Matiu 4
4
Yesu nakelo Datu Tokadake
(Mrk. 1:9-11; Luk. 3:21-22; Yoh. 1:32-34)
1Roo indo, Yesu naanti Inaona Pue Ala lao i pada wungi bona nakelo Datu Tokadake. 2Indo, Yesu mopuasa iba pulona alona hai iba pulona wengina kamahaena, ido hai marimimi. 3I tempo iti, hawemi Datu Tokadake mouliangaa, “Ane tou-tou AnanaKo Pue Ala, Nutuduhe watu ide mewali roti!”
4Nahanai Yesu, “I lalu Sura Malelaha teuki node: ‘Tauna bara pea tuwo hangko i roti, agaiana tuwo worihe hangko i pampeulainda ope-ope lolita au napahawe Pue Ala.’ ”
5Roo indo, Datu Tokadake moanti Yesu lao i Yerusale, wanua au malelaha, hai natudu meangka i wongko wumbu Souna Pue Ala, 6hai nauliangaa, “Ane tou-tou Anana mpuuKo Pue Ala, mengkanawomoKo hangko inde! BaraKo ina moapa-apa, lawi ara teuki i lalu Sura Malelaha:
‘Pue Ala motuduhe malaekaNa mokampaiKo datiKo marugi.
Ina radokoKo dati tetuhu bitiMu i watu.’ ”#Pta. 91:11-12
7Nahanai Yesu, “Agaiana ara wori teuki i lalu Sura Malelaha au manguli node, ‘Ineeko mampetandaka Ampumu, Pue Ala.’ ”
8Roo indo, Datu Tokadake moanti mbulimi Yesu lao i wongko bulu au mapangka ntepuu, hai natudungia ope-ope kadatua i dunia hai peawanda, 9hai nauliangaa, “Ope-ope ide kuweiKo, ane motumpaKo menomba iriko.”
10Nahanai Yesu, “Peloho Tokadake! Lawi i lalu Sura Malelaha teuki node, ‘Hangangaa menombako i Ampumu, Pue Ala. Batena pea Ia au hintoto nupengkorui.’ ” 11Hangko inditi, padu mpuumi Datu Tokadake mopalehi Yesu, pane hawemohe malaeka morora.
Yesu mampepongka bagoNa i Galilea
(Mrk. 1:14-15; Luk. 4:14-15)
12Bara mani mahae hangko inditi, Yohane Toperiu rahaka hai ratarunggu. Kanahadina Yesu bambari iti, lao hulemi i boea Nasare i tampo Galilea. 13Roo indo, Napalehimi boea Nasare lao maida i boea Kapernaum. Kapernaum iti, boea au i wiwi rano Galilea, i tampo Sebulo hai Naptali. 14Inditi Yesu mobambari Ngkorana Pue i ampu boea, alana tepabukei lolita au napahawe nabi Yesaya hangkoia au manguli node,
15“Tamponda to Sebulo hai to Naptali
au hungku i rano Galilea,
ara ntanda i orupena owai Yarade.
Tampo iti iami Galilea au rapaidai tauna bosa au barahe to Yahudi.
16Hangkoia, tauna inditi tuwohe i lalu kamakaindi,
hai monontohihe kapate.
Agaiana ide-ide, moitamohe pewangka au mahile,
lawi mesupami hadua tauna
au nodo alo au mowangkahihe.”#Yes. 9:1-2
17Mepongka hangko indo, Yesu mopahawe lolitaNa, Nauli, “Nipenosoimide dosami, lawi ina hawemi poparentana Pue Ala i dunia.”
Yesu mokakio topeguruNa au nguru-nguruna
(Mrk. 1:16-20; Luk. 5:1-11)
18Tangana Yesu molumao i wiwi rano Galilea, Ia moita rodua tauna, iamohe Simo (au rahanga wori Peturu) hai Andaria, adina, au tanganda modala i rano, lawi itimi bagonda. 19Nauliangaahe Yesu, “Maimokau hai meulakau Iriko! Barapi ikane au nidala, agaiana manusiami.” 20Rapalehi mpuumi dalanda, hai mepongka alo iti, meulamohe i Yesu.
21Roo indo, Yesu mopaliliu polumaoNa. TangaNa lumao, moita mbuli rodua topohalalu, iamohe, Yakobu hai Yohane, anana Sebedeus. Ihira hai umanda tanganda mopakaroa dala i lalu duanga. Yesu mokakiohe tontaliadi iti bona meulahe Iria. 22Rapalehimi duanganda hai umanda, hai meula worihe i Yesu.
Yesu mepaturo hai mopakaoha bosa tauna
(Luk. 6:17-19)
23Yesu molumao i humalele tampo Galilea hai mepaturo i ope-ope sou penombaa. Ia mopahawe Ngkora Marasa kana i poparentana Pue Ala, hai mopakaoha worihe ope-ope tauna au mahai hai au bara masilolonga watanda. 24Pobagona Yesu tebambari i ope-ope boea i tampo Siria, alana bosa tauna au mai mampeinaohe mohidupa hai Ia. Tauna iti moantihe ranganda ba halalunda au mantodiha ngkaia pakana hakinda hai kaparinda, au napesuangi seta, au mohaki dungka, hai au palu. Yesu mopakaohahe ope-ope. 25I tempo iti, bosa mpuu tauna au meula Iria. Arahe au hangko i tampo Galilea, hangko i Dekapolis,#4:25 Dekapolis: Lempona: ‘hampulo wanua’. hangko i Yerusale, hangko i tampo Yudea, hai ara worihe au hangko i ntanda orupena owai Yarade.
Избрани в момента:
Matiu 4: NPY
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
@LAI 2016