Yn. 2
2
Siselelo mu Kana
1Enyuma we chindaalo chibili, siselelo siaba mu lukoba lwa Kana e Kalilaya. Maawe owa Yesu abaayo. 2Ne akhaba Yesu ne babeeka bewe beele bosi balaangiilwe mu siselelo esio. 3Nga endali ne yawa maawe owa Yesu aboolela Yesu ali, “Endali yaweele.”
4Yesu aamukobosia ali, “Maayi se kali bali khukhwola umboolele nisio khola tawe. Esaa yase ekhoola tawe.”
5Mala maawe owa Yesu aaboolela bakholi ali, “Khola sisiindu siosi siosi nisio amuboolela.” 6Bayaudi bali ne kamalaka ke kumwiima kwe khusaaba, ne khulwe sifuno sino chabao chinjikha sita che kamabaale, buli ndala yaba ne bubalaayi bwe khu bukula kamatepe karaano namwe sita. 7Nio Yesu aboolela bakholi ali, “Yichusia chinjikha chino kameechi.” Bachichusia choola khu munwa, 8mala aababoolela ali, “Nono khemutaekho kameechi chana matiiti muyilile Omwimeelesi owe naikara!” Bamuyilila kameechi, 9kakaba luno ne keekelile endali mala aakichanjamakho, se amanya endali yino yamile waena tawe (ne kakhali bakholi babataa kameechi bamanya); nio aalaanga omwene siselelo 10mala aamuboolela ali, “Buli mundu yesi yesi anyoanga anywesia endali endayi ne oli bakeni bekura ne aloondiakho musoka. Ne kakhali ewe obiikhile endali endayi lukali khukhwola siise sino!” 11Kamayia kano kaba ke khunyoa niko Yesu akhola mu Kana e Kalilaya; ebweeneyo ekesia luyali lwewe mala babeeka bewe basuubila mu niye. 12#Mat. 4.13 Enyuma wa kano, Yesu ne maawe ne bawandaaye ne babeeka bewe bacha Kaperinaumu bamenyakhoyo chindaalo ndiiti.
Yesu engila mu Lukaangu
(Mat. 21.12-13; Mk. 11.15-17; Lk. 19.45-46)
13 #
Khur. 12.1-27
Siise sia Naikara eye Pasaka siaba sili siimbi, nio Yesu acha Yerusalemu. 14Ebweeneyo aanyoola babaandu mu Lukaangu ne balikho bakusia chieeyi, kamakheese ne kamauusi kamabaya. Akhaba bafunja chirupia bosi baba bekhale khu mesa chabwe.
15Nio akhola kumusariti kwe chisia mala aloonda khangu kamakheese koosi ne chikhaafu biarura mu Lukaangu, afuumalikha chimesa che bafunja chirupia, mala asalanisia chirupia chabwe, 16mala arusia lilaka khwaabo bakusia kamauusi kamabaya ali, “Karusie muno! Lekha khukhola enju eya Paapa khuba esooko!” 17#Chiny. 69.9 Babeeka bewe bakhebulila bali liiandike liboolanga lili, “Wele, silukuluku siase khu nju yowo sioselela mwise nga kumulilo.” 18Bayaudi be bunyali bamukobosia ne lireeba bali, “Mayia siina niko onyala wakhola kakhwekesia efwe kali oli ne bunyali bwe khukhola kano?”
19 #
Mat. 26.61; 27.40; Mk. 14.58; 15.29 Yesu abakobosia ali, “Techula Lukaangu luno lukwe aasi, ne mu ndaalo chitaru ndalwombakha lundi.”
20Bamureeba bali, “Lukaangu luno lwabukula kimiiko kamakhumi kane ne kikiindi sita khulwombakha! Mala ewe olalwombakha mu ndaalo chitaru?”
21Ne kakhali Lukaangu nilwo Yesu alomalomangakho lwaba kumubili kwewe. 22Nio nga alamusibwa khukhwama mu lifwa, babeeka bewe bakhebulila bali aloma lino, mala basuubila liiandiko nende niko Yesu alomanga.
Yesu amanya liiba lie babaandu
23Nga Yesu aba mu Yerusalemu mu ndaalo cha Naikara eye Pasaka, bakali basuubila mu niye nga babona kamayia niko akhola. 24Ne kakhali Yesu se abasuubila tawe; sikila aba abamanya boosi. 25Se enaana omundu yesi yesi amuboleele liiba lie babaandu tawe, sikila niye omwene amanya koosi kaali mu miooyo kiabwe.
Избрани в момента:
Yn. 2: LUBUKUSU
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
©Bible Society of Kenya, 2019