Duk 2
2
Emana Yisọs
1Akekem ke idaha ukara Sisa Akọstus, anye amaanịm ewʌghọ yak enam ubadawo ke afịd ekondo ñkañ Rum. 2(Ami akedo akpa ubadawo e-ekenamma tọọñọ Kwirinius akedọọk ada ukara ke Siria.) 3Afịd awo emaakaiya abio ammọ nọ ekesịn anyịñ ke ñwed ubadawo.
4Ndin Yosef amaato ke Nasared ke Kadidi aka Betrehem ke Yudia, abio Defid akesịn anyịñ, sia anye aketo ufọk ye aduuk Defid. 5Yosef akesaña ye Mmeri, awonwaan a-anye akeyemme idọ, a-akenyʌññọ asaña ye idịb, aka uwedanyịñ. 6Uman amaaketọọñọ Mmeri ke ini ammọ ebaaha do ke Betrehem, 7ndin anye amaaman akpan amọ, anyʌñ awañ anye ke afọñ anịm ke itie usịn ndidia unam, sia ufañ ikibaaha se ammọ eba ke ufọk isenawo.
8Mme akpemeedọñ emaeba ke ikọd ekpere, e-kekpemeke mme edọñ ammọ ke akoneyo ado. 9Ndin enyere Abọọñ amaabiọññọ, ubọọñ Abasi amaanyʌñayamma afʌk ammọ, ndịk amaanyʌñ amʌm ammọ. 10Ado enyere amaabo ammọ ate, “Ikiidịkke, sia mben eti etob isọk ndufo, a-adiinọ afịd-afịd awo ke ederimbod ekamba idaara. 11Mfịn ami ke abio Defid, Andinyaaña amana inọ ndufo; anye ado Mesaya, a-adooho Abọọñ. 12Ndin idiọọñọ ado ke ndufo eyaekịt ayịn e-ewañña afọñ naña ana ke itie usịn ndidia unam.”
13Kpa ke ndo-ndo ado, udịm mbon anyọñ emaebiọññọ, ediana ye enyere ado etooro Abasi ate:
14“Itooro anie Abasi ke ata anyọñ,
emem anyʌñ aba ke isọñ ye mbon a-anye anọọhọ mfọn.”
15Mme enyere ekedaaña ekpọñ ammọ eka abio ubọọñ Abasi, mme akpemeedọñ emaeneme ke atu idem ammọ ete, “Nam ñnyịn ika Betrehem ikise ñkpọntịbe a-Abọọñ atañña mi inọ ñnyịn.”
16Ndin ammọ emaesọp eka Betrehem, enyʌñ ekesoobo Mmeri ye Yosef ye nsekayịn nte ana ke itie usịn ndidia unam. 17Ke ini ammọ emaekekịt anye, ammọ emaesuan etob ebaña se eketañ ebaña ayịn ado enọ mbon awo, 18idem amaanyʌñ akpa afịd awo se ikikop se mme akpemeedọñ eketañ enọ ammọ. 19Ado Mmeri amaatʌm amʌm afịd se eketañ ado adọñ ke esịd amọ. 20Mme akpemeedọñ emaetịmme enyọñọ, ekaiso ekpono enyʌñ etooro Abasi ke afịd ñkpọ se ammọ ekekịt enyʌñ ekop, a-akesañake akekem naña ekedọkkọ ammọ.
21Akedikem ayọhọ usen itiaita, a-akedooho ini adikpịkke anye mfed ñnyʌñ nsio anye anyịñ, emaesio anye Yisọs, anyịñ a-enyere akenọọhọ mbemiso ediyoyommo anye.
Eben Yisọs edi ke tembịd
22Ke usen ndutịm adinam asana amaakedikem naña Ibed Moses aketemme, Yosef ye Mmeri emaeben Yisọs eka Yerusedem nọ ato do ekesaana anye eyaak enọ Abọọñ Abasi 23(kpa naña ewet ke ñwed Ibed Abasi ete: “Ana eyaak akpa ayịn awodeen enịm saña-saña enọ Abọọñ”), 24enyʌñ enam uwa kpa naña Ibed Abọọñ atemme: “Ibiom iba ye ñnyịn tọmtọm iba.”
