipu aapenawef. E owam omar awutnakut aefes. 20Aramat ipic nat, “Omar arapok. Do Yesus ara.” Inim aeef. 21E owam jak akat aememfes, wunam Yesus ci basawu atakam atawfes. Bare, ar e at efes asan asarimsetayfes.
Ow Yesus apowfes
22Ajofay tam ara, e poman aememfes ow arke bi binip aceceremfes. “To ara, arasan ci cowoknakap aemseef. Yesus e amamkawi ow bamuw opok aemef. E ow arop anajuwfes.” Inim bi binip aceceremfes. 23Bare, wun Tiberias ewinawfes ci erasan asetayfes. E asetayfes asan, e Yesus terima kasih atakam Allah aotawef, wunam ow arke, amos aanfes asan sotop ara. 24Bare, e asetayfes ow arke, Yesusnew, amamkawi ownew, erasan opok aporfes. Inimas ar e ci aonajuwfes, wunam Kapernaum ajirtayfes. Aram Yesus apowfes.
Yesus, jiwnenak atatamamar amos pok, inim cimin ara
25Bare, e ow Yesus e poman biamnuk aemamtewfes. Ar masirin, atakam e aramat ipic aotawfes. “Guru. Or arasan ucim jofay jinawemfem?” Inim aefes. 26E Yesus masirin, “Atakamnak ara, car e aemof junum bweas aporfokom, wunam dor apowmenokom— bare, inimas opok. Ca nat, e amos awut aanfokom, wunam jak anapitaptotorfokom. Inimas car dor apowmenokom. 27Car e of aofcemar amos pok batewen, jec bawu awutnakut arapok. E nat, e of bofa opokas jec bawuey. Er ca jiwnenak batamemawaras ara. Erasam, e Asmat Anakat Ajaworemef Ipic, car atetamcemanas ara. E doricipic Allah, inimas bwem, dor atewenamfan.” Inim aeef.
28E owam jonow e aramat ipic atowfes. “Dar e Allah akat apormaras bwem, ucim pok emcom?” Inim aefes. 29Yesus masirin, “Car e Allah atewenamef ipic basicimey. Allah eras akat aporma.” Inim aeef. 30E ow atakam, “Ucim junum bweas aemamemnew? Dar or junum bweas aporcomnew, dar asicimcemenom. Ucimas aemcemnew? 31E darafasutmar e amos pok juwas manna e cem opok asan aanfesen. Er e Alkitab atakam jipu ara. ‘Allah, onam op amos pok, e ow atewnemef.’ E Alkitab inim atakam ara.” Inim aefes.
32E Yesus masirin, “Atakamnak ara, e onam op aewneyef amos pok atetamef ipic, bare Musa opok. Doricipic e onam op ewneyef amos pok anakat car atetamaman. Inim aeef. 33E Allah atetamamar amos pok, bare e onam op aewneyef ipic ara. E ipic, jiwnenak, asmat ow atatamama.” Inim aeef.
34E owam, “Tuan! E amos pok mamtatamawarcarowey.” Inim aefes.
35E Yesus masirin, “E jiwnenak atatamamar amos pok, bare dor ara. E dor aapenawcenes ow, amosto opok cowok aememawarcemes. E dor asicimcenes ow bwito opok cowokam aememawarcemes. 36Eras e dor atakam car aotawan jipu ara. Caram manmok dor atiwfenokom. E nat, car do basicim opokut aemamokom. 37-38E doricipic atatamcan ow dor aapenawcemenes. Doram e atewenamfan ipic e akat apormaras jipu bwem, e onam op aewneyof. Dor, dorop akat aporminas jipu bwem baney opok. Inimas e dor aapenawcenes ow botpem opok cowok aemcimin. 39E dor atewenamfan ipic, e atetamfan ow cowoknakapam bapakapios pwicaken. Ar dor e ow takas e Asepnak Jofay bojaworomsumutum akat arawen. 40Wun ow, dor Allah atiw ara, inimas aporcemenes. Aram dor asicimcemenes. Doricipicam inim ow takas jiwnenak batamemawar akat arawen. Doram e ow e asepnak jofay aojaworomsumutumcimin.” Yesus inim aeef. 41Bap ara, e Yesus atakam atawef. “E onam op aewneyef amos pok, bare dor ara.” Inim aeef. Inimas e Yahudi ow, Yesus atakam pwicak anunukumamtawfes. 42E owam, “Awamec ipic Yesus ara. Aram Yusuf atiw ara. Dar e aricipicam, arosowocam, namsom. Inimas aratakam, ‘Dor e onam op aewneyof,’ ucimaram?” Inim aefes.
