GÉNESIS 10
10
Noepaj huahua huahuacunami
(1 Cr 1.5-23)
1Noepaj huahua huahua callari yayacunaca: Sem, Cam, Jafet shuticunami carca. Paicunami yacu juillu tiyashca q'uipaca huahuacunata charircacuna.
2Jafetpaj churicunaca: Gomer, Magog, Madai, Javán, Tubal, Mesec, Tiras shuticunami carca. 3Gomerpaj churicunaca: Askenaz, Rifat, Togarma shuticunami carca. 4Javanpaj churicunaca: Elisa, Tarsis, Quitim, Dodanim shuticunami carca. 5Tucui paicunaca mama cucha uricunapimi causarcacuna. Paicunaca quiquin rimaita rimajcuna, paicunapaj familia ima shina cashca shina, ch'ican ch'ican llajtacuna tucushpami causarcacuna.
6Campaj churicunaca: Cus, Mizraim, Fut, Canaán shuticunami carca. 7Cuspaj churicunaca: Seba, Havila, Sabta, Raama, Sabteca shuticunami carca. Raamapaj churicunaca: Seba, Dedán shuticunami carca. 8Cusca Nimrod churitami charirca. Paimi cai pachapica punta, tucuita yalli c'ari c'ari runa carca. 9Nimrodca Mandaj Diospaj ñaupajpica, animalcunata japishpa huañuchij c'ari c'ari runami carca. Chaimantami: “Nimrod shina animalcunata japishpa huañuchij c'ari c'ari runa Mandaj Diospaj ñaupajpica caichigari” nincuna. 10Nimrod mandacun llajtacunaca ashtahuan alli llajtacuna Sinarpi caj Babel, Erec, Acad, Calne shuti jatun pueblocunami carca. 11Chai llajtamantaca Asiria llajta ladoman rishpami, chaipica Nínive nishca, Rehobot nishca, Cala nishca pueblocunata shayachirca. 12Nínive pueblohuan Cala pueblohuan chaupipica, Resén shuti jatun pueblotami shayachirca.
13Mizraimca: Ludim, Anamim, Lehabim, Naftuhim, 14Patrusim, Casluhim, Caftorim churicunatami charirca. Caftorimmantami filisteocunaca mirarirca.
15Canaanca Sidón, Het shuti churicunatami charirca. Canaanpaj punta churica Sidonmi carca. 16Canaanpaj huahuacunamantami jebuseocunapish, amorreocunapish, gergeseocunapish, 17heveocunapish, araceocunapish, sineocunapish, 18arvadeocunapish, zemareocunapish, hamateocunapish mirarircacuna. Canaanpaj huahua huahuacunaca caita chaita rishpami causarcacuna. 19Cananeocunapaj llajtaca Sidón pueblomanta callarishpaca Gerarman rina ladota catishpa Gaza pueblocama, shinallataj Sodomaman, Gomorraman, Admaman, Zeboimman rina ladota catishpaca Lasa pueblocamami carca. 20Campaj huahua huahuacunaca chai llajtacunapimi paicunapaj familiacunapuralla shujtaj shujtaj llajta tucushpa, quiquin rimaita rimashpa causarcacuna.
21Jafetpaj punta huauqui Sempish churicunata charircami. Semca, Heberpaj huahua huahuacunapaj ñaupa yayami. 22Sempaj churicunaca: Elam, Asur, Arfaxad, Lud, Aram shuticunami carca. 23Arampaj churicunaca: Uz, Hul, Geter, Mas shuticunami carca. 24Arfaxadpaj churica Sala shutimi carca. Salapaj churica Heber shutimi carca. 25Heberca ishqui churicunatami charirca: Punta churica Pelegmi carca, paipaj huauquica Joctanmi carca. Peleg causai punllacunapimi allpata chaupishpa ch'ican causanata callarircacuna. Chaimantami paitaca Pelegta shutichirca. 26Joctanpaj churicunaca: Almodad, Selef, Hazar-mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila, Jobab shuticunami carca. Joctanpaj churicunaca tucui chaicunami carca. 30Paicunaca Mesa llajtamanta callarishpaca, Sefarman rina ñanta catishpa inti llujshin ladoman caj urcucunacamami causarcacuna. 31Sempaj huahua huahuacunaca chai llajtapimi quiquin familia ima shina cashca shina, quiquin rimaita rimashpa, shujtaj shujtaj llajtacuna tucushpa causarcacuna.
32Noepaj churicunapaj huahua huahua mirarishpa shujtaj shujtaj llajta tucushpa causaj huahua huahuacunaca chaicunami. Yacu juillu tiyashca q'uipaca tucui paicunami caita chaita rishpa tucui cai pachapi shujtaj shujtaj llajta tucushpa causarcacuna.
Избрани в момента:
GÉNESIS 10: QCHI04
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Quichua Chimborazo Bible Revision 2010 © United Bible Societies, 2010.