25Ekamba awodeen keed amaaba ke Yerusedem, akekere Simiọn a-akedooho adinen awo anyʌñ anie mbaak Abasi. Anye aketie abet idọñesịd Isred, ndin Adisana Sịbidịd amaadoro anye ke idem. 26Adisana Sịbidịd amaayaara awọt Simiọn ke anye idiikpaaha tutu anye akịt Mesaya Abọọñ. 27Sịbidịd amaaben anye aka ke afe tembịd. Ke ini ete ye eka Yisọs ekebenne ayịn edi nọ enam naña Ibed aketemme, 28Simiọn amaabọ Yisọs akama ke ubọk anyʌñ atooro Abasi, ate:
29“Abọọñ Andikpon Ñkan, kpa naña afo akenwọñọ
yak awo mfo anyọñ ke emem.
30Sia anyen mmi akịt adinyaaña mfo,
31a-afo akenamma anịm nọ afịd ederimbod ekịt,
32nọ ado unwana adiyaara anọ mme Yentaid,
anyʌñ ado ubọọñ anọ mbon Isred.”
33Idem amaakpa ete ye eka Yisọs ke afịd se eketañ ebaña anye. 34Ndin Simiọn amaadiọñ ammọ, anyʌñ abo eka amọ Mmeri ate, “Ayịn ami adido ñkpọiduọ ye ñkpọ adidakka nda anọ uwak awo ke Isred, anye adido idiọọñọ ñkpọ ndoduyo, 35nọ ato do eyaara akikere esịd uwak awo. Ndin akañkañ ayaakịm ukpọñ mfo.”
36Brọfed awonwaan keed a-akekereke Ana, ayịn Fanued ake ufọk Asa, amaaba ke ini adinam ado. Anye amaasọñ eti-eti, anye akedọ ndọ isua itiaba kpọd, 37ndin ebe amọ adikpa, anye akedido ebekpa tutu anye asịm isua anaañ ye inaañ. Afịd-afịd ini anye akesiba ke tembịd, akpono Abasi akonayo ye uweeme, atie utreudia anyʌñ abọñ akam. 38Ana amaadʌk adi ke ebe ado, anọ Abasi ekọọm anyʌñatañ ikọ abaña ayịn ado anọ afịd awo se ikinie idodanyen ibaña ufak Yerusedem.
39Ke ini Yosef ye Mmeri emaekenam afịd se ammọ ekenie adinam kpa naña Ibed Abọọñ aketemme, ammọ emaetịmme enyọñ abio ammọ Nasared ke Kadidi. 40Ayịn ado amaakọt anyʌñ akop adudu; ayọhọ ye aniọñ ye mfọn Abasi.
Yisọs ke tembịd
41Ke isua ke isua, Yosef ye Mmeri emaasika Usọrọ Basofa ke Yerusedem. 42Ndin ke Yisọs amaakeyọhọ isua duob ye iba, Yosef ye Mmeri emaeben anye eka Usọrọ Basofa naña ido ammọ akesido. 43Usọrọ Basofa akekweeñe, ke ete ye eka Yisọs emaetọọñọ isañ unyọñ, Yisọs amaatịmme atie ke Yerusedem, ado ete ye eka amọ ikidiọọñọke. 44Sia ammọ ekekereke ke Yisọs asʌk asaña ye mmimọ, ammọ emaeka iso isañ unyọñ ke afịd usen keed. Ndin ammọ etọọñọ adiyem anye ke atu mme ufan ye mme ayakka ammọ. 45Ke ini ammọ miikikịtte anye, ammọ emaetịmme edem eka Yerusedem ekeyem anye. 46Ke usen ita amaakeboiyo, ammọ emaekekịt anye ke afe tembịd nte atie ye mme ikpọ andikpeeb, asʌk akpañ utọñ anọ ammọ anyʌñ abịp ammọ mbịme. 47Afịd awo se ikiba ke ndo ekeba ke ñkpaidem ebaña aniọñ ye mme ibọọrọ amọ. 48Ke ini ete ye eka amọ edikịtte anye, idem amaakpa ammọ. Eka amọ amaabo anye, “Yịn, nso-o ido nọ afo inam ñnyịn ntom? Ami ye usọ imuyem fiin ke nyeemensia.”
49Anye amaabịp ammọ ate, “Nso-o ido nọ ndufo ekeñyem miin? Nte ndufo ikidiọọñọke ibo ke ana ami mba ke ufọk Ete mmi?” 50Ado ibọọrọ a-anye akenọọhọ ammọ ikinwañake ete ye eka amọ.
51Ndin anye amaadikeene ammọ anyọñ Nasared, anyʌñ akop item anọ ammọ. Ado eka amọ amaamʌm afịd mme ñkpọ ami adọñ ke esịd amọ. 52Ndin Yisọs amaakọt ke aniọñ ye ubomidaha, anyʌñ akịt mfọn ke iso Abasi ye ke iso mme awo.
Избрани в момента:
Duk 2: NAAM
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.