43Yesus masirin, “Caram atakam pwicak banunukumamtaw arapok. 44Doricipic dor atewenamfan. Aramat ipic, ow do bwenawom binip batetam opok aemcow, ow do bwemenawom asan opok aemcemes. E nat, dor e aenawomcenes ow, e Asepnak Jofay aojaworomsumutumcimin. 45E Allah atakam botaw ow e wun surat aeapomfes atakam, ‘Allah e ow atakam amememtamcema,’ inim atakam aeapomfes. Bare, wun ow doricipic atakam jen ajimes. Aram aratakam atewetmes. E ow takasam dor aenawomcemenes. 46E nat, ow Allah bi bapor opok. E Allah atewenamef ipic cowok, Allah bi arop aporef. 47Atakamnak ara, e dor asicimamenes ow jiwnenak aatamemawarcemes. 48E jiwnenak atetamamar amos pok, bare dor ara. 49E carafasutmar e amos pok juwas manna e ow opok asan aemenfes. E nat, e ow damir aaffes. 50A atakam atawmin amos pok nat, e onam op aewneyef amos pok ara. Ow e amos pok aances, ar damir baf opok cowok aemcemes. 51E onam op aewneyef amos pok, jiwnenak atatamama. E amos pok, bare dor ara. Ow e amos pok aances, aram jiwnenak aatamemawarcemes. Bare, e atetamcimin amos pok, e dodam das ara. Dor e dodam das atetamcimin. Er asmat ow jiwne bweawaras ara.” Inim aeef.
52Bare, e Yahudi ow atakam awutnakut aramaman aamtawfes. “Awamec ipic e dam das da batetam wunam dar e das memen, ucimaram?” Inim aefes. 53Yesusam atakam e ow aotawef. “Atakamnak ara, car e Asmat Anakat Ajaworemef Ipic dam das memen opok aemcokom, wunam ares ban opok aemcokom, bare car jiwnenak bwemomom asan opok. 54Ow e dodam das aemencesam, e dores aancesam, aram jiwnenak aatamemawarcemes. Doram e ow e Asepnak Jofay aojaworomsumutumcimin. 55Bare, e dodam das, e amos pok anakatnak ara. E doresam, e ban bwi anakatnak ara. 56Ow e dodam das aemencesam, e dores aancesam, aram dor cowkon aatamememawarcemenes. Doram e ow cowkon aatamememawarcimin. 57Doricipic jiwne ipic ara. Ar dor atewenamfan. Aram jiwneas dor atetamaman. Inimas ara, doram jiwneas e dodam das aanmes ow atatamamin. 58Dor e onam op aewneyef amos pok ara. E amos pok e darafasutmar aanfes amos pok inim awcawor opok. Darafasutmar amos pok aanfes, e nat, asep jofay aram damir aaffes. E nat, awamec amos pok aances ow, jiwnenak aatamemawarcemes.” Inim aeef.
59Yesus e Kapernaum sembahyang cem aman atakam amememtamef ara, ar inim atakam aotawef.
Ow Yesus atakam ji aeces, jiwnenak aatamemawarcemes
60E wun Yesus mamkawi ow arke, inim atakam jen ajifes ara, aram atakam aotawfes. “Inim atakam amannakut ara. Ow e atakam jen baji ucimaram?” Inim aefes. 61Ar e aramaman aamtawfes atakam, Yesus botaw opokut aemfes. E nat, aramat ipic e amamkawi ow, eras atakam pwicak anunukumamtawfes amsom. Ar masirin, “Car e atawey atakam pwicak apormokomnew? 62Ca nat, e Asmat Anakat Ajaworemef Ipic e bap aemapawiri asan boaptomet aporcokom ucimaram? 63Allah Roh, jiwnenak batamemawaras, ow atatamama. Asmat ow nat, inimas bwemtetam asan opok. Car e dor atakam car aotaweyas ji aecokom, e jiwnenak atatamamar Roh car aenawomceman. 64E nat, ca wun ow do basicim opok.” Inim aeef. Bare, bap ara, Yesusam e a basicim opok aemces ow amsom aememef. Aram e jokmen ow aotasimemtamcow ipic amsom aememef. 65E Yesusam, “Inimas ara, dor atakam car aotawey. ‘Allah, ow, dor bwenawom bi binip batetam opok aemcow, e ow dor bwemenawom asan opok,’ inim aeey.” Yesus inim aeef.
66E wun Yesus mamkawi ow arke inim atakam aporfes, wunam akoromemfes. Aram Yesus bojamkawi opok aemfes. 67E Yesusam atakam e mamkawi ow dua belas ajiwar aotawef. “Caram do bakoromem aranew?” Inim aeef. 68E Simon Petrus masirin, “Tuhan. Dar ca ipic jamkawicom? Ow e oratakam cowok ji aeces, jiwnenak aatamemawarcemes. 69Dar or asicimfenom. Or e Allah atewenamfan tarowat ipic aporfom.” Inim aeef.
70E Yesusam, “Dor awamcokom ow dua belas ajiwar aereremtawfin. E nat, ca wun ipic cowok, bare Iblis inim awcawor ara.” Inim aeef. 71Ar e Simon Iskariot atiw juwas Yudas atakam atawef. E ipic, e Yesus aereremtawef ow dua belas ajiwar wun ipic cowok ara. E nat, asep jofay, e Yudas, Yesus, jokmen ow aotasimemtamef.
Избрани в момента:
YOHANES 6: LAICNS
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
LAI 1985