Duk 17
17
Idiọọkñkpọ, mbuọdidem, utom
1Yisọs abo mme ibed ammọ ate: “Ñkpọiduọ ayaadi, ado adọdiọọk anọ andido ntak iduọ ado. 2Akpaafọn inọ ammọ adieke ekpekọọñọ ammọ itiad ke itọñ etop ammọ esịn ke inyañ akan ammọ adinam keed ke atu ntəkayịn ami anam idiọọkñkpọ. 3Do ndin ikpeme idem ndufo.
“Ayịnuka akpenam idiọọkñkpọ sua nọ anye. Anye akpetua ñkpọfiọk feen nọ anye. 4Kpọkọm anye udue fiin akañ itiaba ke usen ndin atịmme adi adukpe ubọk akañ itiaba, abo: ‘mmetua ñkpọfiọk,’ ana afo afeen anọ anye.”
5Mme ibed emaebo anye ete, “Abọọñ nam mbuọdidem ñnyịn akpon.”
6Anye amaabọọrọ ammọ ate, “Mbuọdidem ndufo akpebaaha nte ñkpasi mọstad, ekpa ebo ekamba eto a-akpono nte ukịm, ‘Wʌkkọ ke wʌghọ ke inyañ ndin anye akpaanam uyo ndufo.’
7 “Dat nte awo anie ayịnufọk a-akaaha ufuñ inwañ me akpemeke edọñ, nte anye akpaabo ayịnufọk ado, ke amaato inwañ idi, di suuk tie ke akpokoro dia ñkpọ? 8Nte anye ikpikappa ibo, ‘Nam ndidia ndubi nnọ ndia, dida mbet idaha ndiaha ñkpọ, ami mmaadia ñnyʌñ ñnwọñ mma, ndin afo amekeme adidia ñnyʌñ ñnwọñ’? 9Me anye akpaakọọm ayịnufọk ado ke adinam utom amọ? 10Ntom ke ami ibo ndufo, emaenam afịd se ekebo yak ndufo enam, ekpena ebo, ‘Ñnyịn ido nditọutom a-ammiidotto, inam ubiọñ utom ñnyịn kpọd-kpọd.’ ”
Yisọs akọk mme awo akpamfia duob
11Idaha Yisọs akekaaha Yerusedem, anye amaaboiyo ke adaña Sameria ye Kadidi. 12Nte anye adʌkkọ idʌñ keed ideen duob e-ekedọñọke akpamfia emaesoobo anye. Ammọ ekeda nsan-nsan, 13ebọọñ ke akpọsọñ uyo ete, “Yisọs Eteufọk, itua ñnyịn mbọm.”
14Ke ini anye akekịtte ammọ, anye amaabo ate, “Ikaa ikiwọt mme aku idem ndufo.” Nte ammọ ekaaha ke usʌñ, emaenam ammọ esana, ndin idem amaasọñ ammọ.
15Keed ke atu ammọ, ke amaakekịt ke udọñọ ikweeñe, amaatịmme aditooro Abasi ke akpọsọñ uyo. 16Amaaduọ ke ukod Yisọs akọọm anye. Awo ami aketo Sameria.
17Yisọs amaabịp, “Nte idooho awo duob ke ekekọk? Usʌkkeed ako-o? 18Ibaaha awo a-atịmmeke adinọ Abasi ekọọm ke mmiibọhọke asenawo ami?” 19Yisọs ate anye, “Dakka nyọñ, mbuọdidem mfo anam udọñọ ukweeñe.”
Adidi abio ubọọñ Abasi
20Ini keed, mme Farisi emaebịp anye me abio ubọọñ Abasi adidi ini ake, Yisọs amaabọọrọ, “Adidi abio ubọọñ Abasi idooho ñkpọ a-ndufo ekemeke ikịt, 21mme awo idiinyʌññọ ibo, ‘Se anye mi’ me ‘Se anye ko,’ sia abio ubọọñ Abasi mmọ aba ke atu ndufo.”
22Ndin anye amaabo mme ibed amọ, “Ini asʌk adi a-ndufo ediiyem adikịt keed ke atu mme usen Ayịn Awo ado idikịtte. 23Mme awo eyaidọkkọ ndufo, ‘Se anye ko,’ me ‘Se anye mi.’ Ikiifeghe ikeene ammọ. 24Sia usen Ayịn Awo aditie nte akepkep a-akeppeke asịn unwana tọọñọ ke mben ikpaanyọñ keed tutu asịm mbeñ uko. 25Ado akpa, ana anye ayọ uwak ukuud, ñko emana ami eyaesịn anye.
26 “Ukem naña aketịppe ke ayo Nua, adinyʌñ ido ntodo ke usen Ayịn Awo. 27Mme awo ekesʌk eta, enwọñ, edọ enyʌñ enọ ke ndọ tutu usen Nua akedʌkkọ ubom, ndin ukwọ amaadisobo afịd ammọ.
28 “Ukem ado ke akedo ke ayo Dọd. Mme awo ekesʌk edia, enwọñ, edep, enyam, etọ, edọk, ebọp ufọk. 29Ado usen Dọd awuọọhọ akpọñ Sọdọm, ikañ ye sọdfọ emaeto anyọñ edep esobo afịd ammọ.
30 “Aditịppe ukem ami ke usen adidi Ayịn Awo. 31Ke usen ado, awo a-adoroke ke anyọñ akọm, ke ini inie amọ abaaha ke esịd ufọk, inaaha asọiyọ aka ikoono inie amọ. Ukem ado, awo a-abaaha ke inwañ anam utom inaaha atịmme aka ufọk akedat ñkpọ ndomokeed. 32Itoiyo anwaan Dọd! 33Awo ake adodo a-ayemme adinyaaña uwem amọ ayaaduọọk anye. Ñko awo ake adodo a-aduọọkkọ uwem amọ ayaanie uwem. 34Ami idọkkọ ndufo, ke akoneyo ado, awo iba eyaena ke ñkpana, eyaedat keed ekpọñ keed. 35Ibaan iba eyaeba ke itie ukọkñkpọ, eyaedat keed ekpọñ keed. 36Ideen iba eyaeba ke inwañ, eyaeben keed ekpọñ keed.”
37Mme mbed ebịp anye ete, “Abọọñ, ke mmọ-ọ?”
Anye amaabọọrọ, “Itie nte akpo ana, mme utere anaekeyọhọ.”
Избрани в момента:
Duk 17: NAAM
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.